భారతదేశ చరిత్ర, ఆధ్యాత్మికత, సాంస్కృతిక వారసత్వంలో మహిళలు ఎల్లప్పుడూ మహత్తర మార్పునకు మార్గదర్శకులుగా నిలుస్తూ దేశాన్ని ప్రగతి పథంలో ముందుకు నడిపిస్తున్నారని లోక్సభ స్పీకర్ ఓం బిర్లా కొనియాడారు. హర్యానాలోని ఫరీదాబాద్లో జాతీయ మహిళా కమిషన్ (NCW) ఆధ్వర్యంలో మహిళా శాసనసభ్యుల కోసం నిర్వహించిన రెండు రోజుల జాతీయ సామర్థ్య పెంపుదల వర్క్షాప్లో ఆయన ముఖ్యఅతిథిగా పాల్గొని ప్రసంగించారు. మహిళల్లో ఉన్న సహజసిద్ధమైన నాయకత్వ పటిమను మరింత బలోపేతం చేసేందుకు, వారికి సమాజంలో తగిన ప్రోత్సాహం, సరైన అవకాశాలు కల్పించాల్సిన బాధ్యత అందరిపై ఉందన్నారు.
ఈ సందర్భంగా ఓం బిర్లా మాట్లాడుతూ.. స్వాతంత్ర్య పోరాటం నుంచి దేశ పునర్నిర్మాణం వరకు, రాజ్యాంగ రూపకల్పన నుంచి నేటి ఆధునిక భారత అభివృద్ధి వరకు మహిళల పాత్ర ఎంతో విశిష్టమైనదని స్పష్టం చేశారు. దేశ సంస్థాగత నిర్మాణం, సాంస్కృతిక సంప్రదాయాలలో మహిళలు అందించిన సహకారం, నాయకత్వ ముద్ర ఎన్నటికీ మరువలేనివని పేర్కొన్నారు. ప్రస్తుత కాలంలో మహిళలు కేవలం మార్పుకు సంకేతంగా నిలవడమే కాకుండా, వివిధ రంగాలలో అపూర్వమైన విజయాలు సాధిస్తూ తమ ప్రతిభను నిరూపించుకుంటున్నారని ఆనందం వ్యక్తం చేశారు.
సమాజంలో మహిళా సాధికారత సాధించాలంటే వారి కోసం నిరంతరం సామర్థ్య పెంపుదల (Capacity Building) శిక్షణలు, వర్క్షాప్లు నిర్వహించడం అత్యంత ఆవశ్యకమని స్పీకర్ నొక్కి చెప్పారు. ప్రజాప్రతినిధులుగా ఎన్నికైన మహిళా శాసనసభ్యులు ఇలాంటి శిక్షణా కార్యక్రమాల ద్వారా చట్టసభల పనితీరు, నూతన అంశాలు నేర్చుకుని తమ తమ నియోజకవర్గాల ప్రజలకు మరింత సమర్థవంతంగా సేవలు అందించడానికి ఇది దోహదపడుతుందని అభిప్రాయపడ్డారు.
ఈ సందర్భంగా మహిళా శాసనసభ్యుల కోసం ఇలాంటి మహత్తర కార్యక్రమాన్ని నిర్వహించిన జాతీయ మహిళా కమిషన్ ఛైర్పర్సన్ విజయా రహాత్కర్ను ఓం బిర్లా ప్రత్యేకంగా అభినందించారు. ఇలాంటి సామర్థ్య పెంపుదల వర్క్షాప్లు మహిళా నాయకులలో నూతన స్ఫూర్తిని నింపుతాయని, ప్రజాసేవలో వారిని మరింత క్రియాశీలకంగా తీర్చిదిద్దుతాయని ఆశాభావం వ్యక్తం చేశారు.
