అమెరికాలో అధ్యక్షుడిగా డొనాల్డ్ ట్రంప్ నాయకత్వంలోని రిపబ్లికన్ పార్టీకి మిడ్‌టర్మ్ ఎన్నికల ఫలితాలు ఊహించని షాక్ ఇచ్చాయి. యూఎస్ కాంగ్రెస్‌లోని ప్రతినిధుల సభ (హౌస్ ఆఫ్ రిప్రజెంటేటివ్స్), సెనేట్ రెండింటిలోనూ డెమోక్రటిక్ పార్టీ అఖండ విజయం సాధించి స్పష్టమైన మెజారిటీని సొంతం చేసుకుంది. ఈ పరిణామంతో వాషింగ్టన్ రాజకీయాల్లో సమీకరణాలు పూర్తిగా మారిపోగా, వైట్ హౌస్‌లో ఓటమికి బాధ్యత ఎవరిదనే అంశంపై అంతర్గత విభేదాలు భగ్గుమన్నాయి.
ముఖ్యంగా ఇరాన్‌పై సైనిక చర్య, యుద్ధ విషయమై అధ్యక్షుడు ట్రంప్, ఉపాధ్యక్షుడు జేడీ వాన్స్ మధ్య భిన్నాభిప్రాయాలు వ్యక్తమవుతుండటం రాజకీయ వర్గాల్లో చర్చనీయాంశమైంది. ఎన్నికల ఫలితాల ప్రకారం.. రిపబ్లికన్లు ఉభయ సభల్లోనూ తమ పట్టును కోల్పోయారు. ప్రతినిధుల సభలో మెజారిటీకి 218 స్థానాలు అవసరం కాగా, డెమోక్రాట్లు 228 స్థానాల్లో నెగ్గి ఆధిపత్యాన్ని ప్రదర్శించారు. రిపబ్లికన్లు కేవలం 139 సీట్లకే పరిమితమయ్యారు.
ఇక 100 స్థానాలున్న సెనేట్‌లో మెజారిటీ మార్కు (51) దాటి డెమోక్రాట్లు 54 స్థానాలు కైవసం చేసుకోగా, రిపబ్లికన్లకు 44 స్థానాలే దక్కాయి. దీనివల్ల రాబోయే కాలంలో ట్రంప్ తన కీలక బిల్లులు, విధానపరమైన నిర్ణయాలను కాంగ్రెస్‌లో ఆమోదించుకోవడం అత్యంత క్లిష్టంగా మారనుంది. 36 రాష్ట్రాల్లో జరిగిన గవర్నర్ ఎన్నికల్లోనూ డెమోక్రాట్లు 22 చోట్ల విజయం సాధించి బలమైన ఆధిపత్యాన్ని ప్రదర్శించారు. రిపబ్లికన్ల ఈ ఘోర పరాజయానికి ఇరాన్‌పై జరిపిన యుద్ధమే ప్రధాన కారణమని ఉపాధ్యక్షుడు జేడీ వాన్స్ బహిరంగంగా ఆక్షేపించారు.
యుద్ధం కారణంగానే రాబోయే ఆరేళ్ల పాటు సెనేట్‌లో పార్టీ పట్టు కోల్పోవాల్సి వచ్చిందని ఆయన సోషల్ మీడియా వేదికగా ఆవేదన వ్యక్తం చేశారు. అయితే ట్రంప్ మాత్రం తన సైనిక చర్యను సమర్థించుకుంటూ, ఇరాన్ విషయంలో తీసుకున్న నిర్ణయం దేశ హితం దృష్ట్యా సరైనదేనని స్పష్టం చేశారు. యుద్ధంతో పాటు దేశంలో పెరిగిన ద్రవ్యోల్బణం, పాలనాపరమైన సమస్యలు కూడా ఓటర్ల తీర్పును తీవ్రంగా ప్రభావితం చేశాయని రాజకీయ విశ్లేషకులు భావిస్తున్నారు.
