మారుతున్న నేటి జీవనశైలిలో 'హార్ట్ ఎటాక్' వయస్సుతో సంబంధం లేకుండా అందరినీ భయపెడుతోంది. ఒకప్పుడు పెద్దవారికే పరిమితం అనుకున్న ఈ ప్రమాదం వల్ల ప్రస్తుతం రోజురోజుకూ మరణాల సంఖ్య పెరుగుతోంది.
తీరిక లేని పరుగెత్తే జీవితం, మితిమీరిన మానసిక ఒత్తిడి, సరిగ్గా నిద్రలేని రాత్రులు... వీటితో పాటు జంక్ ఫుడ్ సంస్కృతి మన గుండె ఆరోగ్యాన్ని తీవ్రంగా దెబ్బతీస్తున్నాయని ఆరోగ్య నిపుణులు హెచ్చరిస్తున్నారు.
గంటల తరబడి ఒకే చోట కూర్చుని పనిచేయడం, వ్యాయామం లేకపోవడం ఈ ప్రమాదాన్ని మరింత పెంచుతున్నాయి. అయితే హార్ట్ ఎటాక్ ఒక్కసారిగా ప్రాణాలను కబళించే ప్రమాదంగా చాలామంది భావిస్తారు. కానీ వైద్య నిపుణులు చెబుతున్న ముఖ్యమైన విషయం ఏమిటంటే.. చాలా సందర్భాల్లో గుండెపోటుకు దారితీసే మార్పులు శరీరంలో సంవత్సరాల ముందే మొదలవుతాయి.
మన గుండెకు రక్తం, ఆక్సిజన్ను అందించే కొరోనరీ ఆర్టరీల్లో కొవ్వు, కొలెస్ట్రాల్, ఇతర పదార్థాలతో కూడిన ప్లాక్ క్రమంగా పేరుకుపోతుంది. దీనినే అథెరోస్క్లెరోసిస్ అంటారు. ఒక దశలో ఈ ప్లాక్ పగిలితే అక్కడ రక్తం గడ్డకట్టి ఆర్టరీలో రక్తప్రవాహాన్ని పూర్తిగా లేదా పాక్షికంగా అడ్డుకోవచ్చు. గుండె కండరాలకు ఆక్సిజన్ అందకపోతే.. కొంతసేపటికి ఆ కణాలు దెబ్బతినడం ప్రారంభమవుతుంది. ఇదే హార్ట్ ఎటాక్.
మరోవైపు అధిక రక్తపోటు, అధిక కొలెస్ట్రాల్, మధుమేహం, పొగతాగడం, అధిక బరువు, శారీరక శ్రమ లేకపోవడం, అనారోగ్యకరమైన ఆహారం ముఖ్యమైన రిస్క్ ఫ్యాక్టర్లు. వయసు పెరగడం, కుటుంబంలో చిన్న వయసులోనే గుండె జబ్బులు రావడం వంటి అంశాలు కూడా ప్రమాదాన్ని పెంచుతాయని పేర్కొంటున్నారు. అలాగే హార్ట్ ఎటాక్ లక్షణాలను ఎలా గుర్తించాలో కూడా వైద్యులు వివరించారు..
చాతి మధ్యలో లేదా ఎడమ వైపున నొప్పి, బరువు, ఒత్తిడి లేదా బిగుతుగా ఉన్న భావన అత్యంత సాధారణ లక్షణాల్లో ఒకటి. కొంతమందికి ఈ అసౌకర్యం కొన్ని నిమిషాలు ఉండొచ్చు.. తగ్గిపోయి మళ్లీ రావచ్చు.. అంతేకాదు.. నొప్పి కేవలం ఛాతిలోనే ఉండాల్సిన అవసరం లేదు. ఒకటి లేదా రెండు చేతులు, భుజాలు, వీపు, మెడ, దవడ లేదా పై పొట్ట భాగానికి నొప్పి వ్యాపించవచ్చు.
ఊపిరి తీసుకోవడంలో ఇబ్బంది, అకస్మాత్తుగా చెమటలు పట్టడం, వికారం లేదా వాంతులు, తల తిరగడం, నీరసం, గుండె వేగంగా లేదా అసమానంగా కొట్టుకోవడం కూడా హెచ్చరిక సంకేతాలే అని ఆరపగి నిపుణులు చెబుతున్నారు.. ముఖ్యంగా మహిళల్లో ఛాతి నొప్పితో పాటు అసాధారణమైన అలసట, వికారం, ఊపిరి తీసుకోవడంలో ఇబ్బంది, వీపు లేదా భుజం నొప్పి వంటి లక్షణాలు కనిపించవచ్చు. అందుకే ప్రతి గుండెపోటు ఒకే విధంగా ఉంటుందని అనుకోవడం ప్రమాదకరం.
మరో ముఖ్యమైన విషయం.. కొందరిలో గుండెపోటు చాలా స్వల్పమైన లక్షణాలతో లేదా దాదాపు ఎలాంటి స్పష్టమైన లక్షణాలు లేకుండానే రావచ్చు. ముఖ్యంగా మధుమేహం ఉన్నవారిలో ఇలాంటి సైలెంట్ హార్ట్ ఎటాక్ సంభవించే అవకాశం ఉంటుంది. అందుకే ఛాతిలో కొత్తగా వచ్చిన లేదా తగ్గకుండా కొనసాగుతున్న ఒత్తిడి, నొప్పి.. దానితో పాటు ఊపిరి ఆడకపోవడం, చెమటలు, వికారం, తల తిరగడం వంటి లక్షణాలు ఉంటే గ్యాస్ అనుకుని ఇంట్లోనే ఉండిపోవద్దని సూచిస్తున్నారు.
హార్ట్ ఎటాక్లో ప్రతి నిమిషం కీలకం. లక్షణాలు కనిపిస్తే వెంటనే అత్యవసర వైద్య సహాయం తీసుకోవాలి. స్వయంగా వాహనం నడిపి ఆసుపత్రికి వెళ్లడం కంటే అత్యవసర వైద్య సేవలను సంప్రదించడం సురక్షితమైన మార్గం. త్వరగా చికిత్స అందితే గుండె కండరాలకు జరిగే నష్టాన్ని తగ్గించే అవకాశం ఉంటుందని వైద్యులు అంటున్నారు.
అందుకే.. హార్ట్ ఎటాక్ను అడ్డుకోవడంలో ముందస్తు జాగ్రత్తలే మొదటి రక్షణ. రక్తపోటు, షుగర్, కొలెస్ట్రాల్ను నియంత్రించుకోవడం.. పొగతాగడం మానేయడం.. క్రమం తప్పకుండా శారీరక శ్రమ చేయడం.. ఆరోగ్యకరమైన ఆహారం తీసుకోవడం.. బరువును నియంత్రించుకోవడం.. గుండె ఆరోగ్యాన్ని కాపాడటంలో కీలక అంశాలుగా పేర్కొంటున్నారు.
ముఖ్య గమనిక: ఈ సమాచారం కేవలం మీ అవగాహన కోసం మాత్రమే. ఇది నిపుణుల లేదా వైద్యుల సూచనలకు ప్రత్యామ్నాయం కాదు. ఆరోగ్యానికి సంబంధించిన ఎలాంటి నిర్ణయాలైనా తీసుకునే ముందు ఖచ్చితంగా మీ డాక్టర్ను సంప్రదించాల్సిందిగా మనవి!..
