హైదరాబాద్ నగరంలో రవాణా వ్యవస్థను మరింత సులభతరం చేసేందుకు తెలంగాణ ప్రభుత్వం ప్రవేశపెట్టిన 'ఆర్టీసీ – మెట్రో కామన్ మొబిలిటీ పాస్' నూతన విధానాన్ని ప్రోత్సహించేందుకు డిప్యూటీ సీఎం భట్టి విక్రమార్క, కేబినెట్ మంత్రులు శనివారం మెట్రో రైలులో ప్రయాణించారు. ఉప ముఖ్యమంత్రి భట్టి విక్రమార్కతో పాటు మంత్రులు పొన్నం ప్రభాకర్, వివేక్ వెంకటస్వామి, మహమ్మద్ అజారుద్దీన్‌లు కలిసి సాధారణ ప్రయాణికుల్లా మెట్రో రైలు ఎక్కి ప్రయాణించి కామన్ పాస్ వినియోగాన్ని పరిశీలించారు. ప్రజా రవాణా వ్యవస్థపై ప్రజల్లో అవగాహన పెంచేందుకే ఈ పర్యటన చేపట్టినట్లు నాయకులు వెల్లడించారు.
ఈ సందర్భంగా డిప్యూటీ సీఎం భట్టి విక్రమార్క మాట్లాడుతూ.. నగరంలో నిత్యం ప్రయాణించే పౌరులకు ఆర్టీసీ బస్సులు, మెట్రో రైళ్లలో వేర్వేరుగా టిక్కెట్లు లేదా పాస్‌లు కొనుగోలు చేసే శ్రమ లేకుండా ఈ సమగ్ర కామన్ మొబిలిటీ పాస్‌ను అందుబాటులోకి తెచ్చినట్లు తెలిపారు. ఒక్క పాస్‌తోనే బస్సులతో పాటు మెట్రో రైళ్లలోనూ సునాయాసంగా ప్రయాణించవచ్చని, ఇది ప్రయాణికుల సమయాన్ని, ఆర్థిక భారాన్ని గణనీయంగా తగ్గిస్తుందని ఆయన పేర్కొన్నారు. నగర ప్రజలంతా ఈ నూతన సదుపాయాన్ని వినియోగించుకోవాలని కోరారు.
రవాణా శాఖ మంత్రి పొన్నం ప్రభాకర్ మాట్లాడుతూ.. గ్రేటర్ హైదరాబాద్ పరిధిలో రోజురోజుకూ తీవ్రమవుతున్న ట్రాఫిక్ రద్దీ సమస్యకు పబ్లిక్ ట్రాన్స్‌పోర్ట్ వ్యవస్థను బలోపేతం చేయడమే ఏకైక పరిష్కారమని స్పష్టం చేశారు. ప్రజలు తమ సొంత వాహనాల వినియోగాన్ని తగ్గించి ప్రజా రవాణా వైపు ఆకర్షితులయ్యేలా ఆర్టీసీ, మెట్రో సేవల మధ్య మెరుగైన సమన్వయాన్ని తీసుకువస్తున్నామని చెప్పారు. ప్రయాణికుల అవసరాలకు అనుగుణంగా డైలీ పాస్‌లు, మంత్లీ పాస్‌లతో పాటు ఈ కామన్ కార్డ్ విధానాన్ని ప్రవేశపెట్టినట్లు వివరించారు.
ప్రజా రవాణా వ్యవస్థను మరింత ఆధునీకరించి, ప్రజల ప్రయాణ కష్టాలను తగ్గించడమే తమ ప్రభుత్వ ప్రధాన ధ్యేయమని ప్రజాప్రతినిధులు పునరుద్ఘాటించారు. మెట్రో రైలు ప్రయాణంలో తోటి ప్రయాణికులతో ముచ్చటించిన మంత్రులు, వారి సలహాలు, సూచనలను అడిగి తెలుసుకున్నారు. ఈ కార్యక్రమంలో ఆర్టీసీ, మెట్రో రవాణా శాఖలకు చెందిన పలువురు ఉన్నతాధికారులు పాల్గొన్నారు.
