ప్రముఖ నటి త్రిషపై చేసిన అభ్యంతరకర వ్యాఖ్యల వ్యవహారంలో తమిళనాడు ప్రతిపక్ష నేత, డీఎంకే కీలక నాయకుడు ఉదయనిధి స్టాలిన్ అరెస్ట్ కావడం తమిళ రాజకీయాల్లో తీవ్ర కలకలం రేపింది. మంగళవారం ఉదయం చెన్నైలోని ఆయన నివాసంలో నాటకీయ పరిణామాల నడుమ పోలీసులు ఆయనను అదుపులోకి తీసుకున్నారు. ‘తమిళగ వెట్రి కళగం’ (టీవీకే) పార్టీ ఇచ్చిన ఫిర్యాదు మేరకు స్పందించిన పోలీసులు ఉదయనిధిపై చట్టపరమైన చర్యలు చేపట్టారు.
ఈ వివాదానికి సోమవారం తంజావూరులో కావేరి జలాల సమస్యపై నిర్వహించిన నిరసన సభ వేదికైంది. బహిరంగ సభలో ముఖ్యమంత్రి విజయ్ ప్రభుత్వంపై ఉదయనిధి విమర్శలు గుప్పిస్తున్న సమయంలో, సభలో ఉన్న కొందరు కార్యకర్తలు "త్రిష.. త్రిష" అంటూ బిగ్గరగా నినాదాలు చేశారు. ఈ సమయంలో ప్రసంగాన్ని కాసేపు ఆపిన ఉదయనిధి స్టాలిన్, చిరునవ్వు చిందిస్తూ ద్వంద్వార్థం (డబుల్ మీనింగ్) వచ్చేలా తీవ్ర అభ్యంతరకర వ్యాఖ్యలు చేశారు. ఈ వ్యాఖ్యల వీడియో నెట్టింట వైరల్ కావడంతో రాజకీయ వర్గాల నుంచి తీవ్ర నిరసన వ్యక్తమైంది.
ఉదయనిధి అరెస్ట్ పరిణామంపై టీవీకే పార్టీ మరింత ఘాటుగా స్పందించింది. టీవీకే నాయకుడు అమెరికై నారాయణన్ మీడియా ప్రతినిధులతో మాట్లాడుతూ.. ఉదయనిధి వ్యాఖ్యలు అత్యంత అసభ్యకరంగా ఉన్నాయని మండిపడ్డారు. "ఆయన పేరు ఉదయనిధి కాదు, 'వల్గర్-నిధి' అని మార్చుకుంటే బాగుంటుంది" అంటూ ఘాటు వ్యాఖ్యలు చేశారు. ప్రభుత్వ వ్యతిరేక ప్రచారానికి కాదు, ఒక మహిళా నటిని బహిరంగంగా అవమానిస్తూ మాట్లాడినందుకే ఆయన అరెస్ట్ అయ్యారని, ఈ తరహా పోకడలు తమిళనాడులోని మహిళలందరినీ కించపరచడమేనని ఆగ్రహం వ్యక్తం చేశారు.
ఈ వ్యవహారంపై టీవీకే జాతీయ మహిళా కమిషన్తో పాటు పోలీసులకు ఫిర్యాదు చేయడంతోనే అరెస్ట్ ప్రక్రియ వేగవంతమైంది. అయితే పోలీసులు తనను తీసుకెళ్తున్న సమయంలో ఉదయనిధి ఏమాత్రం తగ్గకుండా చిరునవ్వుతో కనిపించడం గమనార్హం. తన అరెస్టును ఒక 'జోక్'గా కొట్టిపారేసిన ఆయన, ఈ కేసును న్యాయస్థానాల్లోనే చట్టబద్ధంగా ఎదుర్కొంటానని ధీమా వ్యక్తం చేశారు. కాగా, ఈ ఉదంతంపై కాంగ్రెస్ ఎంపీ కార్తీ చిదంబరం స్పందిస్తూ.. బాధ్యతాయుతమైన పదవుల్లో ఉన్న సీనియర్ రాజకీయ నాయకులు ఇటువంటి చవకబారు, చులకన వ్యాఖ్యలకు దూరంగా ఉండాలని హితవు పలికారు.
