తెలంగాణ పాలిటిక్స్‌లో కొత్త టర్న్..
రాముడా? శివుడా?
దేవుళ్ల చుట్టూ వేడెక్కిన రాజకీయం!
తెలంగాణ రాజకీయాల్లో ఇప్పటివరకు ఎన్నికలు, అభివృద్ధి, ప్రాంతీయ హక్కులు, సంక్షేమం, కుల సమీకరణాలు, హామీలు.. ఇలా ఎన్నో అంశాలు రాజకీయ అజెండాగా మారాయి. కానీ ఇప్పుడు సీన్ కొంచెం కొత్తగా కనిపిస్తోంది. రాజకీయ చర్చ నేరుగా దేవుళ్ల చుట్టూ తిరుగుతోంది. అది కూడా రాముడు, శివుడి చుట్టూ.
ముఖ్యమంత్రి రేవంత్ రెడ్డి ఢిల్లీలో చేసిన తాజా వ్యాఖ్యలు తెలంగాణ రాజకీయాల్లో కొత్త చర్చకు తెరతీశాయి. ఉత్తరాది–దక్షిణాది రాజకీయ సంస్కృతిని ప్రస్తావిస్తూ.. రాముడి పేరు, శివుడి పేరు, జై శ్రీరామ్, హర హర మహాదేవ్ అంటూ ఆయన చేసిన వ్యాఖ్యలు ఒక్కసారిగా రాజకీయ దుమారం రేపాయి. ముఖ్యంగా శివుడు పేదల దేవుడని, రాముడు సంపన్నుల దేవుడని ఆయన చేసిన వ్యాఖ్యలు తీవ్ర చర్చకు దారితీశాయి. బీజేపీ రాముడిని రాజకీయ ప్రతీకగా చేసుకుందని రేవంత్ రెడ్డి వ్యాఖ్యానించారు.
బండి సంజయ్ కౌంటర్
వివాదం ఇక్కడితో ఆగలేదు. దీనికి కేంద్ర మంత్రి బండి సంజయ్ కౌంటర్ ఇచ్చారు. రాముడు, శివుడి మధ్య రాజకీయ విభజన సరికాదని ఆయన అన్నారు. తెలంగాణలోనే వేములవాడను దక్షిణ కాశీగా, భద్రాచలాన్ని దక్షిణ అయోధ్యగా ప్రస్తావిస్తూ.. రాముడు, శివుడి భక్తిని ప్రాంతాలు, రాజకీయాల ఆధారంగా విడదీయకూడదన్నది ఆయన వాదన.
కాంగ్రెస్, బీజేపీపై కేటీఆర్ ఫైర్
జాతీయ పార్టీలైన బీజేపీ, కాంగ్రెస్ పార్టీలు మతం, దేవుళ్ల పేరుతో రాజకీయాలు చేయడం సిగ్గుచేటని బీఆర్‌ఎస్‌ వర్కింగ్‌ ప్రెసిడెంట్‌ కేటీఆర్ ఆగ్రహం వ్యక్తంచేశారు. దేశాన్ని మత ప్రాతిపదికన, హిందూ-ముస్లింలుగా విభజించేందుకు బీజేపీ ప్రయత్నిస్తుంటే, తెలంగాణ ముఖ్యమంత్రి మాత్రం రాముడు వర్సెస్ శివుడు అంటూ మన దేవుళ్ల మధ్యనే విభజన తెచ్చేలా మాట్లాడుతున్నారని మండిపడ్డారు. ఇదేనా రెండు జాతీయ పార్టీల ఎజెండా? అని ప్రశ్నించారు.
తెలంగాణ పాలిటిక్స్ లో ట్విస్ట్
ఇక్కడే అసలు ఆసక్తికరమైన విషయం మొదలవుతోంది. తెలంగాణ రాజకీయాల్లో ఇప్పటివరకు రాముడు వర్సెస్ శివుడు అనే రాజకీయ ఫ్రేమ్ ఇంత స్పష్టంగా కనిపించలేదు. రాముడు ఒక వైపు.. శివుడు మరో వైపు అన్నట్టుగా రాజకీయ వ్యాఖ్యలు రావడం, వాటికి వెంటనే రాజకీయ కౌంటర్లు రావడం.. ఇప్పుడు చర్చను కొత్త దిశలోకి తీసుకెళ్లింది. ఇది కేవలం ఇద్దరు నేతల మధ్య మాటల యుద్ధంగా చూడాలా? లేక తెలంగాణ రాజకీయాల్లో మతపరమైన ప్రతీకలకు కొత్త రాజకీయ అర్థాలు జోడించే ప్రయత్నంగా చూడాలా? అన్న చర్చ మొదలైంది.
ఇప్పటివరకు తెలంగాణలో దేవుడి పేరు రాజకీయాల్లో వినిపించలేదని కాదు. ఆలయాలు, పండుగలు, ఆధ్యాత్మిక కార్యక్రమాలు, దేవాలయ అభివృద్ధి, యాత్రలు.. ఇవన్నీ రాజకీయ ప్రసంగాల్లో భాగంగానే ఉన్నాయి. కానీ ఇప్పుడు ఒక దేవుడి ప్రతీకను మరో దేవుడి ప్రతీకతో పోల్చుతూ రాజకీయ వాదన సాగడం మాత్రం ప్రత్యేకమైన పరిణామంగా కనిపిస్తోంది. ఇది మరో ఆసక్తికరమైన అంశాన్ని కూడా తెరపైకి తెస్తోంది.
తెలంగాణలో శైవ సంప్రదాయానికి ఉన్న బలమైన చారిత్రక, సాంస్కృతిక గుర్తింపు ఒకవైపు.. వైష్ణవ సంప్రదాయానికి ఉన్న విస్తృత భక్తి పరంపర మరోవైపు. వేములవాడ రాజరాజేశ్వర స్వామి నుంచి భద్రాచలం శ్రీరాముడి వరకు.. తెలంగాణ భక్తి సంస్కృతిలో రెండు సంప్రదాయాలకూ ప్రత్యేక స్థానం ఉంది. ఒకటి శైవ క్షేత్రం.. మరొకటి వైష్ణవ సంప్రదాయానికి ప్రధాన క్షేత్రం. ఈ రెండు పేర్లూ తెలంగాణ ప్రజల ఆధ్యాత్మిక జీవితంలో చాలాకాలంగా భాగమే.
అందుకే ఇప్పుడు రాజకీయ వేదికపై రాముడు, శివుడు ఇద్దరి పేర్లు ఒకే చర్చలోకి రావడం ఆసక్తిని పెంచుతోంది. రేవంత్ రెడ్డి వ్యాఖ్యల్లో ప్రధానంగా కనిపించింది ఉత్తరాది- దక్షిణాది రాజకీయ సంస్కృతి అనే వాదన. దానికి ఆయన రాముడు, శివుడి ప్రతీకలను అనుసంధానించారు. మరోవైపు బండి సంజయ్ స్పందనలో రాముడు, శివుడు ఇద్దరినీ రాజకీయంగా విడదీయకూడదనే వాదన ముందుకు వచ్చింది. ఇదే సమయంలో కేటీఆర్ రెండు పార్టీల గేమ్ అంటూ నిప్పులు చెరిగారు. అంటే.. ఒకే అంశంపై ఇప్పుడు తెలంగాణ పాలిటిక్స్ లో వాదోపవాదాలు నడుస్తున్నాయి.
రాజకీయాలకే పరిమితమా..?
ఇక దీని ప్రభావం రాజకీయాలకే పరిమితమవుతుందా? లేక రాబోయే రోజుల్లో మరింత విస్తరిస్తుందా? అనేది చూడాలి. ఎందుకంటే తెలంగాణ రాజకీయాల్లో దేవాలయాలు, ఆధ్యాత్మికత, హిందూ సంప్రదాయాలు కొత్త అంశాలు కావు. కానీ ఏ దేవుడి ప్రతీకను ఏ రాజకీయ సందేశానికి ఉపయోగించాలి? అనే చర్చ మాత్రం ఇప్పుడు మరింత స్పష్టంగా బయటకు వస్తోంది.
ఇప్పటివరకు తెలంగాణ రాజకీయాల్లో ప్రధాన పోటీ పార్టీలు, నాయకులు, సిద్ధాంతాలు, సామాజిక సమీకరణాల చుట్టూ సాగింది. ఇప్పుడు దానికి మరో వాదన చేరినట్టుగా కనిపిస్తోంది. రాముడి పేరు ఒక రాజకీయ ప్రతీకగా.. శివుడి పేరు మరో రాజకీయ ప్రతీకగా.. ఇద్దరు దేవుళ్ల భక్తి పరంపరల మధ్య ఎలాంటి విభేదం లేకపోయినా, రాజకీయ వేదికపై మాత్రం కొత్త చర్చ మొదలైంది.
అసలు.. తెలంగాణ రాజకీయాల్లో దేవుళ్ల పేర్లు ఇంత కీలకమైన రాజకీయ భాషగా ఎలా మారుతున్నాయి? రాముడి చుట్టూ రాజకీయ సందేశం.. శివుడి చుట్టూ మరో రాజకీయ సందేశం.. వాటిపై ప్రత్యర్థి పార్టీల కౌంటర్లు.. ఇలా చూస్తే తెలంగాణ రాజకీయాల్లో కొత్త అధ్యాయం మొదలైనట్టే కనిపిస్తోంది.
ఇది నిజంగా శైవం వర్సెస్ వైష్ణవం రాజకీయమా? లేక రాజకీయ నాయకులు తమ తమ వాదనలకు శైవ, వైష్ణవ ప్రతీకలను ఉపయోగిస్తున్న కొత్త రాజకీయ భాషా? దీనికి సమాధానం రాబోయే రోజుల్లో తెలంగాణ రాజకీయాలే చెప్పాలి.
