సర్కారీ కొలువు సంపాదనకేనా..?
ప్రజలంటే జాలి లేదా..?
ప్రభుత్వమంటే భయం లేదా..?
అడ్డూ అదుపు లేని అవినీతికి అంతమెప్పుడు..?
ప్రభుత్వ జీతం.. ప్రైవేట్ సామ్రాజ్యం. లగ్జరీ కార్లు.. లెక్కలేనన్ని ప్లాట్లు.. కళ్లు చెదిరేలా ఫ్లాట్లు.. ఒంటినిండా బంగారం.. కోట్లలో బ్యాంకు బ్యాలెన్స్. ప్రభుత్వ ఉద్యోగి అనగానే ఇదే గుర్తురావాలా..? ఏమో ఈ మధ్య ఏసీబీ పట్టుకుంటున్న అధికారుల ఆస్తుల చిట్టా చూస్తుంటే అలాగే అనిపిస్తోంది. అధికారులంతా అలాంటి వారే అని చెప్పలేం. కానీ.. అలాంటి అధికారులు కూడా ఉన్నారన్నది మాత్రం కళ్ల ముందు కనిపిస్తున్న కఠోర వాస్తవం.
ఒక ప్రభుత్వ డాక్టర్.. అదనపు సూపరింటెండెంట్ హోదా.. కోట్ల రూపాయల ఆస్తుల ఆరోపణలు. పేద ప్రజలకు వైద్యం అందించాల్సిన ప్రభుత్వ ఆసుపత్రిలో పనిచేస్తున్న అధికారిపై ఏసీబీ సోదాలు జరగడం.. మరోసారి ప్రభుత్వ వ్యవస్థల్లో అవినీతి ఏ స్థాయిలో ఉందనే ప్రశ్నను ముందుకు తెచ్చింది.
ఆయన పేరు లక్ష్మీ భాస్కర్ అయినా.. లక్కీ భాస్కర్ అయినా.. అసలు ప్రశ్న మాత్రం ఒక్కటే. ప్రభుత్వ జీతంతో ఇంత ఆస్తి ఎలా? ఆస్తుల వెనుక ఆదాయ వనరులేంటి? ప్రజల సేవ కోసం ఉన్న హోదా.. వ్యక్తిగత సంపద పెంచుకునే మార్గంగా మారిందా? లేకపోతే మీకొచ్చే జీతంతోనే అంత సంపాదించారా..? అలా అయితే ఆ సీక్రెట్ ఏంటో మాకు కూడా చెప్పొచ్చు కదా. మేం కూడా సంపాదించుకుంటాం. ఇదీ ప్రతి ఒక్కరూ అడుగుతున్న ప్రశ్న.
రూ. 80 కోట్ల ఆస్తులా..?
నిమ్స్ అదనపు సూపరింటెండెంట్ డాక్టర్ నోరి లక్ష్మీభాస్కర్పై ఆదాయానికి మించిన ఆస్తుల కేసులో ఏసీబీ అధికారులు సోదాలు నిర్వహించి, అరెస్ట్ చేశారు. ఆయన అక్రమాస్తుల విలువ ఏకంగా 80 కోట్ల రూపాయల పైమాటేనట. మరీ ఇంత భరితెగింపా..? ఈ ఘటన కేవలం ఒక అధికారి వ్యవహారం కాదు. ప్రభుత్వ వ్యవస్థలో పర్యవేక్షణ, అవినీతి నియంత్రణ, జవాబుదారీతనంపై చర్చ జరగాల్సిన సందర్భం.
ఫ్లాట్లు.. ప్లాట్లు.. కార్లు.. పెట్టుబడులు.. ఇదంతా ఎలా?
ఏసీబీ అధికారులు బయటపెట్టిన చిట్టా చూస్తే కళ్లు బైర్లు కమ్మాల్సిందే. హైదరాబాద్లో పలు ఫ్లాట్లు, వివిధ ప్రాంతాల్లో ప్లాట్లు, విశాఖపట్నంలో భూమి, బ్యాంకు బ్యాలెన్స్లు, పోస్టాఫీసు డిపాజిట్లు, మ్యూచువల్ ఫండ్స్, బంగారం, వాహనాలు ఉన్నాయి.
జాగ్వార్.. ఆడి.. టాటా నెక్సన్.. నాలుగు ద్విచక్ర వాహనాలు.
ఈ వెహికిల్స్ లిస్ట్ అంతా లక్కీ భాస్కర్ దే. వీటిలో ఏదైనా ఒక వాహనం కలిగి ఉండటం తప్పు కాదు. అన్ని వాహనాలు ఉన్నా నేరం కాదు. భూములు కొనడం, పెట్టుబడులు పెట్టడం కూడా నేరం కాదు. కానీ మీరు కొన్నవన్నీ నీతివంతమైన సంపదతోనే కొన్నారని చెప్పగలరా..? ఇదే అసలు ప్రశ్న.
ప్రభుత్వ ఉద్యోగం ద్వారా వచ్చే ఆదాయం ఎంత? కుటుంబానికి ఉన్న చట్టబద్ధమైన ఆదాయ వనరులు ఎంత? సంపాదించిన ఆస్తులు ఎంత? ఆ రెండింటి మధ్య వ్యత్యాసం ఎందుకు వచ్చింది?
దేశవ్యాప్తంగా ఎంతో మంది లక్కీ భాస్కర్లు...
నిమ్స్ ఘటనను ఉదాహరణగా చూడలేం. ఇటీవలి కాలంలో వివిధ రాష్ట్రాల్లో ప్రభుత్వ అధికారులపై అవినీతి, అక్రమ ఆస్తుల ఆరోపణలకు సంబంధించి దర్యాప్తులు, అరెస్టులు, ఛార్జ్షీట్లు లెక్కలేనన్ని.
మొన్న జూన్లో హైదరాబాద్లో సర్వే, భూ రికార్డుల శాఖ డిప్యూటీ డైరెక్టర్ అడ్డంగా బుక్కయ్యారు. ఆయన నివాసాల్లో సోదాలు నిర్వహించిన ఏసీబీ అధికారులు.. రూ.30 కోట్లకు పైగా ఆస్తులు గుర్తించారు. రూ.1.54 కోట్ల నగదు, 1.3 కిలోల బంగారం, 8 కిలోల వెండి స్వాధీనం చేసుకున్నారు.
ఛత్తీస్గఢ్లో మాజీ సీఎం కార్యాలయంలో డిప్యూటీ సెక్రటరీగా పనిచేసిన సౌమ్య చౌరాసియాపై దాదాపు రూ.49.69 కోట్ల ఆస్తుల కేసులో 2025లో ఈఓడబ్ల్యూ ఛార్జ్షీట్ దాఖలు చేసింది. సుమారు 45 స్థిరాస్తులు బినామీ పెట్టుబడులుగా ఉన్నాయని దర్యాప్తు సంస్థ స్పష్టం చేసింది. మరి.. ఈ కేసు మనకు గుర్తు చేసేది ఏంటి? అధికార హోదా పెరిగిన కొద్దీ పర్యవేక్షణ కూడా పెరగాలి. లేకపోతే అధికారం, పరిచయాలు, ఆర్థిక లావాదేవీలు కలిసి ప్రజా వ్యవస్థను బలహీనపరచే ప్రమాదం ఉంటుంది.
చండీగఢ్ పునరుత్పాదక ఇంధన సంస్థకు సంబంధించిన మరో కేసులో ఐఎఫ్ఎస్ అధికారి నవనీత్ కుమార్ శ్రీవాస్తవపై సీబీఐ ఛార్జ్షీట్ దాఖలు చేసింది. సంస్థ నిధుల్లో రూ.75.4 కోట్ల దుర్వినియోగానికి సంబంధించిన ఆరోపణలు ఉన్నాయి. అందులో రూ.80 లక్షలు గోవాలో ఆస్తి కొనుగోలుకు ఉపయోగించారని సీబీఐ ఆరోపించింది. కేసు దర్యాప్తులో ఉంది.
ఇది వ్యక్తిగత ఆస్తుల కేసుతో సమానం కాదు. కానీ ప్రజా నిధుల నిర్వహణలో అవినీతి ఆరోపణలు వచ్చినప్పుడు.. నిధుల వినియోగంపై ఆడిట్, పర్యవేక్షణ, బాధ్యత ఎంత కీలకమో చూపించే ఉదాహరణ.
వ్యవస్థను ప్రశ్నించకుండా అవినీతి ఆగుతుందా?
ఇప్పుడు నిమ్స్ కేసుకు తిరిగి వద్దాం. ఒక అధికారిపై ఆరోపణలు వచ్చినప్పుడు ఏసీబీ సోదాలు నిర్వహిస్తుంది. ఆధారాలు సేకరిస్తుంది. దర్యాప్తు చేస్తుంది. అవసరమైతే అరెస్ట్ చేస్తుంది. ఇది చట్టపరమైన ప్రక్రియ. కానీ ప్రశ్న ఇక్కడే ఆగిపోదు. ఒక అధికారి అక్రమ ఆస్తులు కూడబెట్టాడని ఆరోపణలు వచ్చిన తర్వాతే వ్యవస్థ స్పందించాలా? లేక ఆస్తులు కూడబెట్టే ప్రక్రియలోనే పర్యవేక్షణ ఉండాలా?
ప్రభుత్వ ఉద్యోగుల ఆస్తుల ప్రకటనలు, అంతర్గత ఆడిట్లు, ఫిర్యాదుల విచారణ.. ఇవన్నీ కాగితాలపై మాత్రమే కాకుండా ఆచరణలోనూ బలంగా ఉండాలి. అవినీతికి అవకాశం ఇచ్చే లోపాలు ఉంటే.. వాటిని గుర్తించి సరిదిద్దాల్సిన బాధ్యత ప్రభుత్వానిదే. ప్రజలు ఓటు వేసి ప్రభుత్వాన్ని ఎన్నుకుంటారు. ఆ ప్రభుత్వం ఉద్యోగులకు అధికారం ఇస్తుంది. ఆ అధికారం ప్రజా సేవ కోసం ఉపయోగించాలి. అధికారం ప్రజల నుంచి వస్తుంది. కాబట్టి ఆ అధికారంపై ప్రశ్నలు అడిగే హక్కు కూడా ప్రజలదే.
పేదోడికి వైద్యం కావాలి.. అధికారికి సంపద కాదు!
నిమ్స్ వంటి ప్రభుత్వ వైద్య సంస్థలకు వచ్చే రోగుల్లో చాలామంది చికిత్స ఖర్చుల భారాన్ని తట్టుకోలేని కుటుంబాలే. ఒక పేద కుటుంబం ఆసుపత్రిలో బెడ్ కోసం, చికిత్స కోసం, మందుల కోసం ఎదురుచూస్తుంటే.. అదే వ్యవస్థలోని అధికారిపై కోట్ల రూపాయల ఆస్తుల ఆరోపణలు రావడం సహజంగానే ప్రజల్లో ఆవేదన కలిగిస్తుంది. కానీ ఆ ఆవేదనను వాస్తవాల ఆధారంగా వ్యవస్థ సంస్కరణల డిమాండ్గా మార్చాలి.
రోగికి వైద్యం అందుతుందా? సేవల కోసం అనవసరమైన డబ్బు చెల్లించాల్సి వస్తుందా? ఫిర్యాదు చేస్తే స్పందించే వ్యవస్థ ఉందా?
అధికార దుర్వినియోగంపై చర్యలు తీసుకుంటున్నారా? ఈ ప్రశ్నలకు సమాధానం కావాలి.
పేదవాడి అవసరం ప్రభుత్వ సేవ. అవినీతి అధికారికి రక్షణ కాదు. అరెస్ట్తో కథ ముగియకూడదు.. బాధ్యత మొదలవ్వాలి. నిమ్స్ కేసులో దర్యాప్తు నిష్పక్షపాతంగా జరగాలి. ఆస్తుల వాస్తవ విలువ, ఆదాయ వనరులు, పెట్టుబడుల మూలాలు, గత ఫిర్యాదులకు సంబంధించిన అంశాలు పరిశీలించాలి.
అలాగే ప్రభుత్వ ఆసుపత్రుల్లో అవినీతి నిరోధక వ్యవస్థను మరింత బలోపేతం చేయాలి. ఫిర్యాదులపై వేగంగా స్పందించడం, రోగుల హక్కులను రక్షించడం, అధికారుల పనితీరుపై పర్యవేక్షణ పెంచడం అవసరం. ప్రజా వ్యవస్థను బలోపేతం చేయడం అంటే కేవలం అరెస్టులు చేయడం కాదు. అవినీతికి అవకాశం తగ్గించడం, అక్రమాలకు పాల్పడేవారిపై చర్యలు తీసుకోవడం, నిజాయితీగా పనిచేసేవారికి రక్షణ కల్పించడం.
లక్కీ భాస్కర్లకు లెక్క చెప్పాల్సిందే!
నిమ్స్ డాక్టర్ కేసు మన ముందుకు తెచ్చిన ప్రశ్నలు చిన్నవి కావు. ప్రభుత్వ హోదా.. కోట్ల ఆస్తులు.. గత ఫిర్యాదులు.. వ్యవస్థ పర్యవేక్షణ.. ఇవన్నీ ప్రజా నమ్మకంతో ముడిపడిన అంశాలు. అవినీతి ఆరోపణలు ఎదుర్కొనే ప్రతి ఒక్కరిపై చట్టబద్ధంగా దర్యాప్తు జరగాలి. తప్పు నిరూపితమైతే శిక్ష తప్పక ఉండాలి. ఎవరైనా అధికారాన్ని దుర్వినియోగం చేస్తే.. వారి హోదా ఎంత పెద్దదైనా చట్టం ముందు జవాబుదారీగా ఉండాలి.
జీతం ప్రభుత్వానిది అయితే.. బాధ్యత కూడా ప్రభుత్వానిదే. అధికారం ప్రజలది అయితే.. లెక్క కూడా ప్రజలకే చెప్పాలి. ప్రభుత్వ వ్యవస్థల్లో లక్కీ భాస్కర్లు తయారవుతున్నారా? లేక వ్యవస్థలోని లోపాలు వారిని పెంచుతున్నాయా? ఈ ప్రశ్నకు సమాధానం కావాలి. అవినీతిని ప్రశ్నిద్దాం. అవినీతి అధికారులను చట్టం ముందు నిలదీద్దాం. ప్రజా వ్యవస్థను జవాబుదారీగా మార్చాలని డిమాండ్ చేద్దాం. పౌరులుగా ఇది ప్రతి ఒక్కరి బాధ్యత.
