ఛత్తీస్గఢ్కు చెందిన ఐదుగురు మిత్రుల నేపాల్ ఆధ్యాత్మిక యాత్ర ఊహించని భయానక అనుభవంగా మారింది. ఇటీవల నేపాల్ను ముంచెత్తిన ఘోరమైన వరద బీభత్సం నుంచి వారు కేవలం ఒక కప్పు టీ తాగడం వల్ల త్రుటిలో ప్రాణాలతో బయటపడటం గమనార్హం. రాయ్పూర్కు చెందిన నారాయణ్ సేన్, దినేష్ ఓఝా, ప్రేమ్ సింగ్ జగత్, యతేంద్ర ప్రకాశ్, దినేష్ సింగ్ ఠాకూర్ అనే ఐదుగురు స్నేహితులు పశుపతినాథ్, మనోకామన ఆలయాల దర్శనం కోసం ఆగస్టు 21న అద్దె కారులో నేపాల్ పర్యటనకు బయల్దేరారు.
ఆగస్టు 26న ధాదింగ్ జిల్లాలోని మలేఖు పట్టణ సమీపంలో ప్రయాణిస్తున్న సమయంలో వారు టీ తాగడానికి ఒక హోటల్ వద్ద సుమారు 15 నిమిషాల పాటు ఆగారు. వారు టీ తాగుతున్న సమయంలోనే భోటే కోశి, త్రిశూలి నదులు ఆకస్మికంగా ఉగ్రరూపం దాల్చి ముందుకు వెళ్లే మార్గంలోని వంతెనను కొట్టుకుపోయేలా చేశాయి. తాము గనక మరో 10 నుంచి 15 నిమిషాల ముందుగా బయలుదేరి ఉంటే నేరుగా ఆ ప్రళయంలో చిక్కుకుని ప్రాణాలు కోల్పోయేవారమని, టీ తాగడమే తమను కాపాడిందని ఆ స్నేహితులు భావోద్వేగంతో వెల్లడించారు.
ఎత్తైన ప్రదేశంలో సురక్షితంగా ఉన్నప్పటికీ, ఉప్పొంగిన త్రిశూలి నది ప్రవాహంలో కార్లు, మృతదేహాలు కొట్టుకుపోవడాన్ని వారు కళ్లారా చూసి తీవ్ర దిగ్భ్రాంతికి గురయ్యారు. తదుపరి రెండు రాత్రులు వారు అద్దె కారులోనే భయంతో కాలం గడిపారు. భారత ప్రభుత్వ హెల్ప్లైన్, స్థానిక అధికారుల సాయంతో ఇంటర్నెట్ ద్వారా కుటుంబ సభ్యులతో నిరంతరం సంప్రదింపులు జరుపుతూ, పరమశివుని నామస్మరణ చేస్తూ ఆ క్లిష్ట పరిస్థితులను తట్టుకున్నట్లు వారు పేర్కొన్నారు.
అనంతరం భారత ప్రభుత్వం చేపట్టిన సహాయక చర్యలు, స్థానికులు అందించిన సహకారంతో ఆగస్టు 28న నేపాల్ నుంచి బయలుదేరి శనివారం నాటికి తమ స్వస్థలానికి సురక్షితంగా చేరుకున్నారు. చావు అంచుల దాకా వెళ్లి ప్రాణాలతో తిరిగి రావడం ఎంతో సంతోషాన్నిచ్చినప్పటికీ, తమ కళ్ల ముందే జరిగిన ఆ ప్రళయ దృశ్యాలు జీవితాంతం తమను వెంటాడుతూనే ఉంటాయని ఆ ఐదుగురు స్నేహితులు ఆవేదన వ్యక్తం చేశారు.
