TG Politics: తెలంగాణలో రాబోయే రెండు పట్టభద్రుల ఎమ్మెల్సీ స్థానాల సమరం అధికార కాంగ్రెస్ పార్టీకి ప్రతిష్టాత్మకంగా మారిన వేళ సరికొత్త రాజకీయ సమీకరణాలు తెరపైకి వచ్చాయి. అభ్యర్థుల పేర్లను అందరికంటే ముందుగానే ప్రకటించి దూకుడు ప్రదర్శించిన హస్తం పార్టీకి.. ఇప్పుడు మిత్రపక్షాల మద్దతు కూడగట్టుకోవడమే అతిపెద్ద సవాలుగా మారిందని అంటున్నారు.
2023 అసెంబ్లీ ఎన్నికల్లో కాంగ్రెస్ విజయానికి వెన్నుదన్నుగా నిలిచిన మిత్రపక్షాలు ఈసారి ఎమ్మెల్సీ బరిలో కాంగ్రెస్ వెంట నడుస్తాయా లేక సొంతంగా పోటీకి దిగి షాక్ ఇస్తాయా అన్నది రాజకీయ వర్గాల్లో హాట్ టాపిక్‌గా మారింది. గతంలో ఖమ్మం-వరంగల్-నల్గొండ పట్టభద్రుల ఉపఎన్నికలో కాంగ్రెస్ అభ్యర్థిగా పోటీ చేసిన తీన్మార్ మల్లన్నకు సీపీఐ, సీపీఎం, తెలంగాణ జనసమితి (టీజేఎస్) సంపూర్ణ మద్దతు ప్రకటించాయి. అలాగే లోక్‌సభ ఎన్నికల్లోనూ ఈ ఐక్యత కొనసాగింది.
దానికి ప్రతిఫలంగా టీజేఎస్ అధ్యక్షుడు ప్రొఫెసర్ కోదండరామ్‌కు గవర్నర్ కోటాలో ఎమ్మెల్సీ పదవి దక్కగా, సీపీఐకి ఎమ్మెల్యే, ఎమ్మెల్సీ స్థానాలు లభించాయి. అయితే తాజా ఎమ్మెల్సీ పోరు దగ్గరపడేసరికి క్షేత్రస్థాయి రాజకీయ పరిస్థితులు శరవేగంగా మారాయని అంటున్నారు.
హైదరాబాద్-రంగారెడ్డి-మహబూబ్‌నగర్ పరిధిలో మజ్లిస్ (ఎంఐఎం) ప్రభావంతో పాటు సీపీఐ, సీపీఎం అనుబంధ ప్రజాసంఘాలకు, విద్యార్థి సంఘాలకు బలమైన క్యాడర్ ఉంది. అటు ఖమ్మం-వరంగల్-నల్గొండ నియోజకవర్గంలో వామపక్షాల పునాదులు చాలా బలంగా ఉన్నాయి. గతంలో స్వయంగా కోదండరామ్ సైతం ఇదే స్థానం నుంచి బరిలోకి దిగి గట్టి ప్రభావం చూపించారు. ఒకవేళ మిత్రపక్షాలు విడివిడిగా తమ అభ్యర్థులను రంగంలోకి దించితే, విద్యావంతుల ఓట్లు చీలిపోయి అది కాంగ్రెస్ అభ్యర్థుల గెలుపు అవకాశాలను తీవ్రంగా దెబ్బతీసే ప్రమాదం ఉందని రాజకీయ విశ్లేషకులు అంచనా వేస్తున్నారు.
ఈ పరిణామాలను ముందే గ్రహించిన కాంగ్రెస్ అధిష్ఠానం.. మిత్రపక్షాలతో అత్యవసరంగా చర్చలు జరిపి సర్దుబాటు చేసుకునేందుకు రంగం సిద్ధం చేస్తోంది. అసెంబ్లీ, లోక్‌సభ తరహాలోనే ఎమ్మెల్సీ ఎన్నికల్లోనూ తమకు బేషరతుగా అండగా నిలవాలని కాంగ్రెస్ కోరే అవకాశం ఉన్నప్పటికీ, మిత్రపక్షాలు తమ సొంత రాజకీయ భవిష్యత్తును దృష్టిలో పెట్టుకుని ఎలాంటి నిర్ణయం తీసుకుంటాయన్నది ఇప్పుడు మిస్టరీగా మారింది. విద్యావంతులు, ఉద్యోగ వర్గాల్లో విపక్షాలు దూకుడు పెంచుతున్న వేళ.. మిత్రుల మద్దతు లేకుండా కాంగ్రెస్ గట్టెక్కడం అంత సులువు కాదన్నది విశ్లేషకుల అభిప్రాయం.
