గుండె ఆరోగ్యంగా ఉండాలంటే మందులకంటే ముందుగా మన రోజువారీ ఆహార అలవాట్లు, జీవనశైలిపై దృష్టి పెట్టాలి. గుండె కేవలం రక్తాన్ని పంప్ చేసే అవయవం మాత్రమే కాదు.. శరీరంలోని ప్రతి భాగానికి ఆక్సిజన్ అందించే కీలకమైన అవయవం. అందుకే గుండెను కాపాడుకోవడం అంటే మొత్తం ఆరోగ్యాన్ని కాపాడుకోవడమే.
చిన్న వయసులోనే గుండె జబ్బులు కనిపించడానికి అధిక బరువు, అధిక రక్తపోటు, కొలెస్ట్రాల్, ధూమపానం, శారీరక శ్రమ లేకపోవడం, ఒత్తిడి, అనారోగ్యకరమైన ఆహారం వంటి అనేక కారణాలు ఉన్నాయి. ముఖ్యంగా ప్రాసెస్డ్ ఫుడ్, ఫాస్ట్ ఫుడ్, అధిక ఉప్పు, చక్కెర, సంతృప్త కొవ్వులు ఎక్కువగా తీసుకోవడం గుండె ఆరోగ్యంపై ప్రతికూల ప్రభావం చూపుతుంది.
అయితే గుండెను కాపాడుకోవడానికి ఆహారంలో కొన్ని మార్పులు చేయవచ్చు. తాజా కూరగాయలు, పండ్లు, చిరుధాన్యాలు, పప్పులు, సంపూర్ణ ధాన్యాలు, బాదం, వాల్‌నట్స్ వంటి గింజలను పరిమిత మోతాదులో ఆహారంలో భాగం చేసుకోవాలి. చేపలు వంటి ఒమేగా-3 కొవ్వు ఆమ్లాలు ఉన్న ఆహారాలు కూడా సమతుల్య ఆహారంలో ఉపయోగపడతాయి. ఉప్పు, అదనపు చక్కెర, వేయించిన పదార్థాలు, ప్రాసెస్డ్ మీట్, అధికంగా ప్రాసెస్ చేసిన ఆహారాన్ని మాత్రం తగ్గించడం మంచిది.
ఆహారంతో పాటు నడక కూడా ముఖ్యం. ఎక్కువసేపు కూర్చుని పనిచేసేవారు మధ్య మధ్యలో లేచి నడవాలి. రోజూ క్రమం తప్పకుండా వాకింగ్ చేయడం అలవాటు చేసుకోవాలి. పొగతాగడం పూర్తిగా మానేయడం, మద్యం నివారించడం లేదా పరిమితం చేయడం, బరువును అదుపులో పెట్టుకోవడం గుండె జబ్బుల ప్రమాదాన్ని తగ్గించడంలో సహాయపడతాయి. ఒత్తిడిని నియంత్రించుకోవడానికి తగిన నిద్ర, విశ్రాంతి, ఇష్టమైన హాబీలు కూడా ఉపయోగపడతాయి.
అయితే ఛాతిలో నొప్పి, ఒత్తిడి, శ్వాస తీసుకోవడంలో ఇబ్బంది, చెమటలు లేదా నొప్పి చేతి, దవడ, వీపు వైపు వ్యాపించడం వంటి లక్షణాలను నిర్లక్ష్యం చేయకూడదు. ఇవి కనిపిస్తే వెంటనే వైద్య సహాయం తీసుకోవాలి. ముఖ్యంగా బీపీ, షుగర్, కొలెస్ట్రాల్ వంటి అంశాలను వయసు, కుటుంబ చరిత్ర, ఇతర రిస్క్ ఫ్యాక్టర్లను బట్టి వైద్యుల సలహాతో పరీక్షించుకోవాలి. గుండె ఆరోగ్యానికి ఒక్క సూపర్‌ఫుడ్ సరిపోదు.. సరైన ఆహారం, క్రమమైన వ్యాయామం, ఒత్తిడి నియంత్రణ, అవసరమైన వైద్య పరీక్షలు వంటివి సమయాన్ని బట్టి అలవరచుకోవాలని ఆరోగ్య నిపుణులు సూచిస్తున్నారు..
ముఖ్య గమనిక: ఈ సమాచారం కేవలం మీ అవగాహన కోసం మాత్రమే. ఇది నిపుణుల లేదా వైద్యుల సూచనలకు ప్రత్యామ్నాయం కాదు. ఆరోగ్యానికి సంబంధించిన ఎలాంటి నిర్ణయాలైనా తీసుకునే ముందు ఖచ్చితంగా మీ డాక్టర్‌ను సంప్రదించాల్సిందిగా మనవి!..
