తెలంగాణ నాయ‌కుల‌కు బీజేపీ షాక్
బీజేపీ జాతీయ టీమ్‌లో నో ప్లేస్
కేంద్ర పెద్ద‌ల వ్యూహ‌మేంటి..?
కేబినెట్‌లో బెర్తులు ప‌క్కానా..?
కేంద్రంలో అధికారంలో ఉన్న బీజేపీ తెలంగాణ నాయ‌కుల‌కు షాకిచ్చింది. తాజాగా ప్రకటించిన జాతీయ కార్య‌వ‌ర్గంలో ఒక్క‌రంటే ఒక్క నాయ‌కుడు కూడా తెలంగాణ నుంచి లేకపోవడం సంచ‌ల‌నంగా మారింది. పార్టీ జాతీయ అధ్యక్షుడు నితిన్ నబీన్ నేతృత్వంలో ప్రకటించిన ఈ కొత్త టీమ్‌లో 65 మంది ఉండగా.. 51 మందికి కొత్తగా అవకాశం దక్కింది. సీనియర్లు, కొత్త ముఖాలకు స‌మాన అవకాశం కల్పిస్తూ రూపొందించిన ఈ జాబితాలో దక్షిణాది రాష్ట్రాలకు ప్రాతినిధ్యం కనిపించినా.. తెలంగాణ మాత్రం ఖాళీగానే మిగిలింది. దీంతో రాష్ట్ర బీజేపీ నేతల్లోనూ, రాజకీయ వర్గాల్లోనూ చర్చ మొదలైంది. తెలంగాణ రాజకీయాల్లో ఇప్పుడు ఇదే అంశం హాట్‌టాపిక్‌గా మారింది.
తెలంగాణకు ఎందుకు ప్రాధాన్యత ఇవ్వలేదు? ఇది బీజేపీ హైకమాండ్ ఉద్దేశపూర్వక నిర్ణయమా? లేక పూర్తిగా సంస్థాగత సమీకరణాల్లో భాగమా? అనే దానిపై పార్టీ వర్గాల్లో విస్తృతంగా చర్చ జరుగుతోంది. తెలంగాణ విషయంలో బీజేపీకి ఇది చిన్న విషయం కాదు. గత లోక్‌సభ ఎన్నికల్లో రాష్ట్రంలో పార్టీ బలమైన ఫలితాలు సాధించింది. ప్రస్తుతం తెలంగాణ నుంచి 8 మంది ఎంపీలు బీజేపీకి ఉన్నారు. కేంద్రంలో కిషన్ రెడ్డి, బండి సంజయ్ వంటి తెలంగాణ నేతలు మంత్రి ప‌ద‌వుల్లో ఉన్నారు. అంతేకాదు.. 2028 అసెంబ్లీ ఎన్నికలను టార్గెట్‌గా పెట్టుకున్న బీజేపీ, తెలంగాణను స్పెషల్ మిషన్‌గా చూస్తున్నట్లు నితిన్ నబీన్ గతంలోనే ప్రకటించారు. అయితే అదే తెలంగాణకు కొత్త జాతీయ టీమ్‌లో చోటు దక్కకపోవడం ఇప్పుడు ఆసక్తిని పెంచుతోంది.
ఇది అవమానమా? లేక వ్యూహాత్మక నిర్ణయమా?
రాజకీయ విశ్లేషకుల అభిప్రాయం ప్రకారం.. జాతీయ పదవులు కేవలం రాష్ట్రాల ప్రాతిపదికన కేటాయించే పోస్టులు కావు. సామాజిక సమీకరణాలు, సంస్థాగత అవసరాలు, ఎన్నికల వ్యూహం, నేతల పనితీరు వంటి అనేక అంశాలను బీజేపీ హైకమాండ్ పరిగణనలోకి తీసుకుంటుంది. కొత్త టీమ్‌లో ఎక్కువగా కొత్త ముఖాలకు అవకాశం ఇవ్వడం కూడా ఈసారి కనిపిస్తున్న కీలక మార్పు.
అయితే మరో కోణం కూడా ఉంది. తెలంగాణ బీజేపీలో గత కొంతకాలంగా అంతర్గత విభేదాలు, నాయకత్వ సమన్వయంపై చర్చ జరుగుతోంది. రాష్ట్రంలో పార్టీని మరింత ఐక్యంగా నడిపించాల్సిన అవసరాన్ని నితిన్ నబీన్ కూడా ప్రస్తావించారు. జీహెచ్‌ఎంసీ సహా రాబోయే ఎన్నికలను దృష్టిలో పెట్టుకుని నేతల మధ్య సమన్వయంపై హైకమాండ్ ప్రత్యేక దృష్టి పెట్టినట్లు నివేదికలు వచ్చాయి. ఈ క్ర‌మంలోనే తాజా నిర్ణయం రాష్ట్ర నాయకత్వానికి ఒక పొలిటిక‌ల్ మెసేజ్ కావ‌చ్చన్న చర్చ జరుగుతోంది.
కేబినెట్‌లో ఛాన్స్ ఇస్తారా?
ఇక్కడే మరో ఆసక్తికరమైన ప్రశ్న తెరపైకి వస్తోంది. పార్టీ సంస్థాగత టీమ్‌లో తెలంగాణకు ప్రాతినిధ్యం లేకపోయినా.. కేంద్ర మంత్రివర్గంలో తెలంగాణకు మరింత ప్రాధాన్యత ఇవ్వబోతున్నారా? అనే అంశంపై ఊహాగానాలు వినిపిస్తున్నాయి.
గతంలోనే కేంద్ర కేబినెట్ పునర్వ్యవస్థీకరణపై ఊహాగానాలు వచ్చిన సమయంలో తెలంగాణకు రెండు మంత్రి పదవులు, ఇతర కీలక పదవులు దక్కే అవకాశం ఉందని రాజకీయ వర్గాల్లో జోరుగా చర్చ జరిగింది. అయితే ఇప్పటికే కిష‌న్‌రెడ్డి, బండి సంజయ్ కేంద్ర మంత్రివర్గంలో ఉన్నారు. ఈ నేప‌థ్యంలో భవిష్యత్ కేబినెట్ మార్పుల్లో రాష్ట్రానికి అదనపు ప్రాతినిధ్యం ఇస్తారా? లేక ఉన్న సమీకరణాలనే కొనసాగిస్తారా? అనేది ఆసక్తికరంగా మారింది.
2028 టార్గెట్.. తెలంగాణను బీజేపీ ఎలా చూస్తోంది?
బీజేపీకి తెలంగాణ కేవలం మరో రాష్ట్రం కాదు. దక్షిణాదిలో పార్టీ విస్తరణకు కీలకమైన రాష్ట్రంగా తెలంగాణను చూస్తోంది. నితిన్ నబీన్ స్వయంగా తెలంగాణను స్పెషల్ మిషన్‌గా పేర్కొనడం దీనికి సంకేతం. అందుకే ఇప్పుడు జాతీయ టీమ్‌లో తెలంగాణకు స్థానం లేకపోవడం కంటే.. తదుపరి నిర్ణయాలు ఎలా ఉంటాయి? అన్నదే అసలు ఆసక్తికరమైన అంశం.
కేంద్ర కేబినెట్ విస్తరణలో తెలంగాణకు అదనపు బెర్తులు వస్తాయా? రాష్ట్ర నేతల్లో ఎవరికి అవకాశం దక్కుతుంది? ఇప్పటికే కేంద్రంలో ఉన్న నేతలకు కీలక శాఖలు దక్కుతాయా? లేక 2028 ఎన్నికలను దృష్టిలో పెట్టుకుని కొత్త నాయకుడిని ముందుకు తీసుకొస్తారా? ప్రస్తుతం వీటన్నింటికీ స్పష్టమైన సమాధానం లేదు.
