తెలంగాణలో ఇక దూకుడే
2028 ఎన్నికలే బీజేపీ టార్గెట్
హస్తిన వేదికగా రాష్ట్ర నేతలకు దిశానిర్దేశం
బీజేపీ మాస్టర్ ప్లాన్ ఏంటి..?
తెలంగాణ రాజకీయాల్లో బీజేపీ ఇక ప్రయోగాలు చేసే స్థాయి నుంచి.. అధికారాన్ని టార్గెట్ చేసే స్థాయికి వెళ్లాలని డిసైడ్ అయిందా? కాంగ్రెస్ ప్రభుత్వాన్ని ఢీకొట్టడం ఒక ఎత్తయితే.. బీఆర్ఎస్ను ప్రధాన ప్రత్యర్థి స్థానంలో నుంచి పక్కకు నెట్టి, తానే తెలంగాణలో ప్రత్యామ్నాయ శక్తిగా ఎదగాలన్నది పార్టీ అసలు వ్యూహమా? తాజాగా ఢిల్లీలో జరిగిన కీలక సమావేశం తర్వాత ఈ ప్రశ్నలు తెలంగాణ రాజకీయాల్లో హాట్టాపిక్గా మారాయి.
ఇప్పటివరకు తెలంగాణలో బీజేపీకి బలమైన ఓటు బ్యాంక్ ఉంది. ఐతే.. రాష్ట్రవ్యాప్తంగా పార్టీని అధికారంలోకి తీసుకురావడానికి కావాల్సిన సంస్థాగత బలం మాత్రం లేదు. అంతేకాదు నియోజకవర్గ స్థాయి నాయకత్వం, క్షేత్రస్థాయి నెట్వర్క్ ఇంకా పూర్తిస్థాయిలో సిద్ధం కాలేదన్నది ఆ పార్టీ అధినాయకత్వం అంచనా. అందుకే వచ్చే ఎన్నికలకు చివరి నిమిషంలో వ్యూహాలు మార్చడం కాకుండా.. ఇప్పటి నుంచే పార్టీని ఎలక్షన్ మోడ్లోకి తీసుకెళ్లాలని ఢిల్లీ పెద్దలు నిర్ణయించినట్టు తెలుస్తోంది.
అసలు టార్గెట్ కాంగ్రెస్ ఒక్కటే కాదు!
బీజేపీ భవిష్యత్ ప్లాన్ను కేవలం కాంగ్రెస్ వ్యతిరేక రాజకీయాలుగా చూడటం తప్పే అవుతుంది. ఎందుకంటే అధికార కాంగ్రెస్ను టార్గెట్ చేస్తూనే.. ప్రధాన ప్రతిపక్షంగా ఉన్న బీఆర్ఎస్ ఓటు బ్యాంక్ను కూడా తనవైపు తిప్పుకోవాలని బీజేపీ చూస్తున్నట్టు సంకేతాలు కనిపిస్తున్నాయి.
అందుకే మండలాలు, నియోజకవర్గాలు, జిల్లాల వారీగా ఇతర పార్టీల్లోని బలమైన నాయకులను గుర్తించి బీజేపీలోకి తీసుకురావడంపై ప్రత్యేక దృష్టి పెట్టాలని ఆదేశాలు వచ్చినట్టు సమాచారం. ముఖ్యంగా బీఆర్ఎస్లో రాజకీయంగా ప్రభావం ఉన్న నాయకులు, స్థానికంగా బలమైన క్యాడర్ ఉన్న నేతలపై ఫోకస్ పెట్టే అవకాశం ఉంది.
అంటే ఒక్క ఓటును పెంచుకోవడం కాదు.. ఒక నాయకుడితో పాటు అతని క్యాడర్ను కూడా బీజేపీలోకి తీసుకురావడం అనేది భవిష్యత్ వ్యూహంలో కీలక భాగంగా మారబోతోందన్నమాట.
మీరు చేస్తారా.. మమ్మల్ని చేయమంటారా..?
ఇక్కడే ఢిల్లీ సమావేశం అసలు ప్రాధాన్యతను సంతరించుకుంది. రాష్ట్ర పార్టీని ఎన్నికల యుద్ధానికి సిద్ధం చేసే బాధ్యతను మీరు తీసుకుంటారా లేక మమ్మల్నే తీసుకోమంటారా అని హైకమాండ్ ప్రశ్నించిందట. దీనిపై పార్టీ వర్గాల్లో పెద్ద చర్చ జరుగుతోంది.
అంటే ఇకపై ప్లాన్ ఉంటే సరిపోదు.. దానికి టైమ్లైన్ ఉండాలి. ఎవరు ఏ నియోజకవర్గాన్ని చూసుకోవాలి? ఎక్కడ ఏ నాయకుడిని పార్టీలోకి తీసుకురావాలి? ఎక్కడ ప్రజా ఉద్యమం చేయాలి? ఏ సమస్యను రాజకీయంగా పెద్ద అంశంగా మార్చాలి? అన్నదానిపై స్పష్టమైన యాక్షన్ ప్లాన్ ఉండాలని ఢిల్లీ కోరుకుంటున్నట్టు తెలుస్తోంది. ఒకవేళ రాష్ట్ర నాయకత్వం ఆశించిన స్థాయిలో పనిచేయకపోతే.. జాతీయ నాయకత్వం తన ప్రతినిధుల ద్వారా కొన్ని వ్యవహారాలను నేరుగా పర్యవేక్షించే అవకాశమూ ఉందన్న సంకేతాలు కనిపిస్తున్నాయి.
3 నెలలకోసారి హైకమాండ్ పెద్దల రాక..
ఇకపై ప్రతి మూడు నెలలకు ఒకసారి తెలంగాణకు వచ్చి పార్టీ పరిస్థితిని సమీక్షిస్తానని బీజేపీ జాతీయ అధ్యక్షుడు నితిన్ నబీన్ చెప్పినట్టు సమాచారం. ఇది సాధారణ పర్యటనగా చూడాల్సిన అవసరం లేదన్నది రాజకీయ విశ్లేషకుల అభిప్రాయం.
ఎందుకంటే పార్టీ సంస్థాగత బలం ఎంత పెరిగింది? ఎంతమంది కొత్త నాయకులు పార్టీలోకి వచ్చారు? ఏ నియోజకవర్గంలో పార్టీ బలపడింది? ప్రజా సమస్యలపై ఎలాంటి పోరాటాలు చేసింది? కాంగ్రెస్పై వ్యతిరేకతను బీజేపీకి అనుకూలంగా మార్చుకోగలిగిందా? వంటి అంశాలను నిరంతరం ట్రాక్ చేయాలని జాతీయ నాయకత్వం భావిస్తున్నట్టు తెలుస్తోంది. అంటే తెలంగాణను బీజేపీ ఇప్పుడు ‘మిషన్ స్టేట్’గా చూస్తోందన్న సంకేతాలు స్పష్టంగా కనిపిస్తున్నాయి.
ప్రజా ఉద్యమాలు.. బీజేపీకి కొత్త ఆయుధం
కేవలం ఎన్నికల సమయంలో ప్రచారం చేయడం ద్వారా అధికారంలోకి రావడం సాధ్యం కాదని బీజేపీకి అర్థమైనట్టుగా కనిపిస్తోంది. అందుకే ప్రజా సమస్యలను పట్టుకుని నిరంతరం పోరాటాలు చేయాలని జాతీయ నాయకత్వం రాష్ట్ర నేతలకు సూచించినట్టు సమాచారం.
పాదయాత్రలు, బస్సు యాత్రలు, నియోజకవర్గాల వారీగా ప్రజా సమస్యలపై ఉద్యమాలు.. ఇలా బీజేపీని నిరంతరం ప్రజల్లో కనిపించే పార్టీగా మార్చే ప్రయత్నం జరగనుంది. ఇక్కడ వ్యూహం చాలా స్పష్టంగా ఉంది. కాంగ్రెస్ ప్రభుత్వంపై ప్రజల్లో అసంతృప్తి ఉంటే.. దానికి రాజకీయ వేదిక బీజేపీ కావాలి. అదే సమయంలో బీఆర్ఎస్ బలహీనపడితే ఆ ఖాళీని కూడా బీజేపీనే భర్తీ చేయాలి.
జనసేనతో పొత్తు ఎందుకు వద్దంటోంది?
ఇక తెలంగాణలో జనసేనతో సహా ఏ పార్టీతోనూ పొత్తు ఉండబోదని రాష్ట్ర బీజేపీ అధ్యక్షుడు ఎన్. రాంచందర్రావు ప్రకటించడం కూడా ఈ వ్యూహంలో భాగంగానే కనిపిస్తోంది. జీహెచ్ఎంసీ, సైబరాబాద్, మల్కాజిగిరి కార్పొరేషన్ ఎన్నికల్లోనూ బీజేపీ ఒంటరిగానే పోటీ చేస్తుందని ఆయన స్పష్టం చేశారు.
దీని వెనుక ఒక లెక్క ఉండొచ్చు. తెలంగాణలో బీజేపీ తన సొంత ఓటు బేస్ను నిర్మించుకోవాలని చూస్తున్నప్పుడు.. పొత్తులపై ఆధారపడకుండా ప్రతి నియోజకవర్గంలో పార్టీకి సొంత క్యాడర్, సొంత నాయకత్వం, సొంత ఓటు బ్యాంక్ తయారు చేయాలన్నది లక్ష్యం కావచ్చు.
2028 నాటికి బీజేపీ ఏం కోరుకుంటోంది?
పరిణామాలన్నింటినీ చూస్తే.. తెలంగాణలో బీజేపీ భవిష్యత్ ప్లాన్ దాదాపు నాలుగు దశల్లో కనిపిస్తోంది. మొదటిది.. సంస్థాగత విస్తరణ. గ్రామం నుంచి జిల్లా వరకు పార్టీని బలోపేతం చేయడం.
రెండోది.. రాజకీయ చేరికలు. ముఖ్యంగా బీఆర్ఎస్, కాంగ్రెస్లోని ప్రభావవంతమైన నాయకులను నియోజకవర్గాల వారీగా బీజేపీలోకి తీసుకురావడం.
మూడోది.. ప్రజా ఉద్యమాలు. ప్రభుత్వ వైఫల్యాలు, ప్రజా సమస్యలను గుర్తించి నిరంతరం కాంగ్రెస్ను టార్గెట్ చేయడం.
నాలుగోది.. ఎన్నికల యంత్రాంగం. ప్రతి నియోజకవర్గంలో ఇప్పటి నుంచే అభ్యర్థులు, నాయకత్వం, క్యాడర్, ఓటర్లపై పని చేయడం.
అంటే ఎన్నికలకు ఆరు నెలల ముందు బీజేపీ ప్రచారం మొదలు పెట్టడం కాదు.. ఎన్నికలు ఎప్పుడు వచ్చినా సిద్ధంగా ఉండే స్థాయికి పార్టీని తీసుకెళ్లడమే అసలు లక్ష్యంగా కనిపిస్తోంది.
అయితే ఈ ప్లాన్ ఎంతవరకు వర్కౌట్ అవుతుంది? కాంగ్రెస్ తన ప్రభుత్వ వ్యతిరేకతను తగ్గించుకోగలిగితే ఏం జరుగుతుంది? బీఆర్ఎస్ తిరిగి పుంజుకుంటే బీజేపీ పరిస్థితి ఏంటి? ముఖ్యంగా పార్టీలోని అంతర్గత విభేదాలను అధిష్టానం ఎలా కంట్రోల్ చేస్తుంది? అన్నదే కీలకం.
ఎందుకంటే తెలంగాణలో అధికారాన్ని సాధించాలంటే బీజేపీకి కేవలం ఢిల్లీ నాయకత్వం బలం సరిపోదు. నియోజకవర్గాల్లో బలమైన నాయకులు, గ్రామాల్లో క్యాడర్, ప్రజల్లో నిరంతర పోరాటం, పార్టీలో అంతర్గత ఐక్యత.. ఈ నాలుగు కలిసి పనిచేయాలి.
ఇక ముందు తెలంగాణలో కాంగ్రెస్ వర్సెస్ బీఆర్ఎస్ రాజకీయమే కాదు.. కాంగ్రెస్-బీఆర్ఎస్ మధ్య ఉన్న స్పేస్ను పూర్తిగా ఆక్రమించడమే బీజేపీ అసలు టార్గెట్ కాబోతోందా? అన్నది రాబోయే రోజుల్లో చూడాలి.
