తిరుమల శ్రీ వేంకటేశ్వరస్వామివారిని ఆంధ్రప్రదేశ్ విద్యా, ఐటీ, రియల్ నాలెడ్జ్ కంపెనీల శాఖ మంత్రి నారా లోకేశ్ మంగళవారం ఉదయం దర్శించుకున్నారు. సింగపూర్ దేశ హోం మంత్రి కే.షణ్ముగంతో కలసి ఆయన తిరుమలేశుడి సేవలో పాల్గొన్నారు. ఈ సందర్భంగా ఆలయానికి విచ్చేసిన విశిష్ట అతిథులకు టీటీడీ కార్యనిర్వహణాధికారి (ఈవో) ముద్దాడ రవిచంద్ర, ఆలయ అర్చకులు మహాద్వారం వద్ద సంప్రదాయబద్ధంగా ఘనస్వాగతం పలికి దర్శన ఏర్పాట్లు చేశారు.
సోమవారం రాత్రే తిరుపతి విమానాశ్రయానికి చేరుకున్న సింగపూర్ మంత్రి కే.షణ్ముగానికి మంత్రి నారా లోకేశ్ స్వయంగా స్వాగతం పలికి, తిరుమలకు తోడ్కొని వెళ్లారు. మంగళవారం ఉదయం శ్రీవారి వీఐపీ ప్రారంభ దర్శన సమయంలో ఇరువురు నేతలు స్వామివారిని దర్శించుకుని ప్రత్యేక పూజలు నిర్వహించారు. దర్శనానంతరం ఆలయంలోని రంగనాయకుల మండపంలో వేద పండితులు వారికి వేదాశీర్వచనం అందించగా, టీటీడీ అధికారులు శ్రీవారి శేషవస్త్రం కప్పి తీర్థప్రసాదాలు, శ్రీవారి చిత్రపటాన్ని అందజేశారు.
మంత్రి నారా లోకేశ్‌కు తిరుపతి ఎయిర్‌పోర్టులో స్థానిక ప్రజాప్రతినిధులు, తెలుగుదేశం పార్టీ నాయకులు శాలువాలు, పూలమాలలతో ఘనస్వాగతం పలికారు. తిరుమల శ్రీవారి దర్శనం ముగించుకున్న అనంతరం మంత్రి లోకేశ్ మధ్యాహ్నం రేణిగుంట విమానాశ్రయం నుంచి ప్రత్యేక విమానంలో కేరళ పర్యటనకు బయలుదేరి వెళ్లనున్నారు.
