తెలంగాణ శాసనసభ వర్షాకాల సమావేశాల నుంచి బీఆర్ఎస్ ఎమ్మెల్యేలు, ఎమ్మెల్సీలను సస్పెండ్ చేయడాన్ని నిరసిస్తూ బీఆర్ఎస్ పార్టీ సంచలన నిర్ణయం తీసుకుంది. పార్టీ ప్రధాన కార్యాలయం తెలంగాణ భవన్లో శనివారం ఉదయం 'మాక్ అసెంబ్లీ' (నమూనా శాసనసభ) నిర్వహించేందుకు అన్ని ఏర్పాట్లు పూర్తి చేసింది. ప్రభుత్వ ప్రజా వ్యతిరేక విధానాలను, అసెంబ్లీలో ప్రతిపక్షాల గొంతు నొక్కేందుకు కాంగ్రెస్ సర్కార్ చేస్తున్న ప్రయత్నాలను ఎండగట్టడమే లక్ష్యంగా ఈ కార్యక్రమాన్ని తలపెట్టారు.
ఈ మాక్ అసెంబ్లీ నిర్వహణ కోసం తెలంగాణ భవన్లో ప్రత్యేక వేదికను, అసెంబ్లీ తరహాలోనే స్పీకర్ పోడియం, సభాపతి స్థానం, మైక్ సిస్టమ్ను సిద్ధం చేశారు. సభాపతి (స్పీకర్) పాత్రలో మాజీ ఎమ్మెల్యే మాణిక్యరావు వ్యవహరించనుండగా, సీఎం పాత్రలో సనత్నగర్ ఎమ్మెల్యే తలసాని శ్రీనివాస్ యాదవ్ వ్యవహరించనున్నారు. బీఆర్ఎస్ అగ్రనేతలు, ఎమ్మెల్యేలు, ఎమ్మెల్సీలు అందరూ ఈ సమాంతర సభలో పాల్గొని శాసనసభ వాతావరణాన్ని తలపించేలా చర్చలు జరపనున్నారు.
ఈ నమూనా సభలో ప్రధానంగా కాంగ్రెస్ ప్రభుత్వం ఇచ్చిన హామీల వైఫల్యాలు, 22-A నిషేధిత భూముల కుంభకోణం, నిరుద్యోగ సమస్యలు, రైతులకు ఉచిత విద్యుత్ అంతరాయాలు, సాగునీటి ప్రాజెక్టుల నిర్లక్ష్యంపై సుదీర్ఘంగా చర్చించనున్నారు. అసెంబ్లీలో మాట్లాడే అవకాశం ఇవ్వకుండా తమ సభ్యులను అక్రమంగా బయటకు పంపారని, అందుకే ప్రజల తరఫున తెలంగాణ భవన్ వేదికగానే ప్రజా సమస్యలపై ప్రశ్నిస్తామని బీఆర్ఎస్ నాయకులు స్పష్టం చేశారు.
శాసనసభ చివరి రోజు సమావేశాలు జరుగుతున్న సమయంలోనే తెలంగాణ భవన్లో బీఆర్ఎస్ మాక్ అసెంబ్లీ నిర్వహిస్తుండటంతో రాష్ట్ర రాజకీయాల్లో తీవ్ర ఉత్కంఠ నెలకొంది. ఈ కార్యక్రమాన్ని కవర్ చేసేందుకు భారీగా మీడియా ప్రతినిధులు తరలిరాగా, బీఆర్ఎస్ శ్రేణులు పెద్ద సంఖ్యలో తెలంగాణ భవన్కు చేరుకున్నాయి. కాంగ్రెస్ వర్సెస్ బీఆర్ఎస్ సవాల్-ప్రతిసవాల్ మధ్య ఈ పరిణామం తెలంగాణ రాజకీయ వాతావరణాన్ని మరింత వేడెక్కించింది.
