తెలంగాణ వ్యాప్తంగా ఎంతో వైభవంగా జరిగిన వినాయక నిమజ్జన ఉత్సవాల్లో తీవ్ర విషాదకర సంఘటనలు చోటుచేసుకున్నాయి. నిమజ్జన ప్రక్రియలో వేర్వేరు ప్రాంతాల్లో జరిగిన ప్రమాదాల కారణంగా ఒక ఎస్ఐ సహా మొత్తం 13 మంది ప్రాణాలు కోల్పోగా, మరో 26 మంది తీవ్రంగా గాయపడ్డారని రాష్ట్ర డైరెక్టర్ జనరల్ ఆఫ్ పోలీస్ (DGP) సీవీ ఆనంద్ వెల్లడించారు. బాధితులకు తక్షణ వైద్య సదుపాయాలు అందిస్తున్నట్లు తెలిపారు.
ఈ ఏడాది రాష్ట్రంలో గతంలో ఎన్నడూ లేని రీతిలో గణేష్ ఉత్సవాలు అత్యంత వైభవంగా జరిగాయని డీజీపీ వివరించారు. రాష్ట్రవ్యాప్తంగా బహిరంగ ప్రదేశాల్లో (పబ్లిక్ ప్లేసెస్) మొత్తం 1,24,000 విగ్రహాలను ప్రతిష్టించగా, ఇళ్లు, అపార్ట్మెంట్లు,గేటెడ్ కమ్యూనిటీలలో కలిపి సుమారు 3.5లక్షల నుంచి 4 లక్షల వరకు విగ్రహాలను పూజించినట్లు గణాంకాలను వెల్లడించారు. శాంతిభద్రతలను కాపాడేందుకు వేలాది మంది పోలీసు సిబ్బంది అహర్నిశలు శ్రమించారని పేర్కొన్నారు.
అయితే, ప్రతిష్ఠాత్మకంగా సాగిన ఈ ఉత్సవాల్లో పలుచోట్ల నీట మునిగిపోవడం, విద్యుదాఘాతం, వాహన ప్రమాదాల వల్ల ప్రాణనష్టం జరగడం విచారకరమని ఆవేదన వ్యక్తం చేశారు. విధి నిర్వహణలో ఉంటూ ప్రాణాలు కోల్పోయిన ఎస్ఐ కుటుంబానికి పోలీసు శాఖ పూర్తిస్థాయిలో అండగా ఉంటుందని డీజీపీ భరోసా ఇచ్చారు. గాయపడిన వారికి మెరుగైన వైద్యం అందించేలా చర్యలు తీసుకుంటున్నామని స్పష్టం చేశారు.
వందలాది కిలోమీటర్ల మేర సాగిన శోభాయాత్రలు, లక్షలాది మంది భక్తుల భాగస్వామ్యం నడుమ నిమజ్జన ప్రక్రియ ముగిసిందని, ప్రమాదాలు జరగకుండా భవిష్యత్తులో మరిన్ని ముందస్తు భద్రతా చర్యలు తీసుకుంటామని ఆయన పేర్కొన్నారు. ప్రాణాలు కోల్పోయిన వారి కుటుంబాలకు ఆయన తన ప్రగాఢ సానుభూతిని తెలిపారు.
