ఫ్లైదుబాయ్ విమానంలో జరిగిన ఉగ్రదాడి ఉదంతంపై అమెరికా అధ్యక్షుడు డొనాల్డ్ ట్రంప్ సంచలన వ్యాఖ్యలు చేశారు. ఇండియన్ పైలట్ స్మిత్ మచ్చర్‌పై ఒమన్ దేశానికి చెందిన కో-పైలట్ హమామ్ అల్ హమ్మామీ జరిపిన ఈ దాడి వెనుక ఇరాన్ హస్తం ఉండవచ్చని ఆయన ఆరోపించారు. ఇది తన వ్యక్తిగత అభిప్రాయమని పేర్కొన్న ట్రంప్, తన ఆరోపణలకు అనుగుణంగా ఎలాంటి అధికారిక సమాచారాన్ని బయటపెట్టలేదు.
అయితే, ఓ ప్రెస్‌మీట్ విలేకరి ప్రశ్నిస్తూ ఫ్లైదుబాయ్ దాడిలో ఇరాన్ హస్తం ఉందనుకుంటున్నారా? అని అడిగారు. దీనికి ట్రంప్ బదులిస్తూ ఇరాన్ ప్రమేయం ఉండొచ్చని బదులిచ్చారు. ఒకవేళ ఈ దాడి వెనుక ఇరాన్ ప్రమేయం ఉన్నట్లు తేలితే వారిపై తీవ్ర స్థాయిలో ప్రతికార చర్యలు ఉంటాయని ట్రంప్ హెచ్చరించారు. అయితే, ట్రంప్ వ్యాఖ్యలపై అమెరికా ఉపాధ్యక్షుడు జేడీ వాన్స్ స్పందించారు.
ఈ ఘటన వెనుక ఇరాన్ ప్రమేయం ఉందనడానికి అమెరికా ఇంటెలిజెన్స్ ఏజెన్సీలు ఇప్పటివరకు ఎలాంటి ఆధారాలు సేకరించలేదని స్పష్టం చేశారు. ప్రస్తుతం ఈ దాడిపై లోతైన విచారణ జరుగుతోందని, దర్యాప్తు పూర్తికాకుండా ఏ తీర్మానానికి రాలేమని పేర్కొన్నారు. విమానాన్ని టెల్ అవీవ్‌లోని బెన్-గురియెన్ విమానాశ్రయంపై కూల్చివేసేందుకు నిందితుడు యత్నించినట్లు అనుమానాలు వ్యక్తమవుతున్నాయి.
ఈ ఘటనలో తీవ్రంగా గాయపడినప్పటికీ, భారతీయ కెప్టెన్ స్మిత్ మచ్చర్ అత్యంత సమయస్ఫూర్తితో పోరాడి విమానాన్ని సురక్షితంగా సౌదీ అరేబియాలో ల్యాండ్ చేసి 170 మందికి పైగా ప్రయాణికుల ప్రాణాలను కాపాడారు. తీవ్రవాద భావజాలం ఉన్న కో-పైలట్ హమ్మామీపై అధికారులు కేసు నమోదు చేసి దర్యాప్తు వేగవంతం చేశారు.
ఇదిలా ఉండగా ప్పటికే ఈ ఘటనకు బాధ్యతను వహిస్తూ ఏ ఉగ్రవాద సంస్థ ప్రకటనను తెలపలేదు. అయితే, ట్రంప్ అనుమానాల నేపథ్యంలో ఈ దాడి ఎవరు చేయించింది అనేది మాత్రం దర్యాప్తులో తేలనుంది. ప్రస్తుతానికి పోలీసులు విమానంలో దాడికి దిగిన కోపైలట్‌ను విచారిస్తున్నారు. మరోవైపు ఈ ఘటనను ఉద్దేశించి అల్‌ఖైదా మద్దతు పోస్టు చేయడం చర్చనీయాంశమైంది.
