ఖమ్మం నగరంలోని శ్రీనివాసనగర్ ప్రాంతంలో నివాసముంటున్న నిరుపేద కుటుంబాలకు మున్సిపల్ అధికారులు ఇళ్ల కూల్చివేత నోటీసులు జారీ చేయడం తీవ్ర కలకలం రేపింది. తమ ఇళ్లను కూల్చివేస్తామని బెదిరిస్తున్నారని, ఆక్రమణల పేరుతో నోటీసులు ఇచ్చి ఖాళీ చేయాలనడం అన్యాయమని స్థానికులు ఆవేదన వ్యక్తం చేస్తున్నారు. ఇటీవలే ఈ విషయమై బాధితులు రోడ్డుపై ధర్నాకు దిగారు.
ఈ నేపథ్యంలో తండ్రి లేక, చెవుడు-మూగ ఉన్న తల్లిని పోషించుకుంటున్న ఓ యువతి కాంగ్రెస్ ప్రభుత్వం తమ నివాసాలను తొలగించేందుకు సిద్ధపడటంపై కన్నీరుమున్నీరుగా విలపిస్తూ మీడియాతో తన ఆవేదనను వ్యక్తం చేసింది. బాధితురాలు తెలుపుతున్న వివరాల ప్రకారం.. గత కేసీఆర్ ప్రభుత్వ హయాంలో తమకు పట్టాలు కల్పించి, మౌలిక వసతులైన రక్షిత మంచి నీరు, విద్యుత్ కనెక్షన్లు, సీసీరోడ్ల నిర్మాణం చేపట్టారని తెలిపింది. కానీ ప్రస్తుత కాంగ్రెస్ ప్రభుత్వం అధికారంలోకి రాగానే తమ ఇళ్లను కూల్చివేయడానికి నోటీసులు ఇవ్వడం దారుణమని వాపోయింది.
అధికారుల అత్యుత్సాహం వల్ల తాము రోడ్డున పడే పరిస్థితి వచ్చిందని, తక్షణమే నోటీసులను ఉపసంహరించుకోవాలని స్థానిక ప్రజలు నిరసన చేపట్టారు. నోటీసుల ఉపసంహరణ జరగకపోతే నిరసనలను మరింత ఉధృతం చేస్తామని నివాసితులు హెచ్చరిస్తున్నారు. దశాబ్దాలుగా నివాసముంటున్న తమకు పూర్తి స్థాయిలో న్యాయం చేయాలని, ప్రత్యామ్నాయం చూపకుండా ఆవాసాలను తొలగిస్తే తమ భవిష్యత్తు ప్రశ్నార్థకంగా మారుతుందని ప్రభుత్వానికి విజ్ఞప్తి చేస్తున్నారు.
ఖమ్మంలో ఇళ్ల కూల్చివేతల నోటీసులతో స్థానికులు తీవ్ర ఆగ్రహం వ్యక్తం చేస్తున్నారు. ఎలాంటి ప్రత్యామ్నాయ వసతి చూపకుండా, ఉన్నట్టుండి నివాసాలను ఖాళీ చేయమనడం దారుణమని ఆవేదన చెందుతున్నారు. స్థానిక ప్రజాప్రతినిధులు, ఉన్నతాధికారులు తక్షణమే జోక్యం చేసుకుని నోటీసులను వెనక్కి తీసుకోవాలని, పేద కుటుంబాలకు భరోసా కల్పించాలని డిమాండ్ చేస్తున్నారు. ప్రభుత్వం తమ మొర ఆలకించకపోతే కలెక్టరేట్ ముట్టడితో పాటు, ఆందోళన కార్యక్రమాలను మరింత తీవ్రతరం చేస్తామని బాధితులు హెచ్చరిస్తున్నారు.
