Death Sentence: ఉత్తరప్రదేశ్ లోని ముజఫర్ నగర్ ఫాస్ట్ ట్రాక్ కోర్టు సెషన్స్ జడ్జి రవికుమార్ దివాకర్ సంచలన తీర్పులకు కేరాఫ్ గా నిలుస్తున్నారు. మరోసారి ఆయన వార్తల్లో ప్రముఖంగా నిలిచారు. హత్య, అపహరణ, దోపిడీ వంటి 10 కేసులకు సంబంధించి సంచలన తీర్పునిచ్చారు రవికుమార్. ఈ కేసుల్లో దోషులుగా తేలిన 22 మందికి మరణశిక్ష విధించారాయన. 4 నెలల వ్యవధిలోనే రవికుమార్ ఈ తీర్పులు ఇవ్వడం గమనార్హం.
అయితే ఈ ఉరిశిక్ష తుది తీర్పు కాదని.. హైకోర్టు ధృవీకరించిన తర్వాతే అమలు చేయాల్సి ఉంటుందని న్యాయ నిపుణులు తెలిపారు. ఇక, 2022లో వారణాసిలోని జ్ఞానవాపీ మసీదులో వీడియో సర్వే నిర్వహించాలని ఆదేశాలు జారీ చేయడం ద్వారా గతంలో వార్తల్లో నిలిచారు అదనపు జిల్లా, సెషన్స్ న్యాయమూర్తి రవి కుమార్ దివాకర్. కఠినమైన తీర్పులకు ఆయన ప్రసిద్ధి చెందారు.
ఎవరీ రవికుమార్ దివాకర్..
లక్నోకు చెందిన 46 ఏళ్ల రవికుమార్ 2009లో అజమ్‌గఢ్‌లో అదనపు సివిల్ జడ్జిగా తన ప్రస్థానాన్ని ప్రారంభించారు. ఆ తర్వాత, 2015 మేలో సుల్తాన్‌పూర్‌లో సివిల్ జడ్జిగా పని చేశారు. సుమారు ఐదు నెలల అనంతరం జ్యుడీషియల్ మేజిస్ట్రేట్‌గా పదోన్నతి పొందారు. BCom, LLM పట్టాలు కలిగిన న్యాయమూర్తి దివాకర్. నవంబర్ 2025 నుండి ముజఫర్‌నగర్‌లో అదనపు జిల్లా, సెషన్స్ న్యాయమూర్తిగా విధులు నిర్వర్తిస్తున్నారు.
ఆయన ఇటీవల వెలువరించిన తీర్పులు..
12ఏళ్ల నాటి హత్య కేసులో నలుగురికి మరణశిక్ష
12ఏళ్ల నాటి ఒక హత్య కేసులో నలుగురికి మరణశిక్ష విధిస్తూ ఆగస్టు 13న తీర్పు ఇచ్చారు. పవన్ కుమార్ హత్యకు సంబంధించి దోషులుగా తేలిన రామ్‌వీర్, రాజీవ్, రాహుల్, హరేందర్ కుమార్‌లకు జరిమానాగా రూ.1.70 లక్షలు చెల్లించాలని కూడా ఆయన ఆదేశించారు. షామ్లీ జిల్లాలో 2014 జూలై 14న పాత కక్షల కారణంగా జరిగిన దాడిలో, నిందితులు కుమార్ ఇంట్లోకి చొరబడి కాల్పులు జరిపారు. ఈ కాల్పుల్లో కుమార్ మరణించగా, ఆయన సోదరుడు అశోక్ కుమార్ బుల్లెట్ గాయాలకు గురయ్యారు.
1999లో కలప వ్యాపారి హత్య కేసులో మరణశిక్ష
దాదాపు 27 ఏళ్ల క్రితం డబ్బు కోసం కలప వ్యాపారిని అపహరించి, హత్య చేసిన వ్యక్తికి ఆగస్టు 12న మరణశిక్ష విధించారు. 1999లో సలీమ్ అనే వ్యక్తిని హత్య చేసిన కేసులో షానవాజ్ అనే వ్యక్తిని న్యాయస్థానం దోషిగా నిర్ధారించింది. రూ.5 లక్షల డబ్బు కోసం సలీమ్‌ను అపహరించి డిసెంబర్ 9న చాపర్ అటవీ ప్రాంతంలో గొంతు కోసి హత్య చేశారు.
2011 నాటి రైతు హత్య కేసులో నలుగురికి మరణశిక్ష
షామ్లీ జిల్లాలో 2011లో దోపిడీ ప్రయత్నంలో ఒక రైతును హత్య చేసినందుకు జూలై 17న నలుగురికి రవికుమార్ దివాకర్ మరణశిక్ష విధించారు. ఆగస్టు 20, 2011న రాజ్ సింగ్ అనే రైతు తన స్నేహితుడు బిజేంద్రతో కలిసి మోటార్‌సైకిల్‌పై తన సోదరి ఇంటికి వెళ్తుండగా, గుర్తు తెలియని దుండగులు వారిని అడ్డుకున్నారు. నిందితులు వారిని దోచుకోవడానికి ప్రయత్నించారు. రాజ్ సింగ్ ప్రతిఘటించడంతో అతన్ని కాల్చి చంపారు.
