పశ్చిమాసియా (మిడిల్ ఈస్ట్) ప్రాంతంలో నెలకొన్న తీవ్ర ఉద్రిక్తతలను చల్లార్చే దిశగా అత్యంత కీలకమైన రాజకీయ, దౌత్య పరిణామాలు వేగంగా చోటుచేసుకుంటున్నాయి. యెమెన్‌లోని హౌతీ (Houthi) తిరుగుబాటుదారులతో శాశ్వత కాల్పుల విరమణ (Ceasefire) ఒప్పందం కుదుర్చుకోవడం కోసం సౌదీ అరేబియా భారీ ప్రతిపాదన తెచ్చినట్లు అంతర్జాతీయ మీడియాలో సంచలన కథనాలు వెలువడుతున్నాయి. తమ దేశ భూభాగంపై దాడులను తక్షణమే నిలిపివేస్తే, హౌతీలకు ఏకంగా 1 బిలియన్ అమెరికన్ డాలర్లు (భారత కరెన్సీలో సుమారు రూ.9,507 కోట్లు) ఆర్థిక సాయంగా అందించేందుకు సౌదీ ఆఫర్ చేసినట్లు గల్ఫ్ దౌత్య వర్గాలను ఉటంకిస్తూ కథనాలు వెల్లడించాయి.
ఈ అత్యున్నత స్థాయి శాంతి చర్చలకు ఇరాన్ ప్రభుత్వం మధ్యవర్తిగా వ్యవహరించడం, ఇరాన్ రాజధాని టెహ్రాన్‌లో ఈ సమావేశం జరగడం ప్రపంచవ్యాప్తంగా తీవ్ర ప్రాధాన్యతను సంతరించుకుంది. సౌదీ రక్షణ మంత్రి ప్రిన్స్ ఖలీద్ బిన్ సల్మాన్ స్వయంగా టెహ్రాన్‌కు వెళ్లి ఈ చర్చల్లో పాల్గొన్నట్లు సమాచారం. ఈ అత్యవసర భేటీలో ఇరాన్ అధ్యక్షుడు మసూద్ పెజెస్కియాన్‌తో పాటు తుర్కియే నిఘా విభాగాధిపతి ఇబ్రహీం కాలిన్, పాకిస్థాన్ ఆర్మీ చీఫ్ జనరల్ ఆసిమ్ మునీర్ వంటి ప్రాంతీయ కీలక దేశాల అధినేతలు, సైనిక ప్రముఖులు హాజరైనట్లు దౌత్య వర్గాలు వెల్లడించాయి.
సౌదీ రక్షణ మంత్రి తమ ప్రత్యేక సైనిక రవాణా విమానంలో 1 బిలియన్ డాలర్ల నగదును టెహ్రాన్‌కు తీసుకువచ్చారని ఒక అంతర్జాతీయ దౌత్యవేత్త పేర్కొన్నప్పటికీ, ఈ భారీ నిధుల బదిలీ వార్తలను సౌదీ అరేబియా అధికారికంగా ఇంకా ధ్రువీకరించలేదు. సౌదీలోని కీలక విమానాశ్రయాలు, చమురు క్షేత్రాలపై హౌతీలు నిర్వహిస్తున్న డ్రోన్, మిస్సైల్ దాడులతో పాటు ఎర్రసముద్రం, హార్ముజ్ జలసంధిలో నౌకల రాకపోకలకు ఆటంకాలు సృష్టిస్తున్న నేపథ్యంలో, శాంతి పునరుద్ధరణ కోసం ఇరాన్ ఈ మధ్యవర్తిత్వానికి చొరవ తీసుకున్నట్లు తెలుస్తోంది.
మూడేళ్ల క్రితం ఇరువర్గాల మధ్య కుదిరిన ప్రాథమిక అవగాహనను అమలు చేయడంలో ఉన్న సాంకేతిక సమస్యల వల్లే ఈ సమావేశం జరిగిందని సౌదీ అధికారి ఒకరు వెల్లడించారు. ఆ ఒప్పందం ప్రకారం.. సౌదీపై హౌతీలు దాడులు ఆపితే, ప్రతిఫలంగా వారి నియంత్రణలో ఉన్న యెమెన్ ప్రాంతాల్లో ఉద్యోగుల జీతాలు, ప్రాథమిక మౌలిక సదుపాయాల కల్పన కోసం రియాద్ ప్రభుత్వం ఆర్థిక నిధులను సమకూర్చాల్సి ఉంది. ఖతార్, పాకిస్థాన్ దేశాలు చేస్తున్న శాంతి ప్రయత్నాలకు మద్దతుగా ఉద్రిక్తతలు తగ్గించేందుకే ఈ దౌత్య పర్యటన జరిగిందని సౌదీ విదేశాంగ శాఖ స్పష్టం చేసింది.
