త్వరలో RSSలో భారీ మార్పులు
ఇండోర్ లో కీలక భేటీకి అంతా రెడీ
ఇకపై ప్రాంత్‌ల స్థానంలో సంభాగ్‌లు
సర్ కార్యవాహ్ ఎన్నికపై ఆసక్తి
రాష్ట్రీయ స్వయంసేవక్ సంఘ్‌లో కీలక సంస్థాగత మార్పులకు రంగం సిద్ధమవుతోంది. వచ్చే నెలలో ఇండోర్‌లో జరగనున్న అఖిల భారతీయ కార్యనిర్వాహక మండలి సమావేశంలో సంఘ్ నిర్మాణంలో మార్పులను అమలు చేయడంతో పాటు.. వచ్చే ఏడాది జరగనున్న సర్కార్యవాహ్ ఎన్నికలకు సంబంధించిన ప్రక్రియపై కూడా చర్చ జరగనుంది. అదే సమయంలో దేశంలో ప్రస్తుతం రాజకీయంగా, సామాజికంగా చర్చకు వస్తున్న ప్రత్యేక ఓటర్ల జాబితా సవరణ, యూనిఫాం సివిల్ కోడ్, అక్రమ వలసలు వంటి అంశాలు కూడా సమావేశంలో చర్చకు వచ్చే అవకాశం ఉంది.
నవంబర్ 2 నుంచి మూడు రోజుల భేటీ
ఆర్ఎస్ఎస్ అఖిల భారతీయ కార్యనిర్వాహక మండలి సమావేశం నవంబర్ 2 నుంచి మధ్యప్రదేశ్‌లోని ఇండోర్‌లో మూడు రోజుల పాటు జరగనుంది. ప్రతి ఏడాది జరిగే ఈ సమావేశానికి ఈసారి ప్రత్యేక ప్రాధాన్యత ఉంది. కారణం.. వచ్చే ఏడాది మార్చిలో అఖిల భారతీయ ప్రతినిధి సభ సమావేశం జరగనుంది. ఆర్ఎస్ఎస్‌లో అత్యున్నత నిర్ణయాధికార సంస్థ అయిన ఏబీపీఎస్‌లోనే సర్ కార్యవాహ్ ఎన్నిక జరుగుతుంది.
ప్రస్తుతం దత్తాత్రేయ హోసబలే సర్ కార్యవాహ్ గా కొనసాగుతున్నారు. 2024లో ఆయన రెండోసారి ఈ బాధ్యతలు చేపట్టారు. సర్ కార్యవాహ్ పదవీకాలం మూడేళ్లు కాగా.. ఒక వ్యక్తి ఎన్ని పర్యాయాలైనా ఈ పదవికి ఎన్నికయ్యే అవకాశం ఉంది. అందుకే మార్చిలో జరగబోయే ఎన్నికలకు 4 నెలల ముందు జరుగుతున్న నవంబర్ సమావేశం.. సంస్థలో తదుపరి దశకు కీలకంగా మారనుంది.
ప్రాంత్‌ల స్థానంలో సంభాగ్‌లు
ఈసారి ఆర్ఎస్ఎస్ సంస్థాగత నిర్మాణంలో చేయబోతున్న మార్పు ఆసక్తికరంగా మారింది. ప్రస్తుతం ఉన్న ప్రాంత్ వ్యవస్థ స్థానంలో సంభాగ్ వ్యవస్థను మరింత విస్తృతంగా అమలు చేయనున్నారు. సాధారణంగా ప్రాంత్‌ను రాష్ట్ర స్థాయి యూనిట్‌గా, సంభాగ్‌ను దాని కంటే చిన్న భౌగోళిక విభాగంగా చూడొచ్చు. ఈ మార్పు ద్వారా సంస్థ కార్యకలాపాలను మరింత స్థానిక స్థాయికి తీసుకెళ్లే ప్రయత్నం జరుగుతున్నట్లు సమాచారం.
ప్రస్తుతం ఆర్ఎస్ఎస్‌లో 46 మంది ప్రాంత్ ప్రచారకులు ఉండగా.. కొత్త వ్యవస్థలో ప్రచారకుల సంఖ్య 85కు పెరగనుంది. మరోవైపు కేంద్రమైన రాష్ట్ర స్థాయి యూనిట్ల సంఖ్య 11 నుంచి 9కి తగ్గనుంది. అంటే ఒకవైపు రాష్ట్ర స్థాయి నిర్మాణాన్ని కుదిస్తూ.. మరోవైపు క్షేత్రస్థాయిలో బాధ్యతలు నిర్వహించే ప్రచారకుల సంఖ్యను దాదాపు రెట్టింపు చేయబోతున్నారు.
అసలు లక్ష్యం.. మరింత విస్తృతమైన క్షేత్రస్థాయి నెట్‌వర్క్?
ఈ మార్పుల వెనుక ప్రధాన ఉద్దేశం సంస్థను మరింత విస్తృతంగా ప్రజల్లోకి తీసుకెళ్లడం, క్షేత్రస్థాయిలో కార్యకలాపాలను పెంచడం, స్థానిక యూనిట్లతో సమన్వయాన్ని బలోపేతం చేయడంగా ఆర్ఎస్ఎస్ వర్గాలు చెబుతున్నాయి.
నవంబర్ సమావేశం తర్వాత రాష్ట్ర స్థాయిలో కొత్త కార్యవర్గాలను ఎన్నుకునే ప్రక్రియ ప్రారంభమవుతుంది. సంభాగ్ సంఘచాలక్‌లు, క్షేత్ర సంఘచాలక్‌ల ఎంపిక కూడా జరుగుతుంది. ఈ మొత్తం ప్రక్రియ చివరకు వచ్చే ఏడాది మార్చిలో జరిగే అఖిల భారతీయ ప్రతినిధి సభ ఎన్నికలతో ముగుస్తుంది.
అంటే.. నవంబర్ సమావేశంలో తీసుకునే నిర్ణయాలు కేవలం సంస్థాగత మార్పులకే పరిమితం కాకుండా, వచ్చే ఏడాది జరగనున్న నాయకత్వ ఎన్నికల ప్రక్రియకు కూడా పునాది వేయనున్నాయి.
సర్ కార్యవాహ్ ఎన్నికపై ఆసక్తి
ఆర్ఎస్ఎస్‌లో సర్‌సంఘ్‌చాలక్‌ తర్వాత సంస్థ నిర్వహణలో సర్కార్యవాహ్‌ది కీలకమైన బాధ్యత. ప్రస్తుతం ఈ పదవిలో దత్తాత్రేయ హోసబలే ఉన్నారు. 2024లో ఆయన రెండోసారి ఎన్నికయ్యారు. ఇప్పుడు 2027 మార్చిలో మరోసారి ఎన్నిక జరగాల్సి ఉండటంతో.. నవంబర్ నుంచి సంస్థలో జరిగే పునర్వ్యవస్థీకరణపై సహజంగానే ఆసక్తి పెరిగింది.
అయితే కొత్త సర్ కార్యవాహ్ ఎవరనే దానిపై ఇప్పటివరకు ఎలాంటి అధికారిక నిర్ణయం వెలువడలేదు. నవంబర్ సమావేశం అనంతరం జరిగే సంస్థాగత ఎన్నికల ప్రక్రియే దీనిపై మరింత స్పష్టత ఇవ్వనుంది.
SIR పై కూడా చర్చ
ఇక సంస్థాగత అంశాలతో పాటు దేశంలో ప్రస్తుతం తీవ్ర రాజకీయ చర్చకు కారణమైన స్పెషల్ ఇంటెన్సివ్ రివిజన్‌ అంశం కూడా ఆర్ఎస్ఎస్ సమావేశంలో చర్చకు వచ్చే అవకాశం ఉంది. ఓటర్ల జాబితాల సవరణకు సంబంధించిన ఎస్ఐఆర్ ప్రక్రియపై ప్రతిపక్షాలు ఎన్నికల సంఘం, కేంద్ర ప్రభుత్వంపై పలు విమర్శలు చేస్తున్నాయి. ఈ నేపథ్యంలో ఆర్ఎస్ఎస్ ప్రచార విభాగం అధిపతి సునీల్ అంబేకర్ చేసిన వ్యాఖ్యలు ప్రాధాన్యత సంతరించుకున్నాయి.
ఓటర్ల జాబితాలో నిబంధనలకు విరుద్ధంగా ఉన్న వ్యక్తులు గుర్తిస్తే.. చట్టబద్ధమైన విధానంలో వాటిని సరిచేయాల్సిన అవసరం ఉందని ఆయన అన్నారు. అదే సమయంలో ప్రజాస్వామ్యంలో అన్యాయాలపై న్యాయపరమైన, చట్టపరమైన మార్గాల్లో పరిష్కారం కోరే అవకాశం ఉంటుందని కూడా ఆయన పేర్కొన్నారు.
యూసీసీ, అక్రమ వలసలపైనా ఫోకస్
యూనిఫాం సివిల్ కోడ్ కూడా ఆర్ఎస్ఎస్ చర్చల్లో మరో ముఖ్యమైన అంశంగా ఉండనుంది. వివాహం, కుటుంబ చట్టాలకు సంబంధించి వేర్వేరు వర్గాలకు వేర్వేరు నిబంధనలు ఉండటంపై ఆర్ఎస్ఎస్ చాలాకాలంగా ఒకే విధమైన చట్టం అవసరమని తన అభిప్రాయాన్ని వ్యక్తం చేస్తోంది.
అదే సమయంలో అక్రమ వలసదారులను గుర్తించేందుకు నేషనల్ రిజిస్టర్ ఆఫ్ సిటిజన్స్ వంటి వ్యవస్థ అవసరమని సునీల్ అంబేకర్ ఇటీవల వ్యాఖ్యానించారు. జనాభా విధానం, అక్రమ వలసలు, పౌరసత్వానికి సంబంధించిన అంశాలు కూడా ఆర్ఎస్ఎస్ గతంలో పలు సందర్భాల్లో ప్రస్తావించినవే. దీంతో నవంబర్ భేటీలో ఈ అంశాలపై సంస్థ నాయకత్వం ఎలాంటి చర్చ చేస్తుందన్నది ఆసక్తికరంగా మారింది.
సంస్థాగత మార్పుల నుంచి జాతీయ అంశాల వరకు..
ఇండోర్‌లో జరగబోయే ఆర్ఎస్ఎస్ కార్యవర్గ సమావేశం మూడు ప్రధాన కారణాలతో ప్రాధాన్యత సంతరించుకుంది. ఒకటి.. ఆర్ఎస్ఎస్ సంస్థాగత నిర్మాణంలో ప్రాంత్‌ల స్థానంలో సంభాగ్‌ల వ్యవస్థను విస్తరించడం. రెండు.. వచ్చే ఏడాది సర్ కార్యవాహ్ ఎన్నికలకు ముందు సంస్థలో కీలక నియామకాలు, ఎన్నికల ప్రక్రియ ప్రారంభం కావడం. మూడు.. ఎస్ఐఆర్, యూసీసీ, అక్రమ వలసలు, జనాభా విధానం వంటి ప్రస్తుతం దేశవ్యాప్తంగా చర్చలో ఉన్న అంశాలపై సంఘ్ తన వైఖరిని చర్చించే అవకాశం ఉండటం.
అందుకే నవంబర్ 2 నుంచి ఇండోర్‌లో జరిగే మూడు రోజుల సమావేశం ఆర్ఎస్ఎస్‌కు సాధారణ వార్షిక భేటీ కంటే ఎక్కువ ప్రాధాన్యతను సంతరించుకుంది. సమావేశం ముగిసిన తర్వాత సంస్థాగతంగా ఎలాంటి మార్పులు అమల్లోకి వస్తాయి? వచ్చే ఏడాది సర్ కార్యవాహ్ ఎన్నికలో ఎలాంటి మార్పులు వస్తాయి? దేశంలోని కీలక రాజకీయ, సామాజిక అంశాలపై ఆర్ఎస్ఎస్ ఎలాంటి దిశానిర్దేశం చేస్తుంది? అన్నది ఆసక్తికరంగా మారింది.
