AP Farmers: ఆరుగాలం కష్టపడి పండించిన పంట.. సరిగ్గా చేతికొచ్చే టైంకి తీరని విషాదాన్ని మిగిల్చింది. బంగాళాఖాతంలో పుట్టిన తీవ్ర తుఫాను 'అర్నబ్' ఏపీ కోస్తా జిల్లాలపై విలయతాండవం చేసింది. గంటకు 125 నుంచి 135 కిలోమీటర్ల భీకర వేగంతో యానం–అమలాపురం మధ్య తీరం దాటిన ఈ పెను తుఫాను ధాటికి అన్నదాతల బతుకులు అల్లకల్లోలమయ్యాయి. కుండపోత వర్షాలు, ఈదురుగాలుల బీభత్సానికి ఏడు జిల్లాలు అతలాకుతలమవగా, రాష్ట్రవ్యాప్తంగా ఏడుగురు ప్రాణాలు కోల్పోయారు. ప్రాణనష్టంతో పాటు ఊహించని స్థాయిలో జరిగిన ఆస్తి, పంట నష్టం రైతాంగాన్ని కోలుకోలేని స్థితిలోకి నెట్టేసింది.
కళ్లముందే నీటమునిగిన కష్టం..
'అర్నబ్' తుఫాను మిగిల్చిన అత్యంత తీవ్రమైన దెబ్బ వ్యవసాయ రంగానికే తగిలింది. రాష్ట్రవ్యాప్తంగా దాదాపు 70 వేల హెక్టార్లలో వ్యవసాయ పంటలు, మరో 10,500 హెక్టార్లలో ఉద్యాన పంటలు పూర్తిగా దెబ్బతిన్నాయి. ముఖ్యంగా గోదావరి, కృష్ణా డెల్టా ప్రాంతాల్లో మరో నాలుగైదు రోజుల్లో కోతకు రావాల్సిన వరి పైరు నీటమునిగి మొలకలు వచ్చే పరిస్థితి ఏర్పడింది. ఎకరానికి లక్షల్లో పెట్టుబడులు పెట్టి సాగు చేసిన అరటి తోటలు నేలకొరిగాయి. బొప్పాయి, చెరకు పంటలు నేలమట్టమై రైతులను నిలువునా ముంచేశాయి. నాలుగు నెలల పాటు పడిన రెక్కల కష్టం కళ్లముందే నీటిపాలవడంతో రైతులు గుండెలు పగిలేలా విలపిస్తున్నారు.
కోనసీమలో కరెంట్ కష్టాలు.. ఉప్పాడలో ఎగిరిపడ్డ రాళ్లు
తుఫాను తీరం దాటిన కోనసీమ జిల్లా పరిస్థితి మరీ దారుణంగా మారింది. ఒక్క జిల్లా పరిధిలోనే దాదాపు 6 వేల విద్యుత్ స్తంభాలు విరిగిపడటంతో వందలాది పల్లెలు ఇంకా చీకట్లోనే మగ్గుతున్నాయి. రహదారులపై భారీ చెట్లు నేలకూలి రాకపోకలు నిలిచిపోయాయి. అటు కాకినాడ జిల్లా ఉప్పాడ తీరంలో సముద్రం ఉగ్రరూపం దాల్చి ముందుకు చొచ్చుకొచ్చింది. రాకాసి అలల ధాటికి తీర రక్షణ కోసం వేసిన భారీ బండరాళ్లు ఎగిరిపడి ఇళ్లపై పడ్డాయంటే విధ్వంసం ఏ స్థాయిలో జరిగిందో ఊహించుకోవచ్చు. నరసాపురం వశిష్ట గోదావరిలో కొట్టుకుపోతున్న పడవలను మత్స్యకారులు ప్రాణాలకు తెగించి ఒడ్డుకు చేర్చారు. విశాఖ నుంచి సింగపూర్ వెళ్లాల్సిన ఓ భారీ కార్గో నౌక దారితప్పి అంతర్వేది తీరానికి కొట్టుకురాగా, విశాఖ హార్బర్‌లో అలల తాకిడికి ఐదు బోట్లు మునిగిపోయాయి.
ఎక్కడికక్కడ స్తంభించిన రవాణా వ్యవస్థ
తుఫాను తీవ్రతతో ప్రజా రవాణా పూర్తిగా పడకేసింది. ప్రతికూల వాతావరణం వల్ల ఏపీకి రాకపోకలు సాగించాల్సిన 33 విమాన సర్వీసులు రద్దయ్యాయి. కొత్తవలస–కిరండోల్ మార్గంలో రైల్వే ట్రాక్ కింద మట్టి కొట్టుకుపోవడంతో పాటు, విజయవాడ మీదుగా నడిచే 50కి పైగా రైళ్లను రద్దు చేయాల్సి వచ్చింది. 126 కిలోమీటర్ల మేర రహదారులు కోతకు గురికావడం, చెట్లు కూలడంతో బస్సులు డిపోలకే పరిమితమయ్యాయి.
పరిహారమే ప్రాణాధారం.. బాబు సర్కార్‌కు పరీక్ష
తుఫాను తీవ్రతను దృష్టిలో ఉంచుకుని నష్టాన్ని అంచనా వేసేందుకు వెంటనే కేంద్ర బృందాన్ని పంపాలని ముఖ్యమంత్రి చంద్రబాబు నాయుడు కేంద్ర హోంమంత్రి అమిత్ షాకు లేఖ రాశారు. 14 జిల్లాల్లో ఎన్డీఆర్ఎఫ్, ఎస్డీఆర్ఎఫ్ బలగాలు ముమ్మరంగా సహాయక చర్యలు చేపడుతున్నాయి. లోతట్టు ప్రాంతాల నుంచి దాదాపు 28 వేల మందికి పైగా ప్రజలను సురక్షిత ప్రాంతాలకు తరలించారు. విద్యుత్, తాగునీరు వంటి కనీస అవసరాలను పునరుద్ధరించే పనిలో యంత్రాంగం నిమగ్నమైంది. అయితే, పెట్టిన పెట్టుబడులన్నీ పోయి కట్టుబట్టలతో మిగిలిన అన్నదాతలను ప్రభుత్వం ఏ మేరకు ఆదుకుంటుందనేది చూడాలి.
