యూరప్లో తగలబడుతున్న అడవులు
కార్చిచ్చుతో విలవిలలాడుతున్న పలు దేశాలు
యూరప్లో మంటలకు కారణాలేంటి..?
యూరప్ మరోసారి భారీ ప్రకృతి విపత్తును ఎదుర్కొంటోంది. ఫ్రాన్స్, స్పెయిన్, పోర్చుగల్, గ్రీస్, ఇటలీ వంటి దేశాల్లో అడవులు భారీగా మంటల్లో చిక్కుకున్నాయి. వేలాది హెక్టార్ల అటవీ ప్రాంతం బూడిదవుతోంది. లక్షలాది మందిని సురక్షిత ప్రాంతాలకు తరలించాల్సిన పరిస్థితి ఏర్పడింది. అగ్నిమాపక సిబ్బంది రాత్రింబవళ్లు శ్రమిస్తున్నా... మంటలు అదుపులోకి రావడం లేదు.
ఎందుకు ఇంత తీవ్రంగా వ్యాపిస్తున్నాయి?
ఈసారి మంటలకు ఒక్క కారణం కాదు. అనేక ప్రకృతి, వాతావరణ పరిస్థితులు కలిసి కార్చిచ్చును మరింత ప్రమాదకరంగా మార్చాయి. ఈ ఏడాది యూరప్లో అనేక దేశాల్లో ఎన్నడూ లేనంతగా ఉష్ణోగ్రతలు నమోదయ్యాయి. 40 డిగ్రీల సెల్సియస్కు పైగా ఉష్ణోగ్రతలు నమోదవడంతో అడవుల్లోని గడ్డి, పొదలు పూర్తిగా ఎండిపోయాయి. దీంతో చిన్న నిప్పురవ్వ కూడా భారీ మంటగా మారుతోంది.
చాలా ప్రాంతాల్లో నెలల తరబడి సరైన వర్షాలు పడలేదు. దీంతో నేలలో తేమ తగ్గిపోయింది. చెట్లు, మొక్కలు పూర్తిగా ఎండిపోవడంతో అవే మంటలకు ఇంధనంగా మారుతున్నాయి. మంటలు ఒకచోట మొదలైతే గాలి వాటిని వేగంగా కిలోమీటర్ల దూరం వరకు వ్యాపింపజేస్తోంది. దీంతో అగ్నిమాపక సిబ్బందికి పరిస్థితి మరింత క్లిష్టంగా మారుతోంది.
వాతావరణ మార్పుల ప్రభావమా?
శాస్త్రవేత్తల అభిప్రాయం ప్రకారం, గ్లోబల్ వార్మింగ్ కారణంగా యూరప్లో హీట్వేవ్లు మరింత తీవ్రంగా మారుతున్నాయి. వేడి ఎక్కువైతే అడవులు త్వరగా ఎండిపోతాయి. దాంతో కార్చిచ్చు ప్రమాదం గణనీయంగా పెరుగుతోంది. ఈసారి ఫ్రాన్స్, స్పెయిన్లో లక్షలాది మంది ఇళ్లను ఖాళీ చేయాల్సి వచ్చింది. వందలాది ఇళ్లు దగ్ధమయ్యాయి. అనేక పర్యాటక ప్రాంతాలు మూతపడ్డాయి. యూరోపియన్ యూనియన్ సభ్య దేశాలు పరస్పరం అగ్నిమాపక విమానాలు, సిబ్బందిని పంపిస్తూ సహాయక చర్యలు చేపడుతున్నాయి.
అడవులు మాత్రమే కాదు... ఆర్థిక వ్యవస్థకూ దెబ్బే...
ఈ మంటల వల్ల కలప, వ్యవసాయం, పర్యాటక రంగాలు తీవ్రంగా నష్టపోతున్నాయి. అడవులు నాశనం కావడంతో వన్యప్రాణులు నివాసాలను కోల్పోతున్నాయి. గాలిలో పొగ పెరగడం వల్ల శ్వాసకోశ సమస్యలు కూడా అధికమవుతున్నాయి. కార్బన్ డైఆక్సైడ్ పెరగడం వల్ల గ్లోబల్ వార్మింగ్ డేంజర్ బెల్స్ మోగిస్తోందని నిపుణులు హెచ్చరిస్తున్నారు.
ముంచుకొస్తున్న ప్రమాదం
వాతావరణ శాఖ అంచనాల ప్రకారం యూరప్లో మరో హీట్వేవ్ వచ్చే అవకాశముంది. వర్షాలు పడకపోతే మరిన్ని ప్రాంతాల్లో మంటలు చెలరేగే ప్రమాదం ఉందని అధికారులు హెచ్చరిస్తున్నారు. అందుకే ఇప్పటికే అనేక దేశాలు అత్యవసర పరిస్థితిని ప్రకటించి అప్రమత్తంగా ఉన్నాయి. యూరప్లో కొనసాగుతున్న ఈ కార్చిచ్చు కేవలం ఒక సహజ విపత్తు మాత్రమే కాదు. పెరుగుతున్న ఉష్ణోగ్రతలు, కరువు, వాతావరణ మార్పులపై ప్రపంచం ఎదుర్కొంటున్న కొత్త సవాళ్లకు ఇది స్పష్టమైన సంకేతం. ఇప్పటికైనా కార్బన్ ఉద్గారాల నియంత్రణ, అడవుల సంరక్షణపై ప్రపంచ దేశాలు సమిష్టిగా చర్యలు తీసుకోవాలి. లేదంటే.. భవిష్యత్తులో ఇలాంటి విపత్తులు మరింత తీవ్రరూపం దాల్చే అవకాశం ఉంది.
