దేశ 80వ స్వాతంత్య్ర దినోత్సవ శుభవేళ భారత ప్రధాని నరేంద్ర మోదీ ఎర్రకోట ప్రాకారాల నుంచి జాతిని ఉద్దేశించి ప్రసంగించారు. భారత్‌కు స్వాతంత్య్రం సిద్ధించి వంద ఏళ్లు పూర్తయ్యే 2047 నాటికి దేశాన్ని పూర్తిస్థాయి 'అభివృద్ధి చెందిన దేశంగా' (వికసిత భారత్) తీర్చిదిద్దడమే తమ ప్రభుత్వ ప్రధాన లక్ష్యమని ఆయన ఉద్ఘాటించారు. దేశం సరికొత్త ఆత్మవిశ్వాసంతో, అపూర్వమైన వేగంతో ముందుకు సాగుతోందని పేర్కొన్నారు. మహనీయులకు, స్వాతంత్య్ర సమరయోధులకు, మహాత్మా గాంధీకి ఈ సందర్భంగా ఘన నివాళులర్పించారు.
ఈ చారిత్రాత్మక వేడుకల్లో భాగంగా ఎర్రకోట నుంచి మొదటిసారిగా 'వందేమాతరం' గీతం ప్రతిధ్వనించడం అత్యంత ప్రాధాన్యత సంతరించుకుందని ప్రధాని వ్యాఖ్యానించారు. ప్రస్తుతం ప్రతీ ఒక్కరి హృదయంలో జాతీయ భావం, ప్రతి ఇంటిపైనా త్రివర్ణ పతాకం సగర్వంగా ఎగురుతున్నాయని ఆనందం వ్యక్తం చేశారు. గతంలో పెద్ద కలలు కన్నా ఆశించిన ప్రగతి సాధించలేకపోయామని, కానీ ఇప్పుడు 140కోట్ల భారతీయుల పట్టుదల, సంకల్పశక్తి ముందు ఏ ఆటంకాలూ నిలబడలేవని ఆయన స్పష్టం చేశారు.
దేశ ఆర్థిక వ్యవస్థ ప్రగతిని వివరిస్తూ.. ఒకప్పుడు ప్రపంచంలోనే అత్యంత బలహీనమైన ‘ఫ్రాజైల్ ఫైవ్’ ఆర్థిక వ్యవస్థల్లో ఒకటిగా ఉన్న భారత్, గత 12ఏళ్లలో ఊహించని రీతిలో పుంజుకుందని ప్రధాని తెలిపారు. ప్రస్తుతం ప్రపంచంలోనే అత్యంత వేగంగా అభివృద్ధి చెందుతున్న ప్రధాన ఆర్థిక వ్యవస్థగా దేశం అవతరించడం వెనుక ప్రతీ పౌరుడి కృషి ఉందన్నారు. జనాభా పరంగా పెద్దదైన భారత్ అభివృద్ధి చెందిన దేశంగా మారినప్పుడు, ప్రపంచం మన వైపు చూసే కోణమే పూర్తిగా మారిపోతుందని ఆయన ధీమా వ్యక్తం చేశారు.
అదే సమయంలో ఇటీవల దేశవ్యాప్తంగా వివిధ ప్రాంతాల్లో సంభవించిన ప్రకృతి వైపరీత్యాలు, తీవ్ర వరదలు, కొండచరియలు విరిగిపడి ప్రాణాలు, ఆస్తులు కోల్పోయిన బాధితుల పట్ల ప్రధాని మోదీ సానుభూతి వ్యక్తం చేశారు. కష్టకాలంలో ఉన్న ఆ కుటుంబాలకు యావత్ భారతావని అండగా ఉంటుందని, వారికి అవసరమైన అన్ని సహాయ సహకారాలను అందిస్తుందని ఎర్రకోట వేదికగా ప్రధాని భరోసా ఇచ్చారు.
