రాజధాని హైదరాబాద్లో స్వచ్ఛ ఆటో కార్మికులు తమ ఉపాధిని కాపాడుకోవాలని కోరుతూ చేపట్టిన నిరసన తీవ్ర ఉద్రిక్తతకు దారితీసింది. వర్షాకాల అసెంబ్లీ సమావేశాల ముగింపు సందర్భంగా తమ సమస్యలను ప్రభుత్వం దృష్టికి తీసుకెళ్లేందుకు కార్మికులు శాసనసభ ముట్టడికి యత్నించారు. అయితే, బషీర్ బాగ్ సమీపంలోని ఎల్బీ స్టేడియం వద్ద అలర్ట్ అయిన పోలీసులు వారిని అడ్డుకున్నారు. నిరసనకారులను బలవంతంగా వాహనాల్లోకి ఎక్కించి, ముందస్తుగా అరెస్ట్ చేసి పలు పోలీస్ స్టేషన్లకు తరలించారు.
గత ఎన్నో ఏళ్లుగా నగరంలో ఇంటింటికీ తిరుగుతూ చెత్త సేకరిస్తున్న తమ పొట్ట కొట్టవద్దని స్వచ్ఛ ఆటో కార్మికులు ఈ సందర్భంగా తీవ్ర ఆవేదన వ్యక్తం చేశారు. నిరుపేదలైన తమ ఉపాధి ఆధారమైన చెత్త సేకరణ బాధ్యతలను కార్పొరేట్ సంస్థ అయిన 'రాంకీ'కి కట్టబెట్టేందుకు ప్రభుత్వం ప్రయత్నిస్తోందని వారు ఆరోపించారు. కాంట్రాక్ట్ ప్రాతిపదికన లేదా సంస్థలకు ఈ బాధ్యతలు అప్పగిస్తే వేలాది మంది స్వచ్ఛ ఆటో కార్మికుల కుటుంబాలు వీధిపాలు కాక తప్పదని ఆందోళన వ్యక్తం చేశారు.
ఎన్నో ఏళ్లుగా తాము కష్టపడి నగర పారిశుద్ధ్య వ్యవస్థను కాపాడుతున్నామని, తమను తొలగించి ఇతర సంస్థలకు బాధ్యతలు ఇవ్వడం ఏమాత్రం సమంజసం కాదని కార్మిక సంఘాల నేతలు మండిపడ్డారు. పాత పద్ధతిలోనే స్వచ్ఛ ఆటో కార్మికుల ద్వారానే ఇంటింటి చెత్త సేకరణ కొనసాగేలా జీహెచ్ఎంసీ (GHMC), రాష్ట్ర ప్రభుత్వం తక్షణమే స్పష్టమైన ఉత్తర్వులు జారీ చేయాలని విజ్ఞప్తి చేశారు. బకాయిలు చెల్లించడంతో పాటు తమ ఉపాధికి భద్రత కల్పించాలని డిమాండ్ చేశారు.
అసెంబ్లీ ముట్టడి పిలుపు నేపథ్యంలో బషీర్ బాగ్, గన్ పార్క్, లక్డీకాపూల్ పరిసర ప్రాంతాల్లో పోలీసులు భారీగా పికెటింగ్ నిర్వహించారు. ముందస్తు అరెస్టులతో లక్డీకాపూల్, నాంపల్లి పరిసరాల్లో కాసేపు ట్రాఫిక్ తీవ్రంగా స్తంభించింది. తమ డిమాండ్లను నెరవేర్చకపోతే ఆందోళనలను మరింత తీవ్రతరం చేస్తామని, నగరం అంతటా చెత్త సేకరణను నిలిపివేసి నిరసన తెలుపుతామని స్వచ్ఛ ఆటో కార్మికుల సంఘాలు హెచ్చరించాయి.
