తిరుమల శ్రీవారి ఆలయంలో అడుగడుగునా ఒక ఆధ్యాత్మిక రహస్యం దాగి ఉంటుందని మన పురాణాలు చెబుతాయి. అలాంటి విశిష్ట ప్రదేశాల్లో ఒకటి.. యోగ నరసింహస్వామి ఆలయ ప్రదక్షిణ మార్గంలో, దక్షిణాభిముఖంగా ఉన్న రాతిశిల. భక్తులు ప్రేమగా దీనిని పరిమళపు అర అని పిలుస్తారు.
పూర్వకాలంలో ప్రతి గురువారం.. మరుసటి రోజు జరిగే శుక్రవార అభిషేకానికి ఏర్పాట్లు ఇక్కడే జరిగేవని ఆలయ సంప్రదాయం చెబుతోంది. ముఖ్యంగా.. శ్రీవారి నుదుటన అలంకరించే ఊర్ధ్వపుండ్రానికి అవసరమైన పచ్చకర్పూరాన్ని ఈ సానరాతిపై నూరేవారు. అంతేకాదు.. పునుగు, జవ్వాది, కస్తూరి, కుంకుమపువ్వు వంటి పరిమళ ద్రవ్యాలను కూడా ఇక్కడే సిద్ధం చేసేవారని చెబుతారు.
స్వామివారికి జరిగే అభిషేక సేవకు ముందు.. పరిమళాలతో కూడిన పవిత్ర సుగంధ ద్రవ్యాలు సిద్ధమయ్యే ప్రదేశంగా ఈ పరిమళపు అరకు ప్రత్యేకత ఏర్పడింది. అయితే కాలం మారింది.. భక్తుల రద్దీ పెరిగింది. అందుకే ఇప్పుడు ఈ ద్రవ్యాలను మరో ప్రదేశంలో సిద్ధం చేసి, వాటిని ఉంచిన గిన్నెలను ఈ రాతిశిల వద్దకు తీసుకొచ్చి, లాంఛనంగా ఆలయ అంతర్భాగంలోకి తీసుకెళ్తున్నారు.
ఇక తమ మనసులోని కోరికను చూపుడు వేలితో ఈ రాతిపై రాస్తే.. స్వామివారు ఆ కోరికను త్వరగా నెరవేరుస్తారని భక్తులు విశ్వసిస్తారు.. మన వేద, పురాణ సంప్రదాయాల్లో భగవంతుడి సన్నిధిలో మనస్సు, వాక్కు, కర్మ పవిత్రంగా ఉండాలని చెబుతారు. భక్తితో చేసే సంకల్పానికి ప్రత్యేకమైన ప్రాధాన్యం ఉందనే భావన సనాతన ధర్మంలో కనిపిస్తుంది. అందుకే ఇక్కడ కోరిక రాయడం కంటే.. మనసులోని కోరికను స్వామివారి పాదాల చెంత సమర్పించడం అసలైన భక్తి అని చెప్పుకోవచ్చు.
ఎందుకంటే తిరుమలలో భక్తుడు కోరేది ఒక్క కోరిక మాత్రమే కాదు.. స్వామీ.. నాకు ఏది శ్రేయస్కరమో అదే ప్రసాదించు అనే సంపూర్ణ శరణాగతి.. పరిమళపు అరపై నూరిన సుగంధం ఒకప్పుడు స్వామివారి అభిషేకానికి పరిమళాన్ని అందించినట్లే.. ఈ పవిత్ర ప్రదేశాన్ని దర్శించే ప్రతి భక్తుడి హృదయంలో కూడా శ్రీనివాస నామస్మరణ పరిమళించాలన్నదే ఈ క్షేత్ర మహిమగా పేర్కొంటారు..
గమనిక: ఇక్కడ అందించిన వివరాలు కేవలం సాంప్రదాయ పురాణ విశ్వాసాలు మరియు ఆధ్యాత్మిక భావనల ఆధారంగా ఇవ్వబడ్డాయి. వీటిని కేవలం మతపరమైన విశ్వాసాల కోణంలోనే చూడాలి. వ్యక్తిగత నిర్ణయాలు తీసుకునే ముందు సంబంధిత రంగ నిపుణులను సంప్రదించడం మంచిది.
