జోగులాంబ గద్వాల జిల్లాలోని ప్రసిద్ధ జూరాల ప్రాజెక్టు వద్ద తీవ్ర ఉద్రిక్త వాతావరణం నెలకొంది. సాగునీటి విడుదల విషయంలో కాంగ్రెస్ ప్రభుత్వం అవలంభిస్తున్న వైఖరికి నిరసనగా, పంటలను కాపాడుకునేందుకు జూరాల వద్ద భారీ ధర్నా నిర్వహించేందుకు రైతులు సమాయత్తమయ్యారు. ఈ నేపథ్యంలో ఎలాంటి అవాంఛనీయ సంఘటనలు జరగకుండా ముందస్తు జాగ్రత్తగా పోలీసులు జూరాల ప్రాజెక్టు పరిసర ప్రాంతాలను తమ అదుపులోకి తీసుకున్నారు. ప్రాజెక్టుకు వెళ్లే అన్ని ప్రధాన రహదారుల్లో పోలీసు బలగాలను భారీగా మోహరించారు.
పంట పొలాలకు సకాలంలో సాగునీరు అందకపోవడంతో ఆయకట్టు పరిధిలోని వేలాది ఎకరాల్లో పంటలు ఎండిపోయే ప్రమాదం ఏర్పడిందని రైతాంగం తీవ్ర ఆందోళన వ్యక్తం చేస్తోంది. జూరాల నిండినప్పటికీ అధికారుల నిర్లక్ష్యం, ప్రభుత్వ నిమ్మకు నీరెత్తిన వైఖరి వల్ల ఆయకట్టుకు నీళ్లు విడుదల చేయడం లేదని రైతులు మండిపడుతున్నారు. తమ ఆవేదనను ప్రభుత్వం దృష్టికి తీసుకెళ్లేందుకు, హక్కుగా రావాల్సిన నీటిని సాధించుకునేందుకు జూరాల ప్రాజెక్టు వైపు పాదయాత్రగా వెళ్లేందుకు రైతులు సన్నద్ధమయ్యారు.
రైతుల ఆందోళన పిలుపుతో అప్రమత్తమైన పోలీస్ యంత్రాంగం ప్రాజెక్టు పరిసరాల్లో కట్టుదిట్టమైన భద్రతా ఏర్పాట్లు చేసింది. జూరాలకు దారితీసే ప్రతి మార్గంలోనూ ఎక్కడికక్కడ బారికేడ్లు, చెక్పోస్టులు ఏర్పాటు చేసి రాకపోకలను తీవ్రంగా నియంత్రిస్తున్నారు. వివిధ గ్రామాల నుంచి ప్రాజెక్టు వైపు వస్తున్న రైతులను ముందస్తుగా అడ్డుకుని, రోడ్లపైనే నిలిపివేస్తున్నారు. పలువురు రైతు నాయకులను ముందస్తుగా అదుపులోకి తీసుకుంటున్నట్లు తెలుస్తోంది.
ప్రాజెక్టు ప్రాంతం పోలీస్ బెటాలియన్ల రాకతో సైనిక వ్యూహంలా మారిపోవడంతో స్థానిక గ్రామాల ప్రజలు తీవ్ర భయాందోళనకు గురవుతున్నారు. పోలీసుల ఆంక్షలను దాటుకుని ధర్నా స్థలికి చేరుకోవడానికి రైతులు ప్రయత్నిస్తుండటంతో జూరాల పరిసరాల్లో తీవ్ర ఉత్కంఠ వాతావరణం చోటుచేసుకుంది. ప్రభుత్వం తక్షణమే స్పందించి సాగునీటి విడుదలపై స్పష్టమైన హామీ ఇవ్వాలని, తమను అడ్డుకోవడం కాదని రైతు సంఘాల నాయకులు డిమాండ్ చేస్తున్నారు.
