సరదాగా చేసిన ఒక పని ముగ్గురు యువకులను ఊహించని విధంగా కష్టాల్లోకి నెట్టింది. మద్యం మత్తులో ప్రియురాలికి పంపిన ఒక అబద్ధపు సందేశం, చివరకు వారి ఫ్లాట్‌లో దాచిపెట్టిన అక్రమ బెట్టింగ్ సొమ్మును పోలీసుల ముందు బట్టబయలు చేసింది. హైదరాబాద్‌లోని కేపీహెచ్‌బీ పోలీస్ స్టేషన్ పరిధిలో వెలుగుచూసిన ఈ విచిత్ర ఘటన స్థానికంగా కలకలం రేపింది.
ఆంధ్రప్రదేశ్‌లోని చంద్రగిరి ప్రాంతానికి చెందిన దేశినేని సుమంత్, మాకాటి మనోజ్, కనుమూరి గౌతమ్ అనే ముగ్గురు యువకులు కేపీహెచ్‌బీలోని 'ఇండిస్ వన్ సిటీ' గేటెడ్ కమ్యూనిటీలో ఒక ఫ్లాట్‌లో అద్దెకు ఉంటున్నారు. శుక్రవారం రాత్రి వీరంతా కలిసి పార్టీ చేసుకుంటూ విచ్చలవిడిగా మద్యం సేవించారు. ఈ మత్తులో ఉండగానే సుమంత్ తన ప్రియురాలికి సరదాగా ఉంటుందనే ఉద్దేశంతో "నన్ను ఎవరో కిడ్నాప్ చేశారు" అంటూ ఒక మెసేజ్ పంపాడు.
ఆ సందేశాన్ని చూసి తీవ్ర ఆందోళనకు గురైన ఆ యువతి, ఏమాత్రం ఆలస్యం చేయకుండా వెంటనే డయల్ 112కు ఫోన్ చేసి పోలీసులకు ఫిర్యాదు చేసింది. అప్రమత్తమైన ఎస్‌ఐ రాజు నేతృత్వంలోని పెట్రోలింగ్ పోలీసు బృందం హుటాహుటిన వారు ఉంటున్న ఫ్లాట్‌కు చేరుకుంది. అక్కడ సుమంత్ ఎలాంటి ప్రమాదం లేకుండా క్షేమంగా ఉండటాన్ని గమనించిన పోలీసులు, ఇదంతా కేవలం ఒక కిడ్నాప్ డ్రామా మాత్రమేనని నిర్ధారించుకున్నారు. అయినప్పటికీ, ఆ సమయంలో వారి ప్రవర్తనపై అనుమానం వచ్చిన పోలీసులు ఆ ఫ్లాట్‌ను క్షుణ్ణంగా తనిఖీ చేశారు.
ఈ సోదాల్లో ఒక సూట్‌కేస్‌లో భద్రపరిచిన రూ.30లక్షల భారీ నగదును పోలీసులు గుర్తించారు. ఆ డబ్బుకు సంబంధించి యువకులను ప్రశ్నించగా వారు ఎలాంటి సరైన సమాధానాలు చెప్పలేకపోయారు. దీంతో అనుమానం బలపడి వారి మొబైల్ ఫోన్లను పరిశీలించగా, అందులో క్రికెట్ బెట్టింగ్‌కు సంబంధించిన లావాదేవీలు పక్కాగా బయటపడ్డాయి. నిందితుల్లో మనోజ్ అసిస్టెంట్ డైరెక్టర్‌గా, గౌతమ్ ఎలక్ట్రికల్ కాంట్రాక్టర్‌గా పనిచేస్తుండగా, సుమంత్ బెట్టింగ్ కార్యకలాపాలతో సంబంధం కలిగి ఉన్నట్లు తేలింది. వెంటనే ఆ ముగ్గురిని అదుపులోకి తీసుకున్న పోలీసులు, నగదును సీజ్ చేసి కేసు నమోదు చేసి దర్యాప్తు ముమ్మరం చేశారు.
