తమిళనాడులో స్టార్ వార్
త్వరలో ధనుష్ పొలిటికల్ ఎంట్రీ..!
విజయ్ని ఢీకొట్టే సత్తా ఉందా..?
ద్రవిడ పార్టీలు ఇక చరిత్రేనా..?
తమిళ స్టార్ హీరో, దర్శకుడు ధనుష్ రాజకీయాల్లోకి రాబోతున్నారా..? ఈ మధ్య ఆయన చేసిన ఓ ప్రకటన.. సర్వత్రా ఆసక్తి కలిగిస్తోంది. ఆయన పొలిటికల్ ఎంట్రీ ఖాయమని ఫ్యాన్స్ కూడా ఫుల్ ఖుష్ అవుతున్నారు. తన ఫ్యాన్స్ ఏర్పాటు చేసిన రక్తదాన శిబిరానికి హాజరైన ధనుష్ కీలక కామెంట్స్ చేశారు. అక్కడికి భారీగా తరలివచ్చిన అభిమానులను చూసి ఉత్సాహంగా మాట్లాడుతూ ఓ పొలిటికల్ హింట్ ఇచ్చారు. తన అభిమానులంతా.. కేవలం ఆడియో లాంచ్లకే పరిమితం కాకుండా.. ప్రజా సేవా కార్యక్రమాల్లో మరింత చురుకుగా పాల్గొనాలని కోరారు. పక్క వారు ఎవరైనా కష్టాల్లో ఉంటే వెంటనే స్పందించాలని పిలుపునిచ్చారు. ధనుష్ చేసిన ఈ ప్రకటన ఒక్కసారిగా వైరల్గా మారింది. తమ హీరో పొలిటికల్ ఎంట్రీ ఖాయమంటూ ఊహల్లో తేలియాడుతున్నారు.
ఐతే ధనుష్ తాను రాజకీయాల్లోకి వస్తున్నానని ఎక్కడా అధికారికంగా ప్రకటించలేదు. ఎన్నికల్లో పోటీ చేస్తానని కూడా చెప్పలేదు. అయినప్పటికీ తమిళనాడు రాజకీయాల్లో ఆయనకు నిజంగా స్పేస్ ఉందా అనే చర్చ మొదలైంది.
తమిళనాడులో పొలిటికల్ సినిమా
తమిళనాడులో సినీ నటులు రాజకీయాల్లోకి రావడం కొత్త విషయం కాదు. ఎంజీఆర్, జయలలిత, విజయకాంత్, కమల్ హాసన్, విజయ్ వంటి ప్రముఖులు రాజకీయాల్లో అడుగుపెట్టారు. కొందరు అధికారంలోకి వచ్చారు.. మరికొందరు ఆశించిన స్థాయిలో విజయం సాధించలేదు. అందుకే ధనుష్ విషయంలో కూడా రకరకాల విశ్లేషణలు వినిపిస్తున్నాయి.
ధనుష్కు ఉన్న బలాలు
ధనుష్కు తమిళనాడులో విస్తృతమైన అభిమాన వర్గం ఉంది. ఆయన ఫ్యాన్ క్లబ్లు చాలా ఏళ్లుగా రక్తదాన శిబిరాలు, వరద సహాయం, విద్యార్థులకు సాయం వంటి సేవా కార్యక్రమాలు నిర్వహిస్తున్నాయి. ఇటీవల కూడా అభిమానులను మరింత సామాజిక సేవ చేయాలని ఆయన కోరడం రాజకీయ సంకేతంగా కొందరు విశ్లేషిస్తున్నారు. అలాగే ధనుష్ కేవలం మాస్ హీరో మాత్రమే కాదు. జాతీయ అవార్డులు అందుకున్న నటుడు. గ్రామీణ, పట్టణ యువతలో ఆయనకు ప్రత్యేక గుర్తింపు ఉంది. ఈ ఇమేజ్ రాజకీయాల్లో మైలేజ్గా మారొచ్చు.
అయితే స్టార్ ఇమేజ్ మాత్రమే ఎన్నికల్లో విజయానికి సరిపోదు. తమిళనాడులో ఇప్పటికే బలమైన పార్టీలు ఉన్నాయి. డీఎంకే, అన్నాడీఎంకే వంటి ద్రావిడ పార్టీలతో పాటు కొత్తగా విజయ్ పార్టీ కూడా రాజకీయాల్లో స్థిరపడేందుకు ప్రయత్నిస్తోంది. పోటీ చేసిన తొలి ఎన్నికల్లోనే సత్తా చాటి సీఎం పీఠమెక్కారు విజయ్. ఇలాంటి పరిస్థితుల్లో మరో కొత్త పార్టీని నిలబెట్టడం అంత సులభం కాదు. ప్రతి నియోజకవర్గంలో పార్టీ నిర్మాణం, బూత్ స్థాయి నాయకత్వం, కేడర్, ఆర్థిక బలం, స్పష్టమైన సిద్ధాంతం వంటి అంశాలు కీలకం.
విజయ్ ప్రభావం కూడా కీలకమే
తమిళ రాజకీయాల్లో సీఎం విజయ్ ప్రధాన రాజకీయ శక్తిగా ఎదగడానికి ప్రయత్నిస్తున్నారు. యువతలో ఆయనకు ఉన్న ఆదరణ కూడా ఎక్కువ. ఈ నేపథ్యంలో ధనుష్ రాజకీయాల్లోకి వస్తే ఇద్దరూ ఒకే తరహా ఓటు బ్యాంక్ను లక్ష్యంగా చేసుకునే అవకాశం ఉంటుంది. దీంతో యాంటీ-డీఎంకే లేదా యువ ఓటు మరింత చీలిపోయే అవకాశం ఉందని రాజకీయ విశ్లేషకులు భావిస్తున్నారు.
అసలు పార్టీ పెడతారా?
ఇప్పటి వరకు ధనుష్ రాజకీయ పార్టీ ప్రకటించలేదు. ఇటీవల వైరల్ అయిన జెండాలు, అభిమాన సంఘాల కార్యకలాపాలపై కూడా ఆయన కుటుంబ సభ్యులు ఎవరూ అధికారికంగా స్పందించలేదు. ప్రస్తుతం ఆయన సినిమా ప్రాజెక్టులపైనే దృష్టి పెట్టినట్లు సమాచారం. అందువల్ల ప్రస్తుతం జరుగుతున్నది ప్రచారమే తప్ప అధికారిక ప్రకటన కాదు. ఐతే ధనుష్ పొలిటికల్ ఎంట్రీ చేస్తే మాత్రం.. తమిళనాడు రాజకీయాలు మరింత రసవత్తరంగా మారడం ఖాయం.
