reliance jio: ఒకప్పుడు భారత్‌లో మొబైల్ ఇంటర్నెట్ వాడకం అంటే ఒక విలాసవంతమైన అంశం. నెలకు ఒక జీబీ డేటా కోసం రూ.250 నుంచి రూ.300 వరకు ఖర్చు పెడుతూ, ఇంటర్నెట్ ఆన్ చేయడానికే ఒకటికి రెండుసార్లు ఆలోచించే రోజులు అవి. సరిగ్గా పదేళ్ల క్రితం.. 2016 సెప్టెంబరులో ముకేశ్ అంబానీ నేతృత్వంలోని రిలయన్స్ జియో భారత టెలికాం రంగంలోకి అడుగుపెట్టింది. అప్పటివరకు స్థిరపడిన పాత రూల్స్‌ను, టెలికాం గుత్తాధిపత్యాన్ని ఒక్క దెబ్బతో తుడిచిపెట్టేసింది. ఫ్రీ కాలింగ్, అపరిమిత హై-స్పీడ్ డేటా అంటూ మొదలైన జియో ప్రయాణం.. నేడు దేశ డిజిటల్ ఆర్థిక వ్యవస్థకు వెన్నెముకగా మారి, భారత స్టాక్ మార్కెట్ చరిత్రలోనే కనీవినీ ఎరుగని మెగా ఐపీవో దిశగా అడుగులు వేస్తోంది.
పదేళ్లలో తలకిందులైన మార్కెట్ లెక్కలు..
జియో ఎంట్రీ భారత టెలికాం మార్కెట్‌ను భారీ మార్పులకు గురిచేసింది. అప్పటివరకు అగ్రస్థానాల్లో ఉన్న బడా సంస్థలు జియో ధాటికి తట్టుకోలేక విలీనమవ్వడమో లేదా మార్కెట్ నుంచి నిష్క్రమించడమో చేశాయి. తక్కువ ధరలో స్మార్ట్‌ఫోన్ కనెక్టివిటీ, వేగవంతమైన 4G నెట్‌వర్క్ గ్రామీణ ప్రాంతాలకు సైతం విస్తరించడంతో భారతదేశం ప్రపంచంలోనే అత్యధిక డేటా వినియోగించే దేశంగా అవతరించింది.
2026 జూన్ నాటి అధికారిక గణంకాలను పరిశీలిస్తే జియో సృష్టించిన ప్రభంజనం స్పష్టంగా కనిపిస్తుంది. ఏకంగా 53.33 కోట్లకు పైగా యాక్టివ్ సబ్‌స్క్రైబర్లతో దేశంలోనే తిరుగులేని నంబర్ వన్ టెలికాం సంస్థగా నిలిచింది. అతి తక్కువ టైంలోనే 28 కోట్లకు పైగా 5G యూజర్స్‌ను తన నెట్‌వర్క్‌లోకి తీసుకువచ్చింది. భారతదేశపు మొత్తం వైర్లెస్ డేటా ట్రాఫిక్‌లో సుమారు 60 శాతం వాటాను జియో ఒక్కటే నియంత్రిస్తోంది.
కేవలం సిమ్ కార్డులకే పరిమితం కాలేదు..
జియో సాధించిన ఘనత కేవలం చౌకైన డేటా ప్లాన్లకు మాత్రమే పరిమితం కాలేదు. సాంకేతిక పరిజ్ఞానాన్ని సొంతంగా అభివృద్ధి చేసుకోవడంలో జియో చూపిన చొరవ పరిశ్రమ వర్గాలను ఆశ్చర్యపరిచింది. విదేశీ పరికరాలపై పూర్తిగా ఆధారపడకుండా, స్వదేశీ పరిజ్ఞానంతోనే 4G, 5G నెట్‌వర్క్ ఎకోసిస్టమ్‌ను నిర్మించింది. గృహ వినియోగదారుల కోసం ఫైబర్ బ్రాడ్‌బ్యాండ్ సేవలతో పాటు, వైర్లెస్ టెక్నాలజీతో పనిచేసే ‘జియో ఎయిర్ ఫైబర్’ను దేశవ్యాప్తంగా విస్తరించింది. ప్రస్తుతం టెలికాం స్థాయిని దాటి క్లౌడ్ కంప్యూటింగ్, ఆర్టిఫిషియల్ ఇంటెలిజెన్స్ (AI), అత్యాధునిక డిజిటల్ ఎంటర్‌ప్రైజ్ సేవల రంగంలోనూ గ్లోబల్ టెక్ దిగ్గజాలకు దీటుగా తన సామ్రాజ్యాన్ని విస్తరిస్తోంది.
దళాల్ స్ట్రీట్ దృష్టి మొత్తం జియో మెగా ఐపీవో పైనే
ఇప్పుడు అందరి కళ్లూ ‘జియో ప్లాట్‌ఫామ్స్’ పబ్లిక్ ఇష్యూ పైనే ఉన్నాయి. ఇప్పటివరకు భారత మార్కెట్లు చూసిన అన్ని ఐపీవో రికార్డులను ఇది బద్దలు కొట్టే అవకాశముందని ట్రేడింగ్ నిపుణులు విశ్లేషిస్తున్నారు. లాభాల బాటలో పయనిస్తూ, స్థిరమైన కస్టమర్ బేస్ కలిగి ఉన్న జియో ఈక్విటీ మార్కెట్లలోకి అడుగుపెడితే మార్కెట్ క్యాపిటలైజేషన్‌లో సరికొత్త చరిత్ర సృష్టించడం ఖాయం అని అంటున్నారు. ఒక సాధారణ టెలికాం ఆపరేటర్‌గా మొదలై, గ్లోబల్ టెక్ దిగ్గజంగా ఎదిగి, ఇప్పుడు మార్కెట్లలో భారీ పబ్లిక్ ఇష్యూకు సిద్ధమవుతున్న జియో ప్రస్థానం భారత కార్పొరేట్ విప్లవానికి ఒక ప్రత్యక్ష నిదర్శనం.
