కాలేయం దెబ్బతింటున్నప్పుడు మొదట్లో ఎలాంటి నొప్పి లేకపోవచ్చు. అందుకే కాలేయ వ్యాధులను చాలాసార్లు సైలెంట్ కిల్లర్ అని కూడా అంటారు. అయితే మన శరీరం కొన్ని మార్పుల ద్వారా ముందుగానే హెచ్చరికలు పంపుతుంది. ముఖ్యంగా చర్మం, కళ్లు, అరచేతులలో కనిపించే కొన్ని లక్షణాలను నిర్లక్ష్యం చేయకూడదు.
మొదటిది.. చర్మం, కళ్లు పసుపు రంగులోకి మారడం. కాలేయం సరిగ్గా పనిచేయకపోతే రక్తంలో బిలిరుబిన్ అనే పదార్థం పెరుగుతుంది. దీంతో ముఖ్యంగా కళ్లలోని తెల్లటి భాగం, చర్మం పసుపు రంగులోకి మారవచ్చు. దీనినే కామెర్లు అంటారు. ఇది కాలేయం లేదా పిత్తనాళాలకు సంబంధించిన సమస్యకు ముఖ్యమైన సంకేతం కావచ్చని ఆరోగ్య నిపుణులు చెబుతున్నారు.
రెండవది.. కారణం తెలియకుండా తీవ్రమైన దురద. ఎలాంటి స్పష్టమైన దద్దుర్లు లేకపోయినా శరీరం మొత్తం, ముఖ్యంగా అరచేతులు, అరికాళ్లలో రోజు దురద ఉంటే నిర్లక్ష్యం చేయకండి. కాలేయ నాళాల్లో పూడికలు ఏర్పడి పిత్త రసం రక్తంలో కలవడం వల్ల చర్మం కింద పిత్త లవణాలు చేరుతాయి. దీనివల్ల ముఖ్యంగా అరచేతులు, అరికాళ్లలో తట్టుకోలేని దురద కనిపించవచ్చని వైద్యులు హెచ్చరిస్తున్నారు..
మూడవది.. చర్మంపై సాలీడు ఆకారంలో కనిపించే చిన్న ఎర్రటి రక్తనాళాల మచ్చలు. వీటిని స్పైడర్ ఆంజియోమాస్ అంటారు. ఇవి ఆరోగ్యవంతులలో కూడా కనిపించవచ్చు. అయితే ఇలాంటి మచ్చలు ఎక్కువ సంఖ్యలో కనిపిస్తే, ఇతర లక్షణాలతో కలిపి ఉంటే కాలేయ వ్యాధుల కోసం వైద్య పరీక్షలు అవసరం కావచ్చు. అలాగే అరచేతులు అసాధారణంగా ఎర్రబడటం, ముఖ్యంగా అరచేతుల కొన్ని భాగాల్లో ఎర్రదనం పెరగడం కూడా కొన్ని దీర్ఘకాలిక కాలేయ వ్యాధుల్లో కనిపించవచ్చని నిపుణులు తెలుపుచున్నారు..
మరోవైపు చిన్న దెబ్బకే నీలిరంగు మచ్చలు పడటం, తరచూ రక్తస్రావం కావడం కూడా కాలేయ పనితీరు తీవ్రంగా దెబ్బతిన్నప్పుడు కనిపించే లక్షణాలుగా వైద్యులు సూచిస్తున్నారు. ఎందుకంటే రక్తం గడ్డకట్టడానికి అవసరమైన కొన్ని ప్రోటీన్ల తయారీలో కాలేయం కీలక పాత్ర పోషిస్తుంది. అయితే ఈ లక్షణాలు కనిపించాయని మాత్రమే కాలేయ వ్యాధి ఉందని నిర్ధారించలేం. చర్మ సమస్యలు, హార్మోన్ల మార్పులు, ఇతర వ్యాధులు కూడా ఇలాంటి లక్షణాలకు కారణం కావచ్చని పేర్కొంటున్నారు.
కాబట్టి చర్మం లేదా కళ్లలో అకస్మాత్తుగా మార్పులు కనిపిస్తే స్వయంగా మందులు వాడకుండా వైద్యుడిని సంప్రదించి అవసరమైన రక్తపరీక్షలు, కాలేయ పనితీరు పరీక్షలు చేయించుకోవడం మంచిదంటున్నారు. ముఖ్యంగా పసుపు రంగు చర్మం లేదా కళ్లు, తీవ్రమైన దురద, పొట్ట ఉబ్బరం, కాళ్ల వాపు, అసాధారణ అలసట, ముదురు రంగు మూత్రం వంటి లక్షణాలు కనిపిస్తే వెంటనే వైద్య సలహా తీసుకోవాలని, కాలేయ వ్యాధుల్లో ముందస్తు గుర్తింపు.. చికిత్సకు అత్యంత కీలకమని వైద్యులు అంటున్నారు..
ముఖ్య గమనిక: ఈ సమాచారం కేవలం మీ అవగాహన కోసం మాత్రమే. ఇది నిపుణుల లేదా వైద్యుల సూచనలకు ప్రత్యామ్నాయం కాదు. ఆరోగ్యానికి సంబంధించిన ఎలాంటి నిర్ణయాలైనా తీసుకునే ముందు ఖచ్చితంగా మీ డాక్టర్ను సంప్రదించాల్సిందిగా మనవి!..
