భారత క్రికెట్ జట్టు సీనియర్ బ్యాటర్ అజింక్యా రహానే అన్ని రకాల క్రికెట్కు వీడ్కోలు పలికిన అనంతరం తన మనసులోని భావోద్వేగాలను పంచుకున్నాడు. సుదీర్ఘ కాలం పాటు భారత టెస్టు జట్టులో నమ్మకమైన మిడిల్ ఆర్డర్ బ్యాటర్గా సేవలు అందించిన రహానే, 38 ఏళ్ల వయసులో ఆట నుంచి తప్పుకుంటున్నట్లు ప్రకటించాడు. ముఖ్యంగా విదేశీ పర్యటనల్లో స్వింగ్ బౌలింగ్ను సమర్థంగా ఎదుర్కొంటూ జట్టుకు ఎన్నో గుర్తుండిపోయే విజయాలను అందించిన రహానే నిర్ణయంపై క్రికెట్ ప్రపంచం ప్రశంసల జల్లు కురిపించింది.
సోషల్ మీడియాలో తన రిటైర్మెంట్ వీడియోను పోస్ట్ చేసిన కొన్ని క్షణాల్లోనే క్రికెట్ దిగ్గజం సచిన్ టెండూల్కర్ నుంచి మొదటి ఫోన్ కాల్ వచ్చిందని రహానే వెల్లడించాడు. రహానే ఇంకా కొన్నాళ్ల పాటు ఆడతాడని తాను భావించానని సచిన్ పేర్కొనగా, ఎలాంటి పశ్చాత్తాపం లేకుండా పూర్తి సంతృప్తితోనే ఆటను ముగిస్తున్నానని చెప్పినట్లు తెలిపాడు. సచిన్తో పాటు ఇర్ఫాన్ పఠాన్ ఫోన్ చేశారని... విరాట్ కోహ్లీ, రోహిత్ శర్మ, జస్ప్రీత్ బుమ్రా, ఛతేశ్వర్ పుజారాలు మెసేజ్ల ద్వారా తమ శుభాకాంక్షలు తెలియజేశారని పేర్కొన్నాడు.
వీడియో రికార్డింగ్ పూర్తి చేసిన తర్వాత తాను తీవ్ర భావోద్వేగానికి గురై బోరున ఏడ్చేశానని రహానే తెలిపాడు. ఇన్నేళ్లుగా ప్రాణంగా ప్రేమించిన ఆటకు ఇకపై దూరమవుతున్నాననే నిజాన్ని జీర్ణించుకోవడం చాలా కష్టంగా అనిపించిందని విలపించాడు. రికార్డింగ్ సాగుతున్నంత సేపూ ఆ ఆలోచనే తనను వెంటాడిందని, రికార్డింగ్ పూర్తవగానే కన్నీళ్లు ఆపుకోలేకపోయానని తన అనుభవాన్ని పంచుకున్నాడు.
తన సుదీర్ఘ కెరీర్లో విరాట్ కోహ్లీ, ఛతేశ్వర్ పుజారాలతో ఉన్న ప్రత్యేక అనుబంధాన్ని ఈ సందర్భంగా రహానే గుర్తుచేసుకున్నాడు. 2015లో టెస్టు ర్యాంకింగ్స్లో 6 లేదా 7వ స్థానంలో ఉన్న భారత జట్టును అగ్రస్థానానికి చేర్చడమే లక్ష్యంగా తామంతా కష్టపడ్డామని చెప్పాడు. ఎన్నో సవాళ్లను ఎదుర్కొంటూ, ఒకరి నుంచి ఒకరు నేర్చుకుంటూ సాగించిన ఆ ప్రయాణం టీమ్ ఇండియా టెస్టు చరిత్రలో ఎప్పటికీ గుర్తుండిపోతుందని స్పష్టం చేశాడు.
