పశ్చిమాసియాలో రాజకీయ, సైనిక ఉద్రిక్తతలు కొనసాగుతున్నప్పటికీ, ముడిచమురు (Crude Oil) ధరలు బ్యారెల్కు 101.75 డాలర్ల స్థాయికి దిగిరావడం అంతర్జాతీయ మార్కెట్లకు నిలకడనిచ్చింది. అమెరికా ఫ్యూచర్స్ మార్కెట్లు లాభాల్లో కదులుతుండగా, ప్రధాన ఆసియా స్టాక్ ఎక్స్ఛేంజీలన్నీ సానుకూల ధోరణిలో ట్రేడ్ అవుతున్నాయి. అయితే, గిఫ్ట్ నిఫ్టీ (GIFT Nifty) స్వల్ప నష్టాలతో ప్రతిబింబిస్తుండటంతో, మన దేశీయ సూచీలు నేడు ఫ్లాట్ నుంచి స్వల్ప గ్యాప్ డౌన్తో ప్రారంభమయ్యే అవకాశాలు కనిపిస్తున్నాయి.
శుక్రవారం ముగిసిన గత సెషన్లో అమెరికా టెక్ సూచీ నాస్డాక్ 0.39 శాతం, ఎస్ అండ్ పీ 0.17 శాతం మేర పుంజుకోగా, సోమవారం ఉదయం డౌజోన్స్ ఫ్యూచర్స్ 0.25 శాతం లాభంతో కొనసాగుతోంది. మరోవైపు, యూరోపియన్ మార్కెట్లలో ఫ్రాన్స్ సీఏసీ 1.51 శాతం, జర్మనీ డీఏఎక్స్ 1.63 శాతం నష్టపోగా, యూకే ఎఫ్టీఎస్ఈ స్థిరంగా ముగిసింది. ఆసియా వేదికలపై దక్షిణ కొరియా కోస్పీ 1.49 శాతం, జపాన్ నిక్కీ 1.36 శాతం, తైవాన్ 0.83 శాతం, హాంగ్కాంగ్ హాంగ్సెంగ్ 0.55 శాతం, చైనా షాంఘై 0.53 శాతం చొప్పున లాభాల్లో పయనిస్తున్నాయి.
దేశీయ మార్కెట్లో ఆసక్తికరమైన అంశమేమిటంటే, విదేశీ సంస్థాగత పెట్టుబడిదారులు (FIIs) వరుసగా ఏడు సెషన్ల అమ్మకాల అనంతరం మళ్లీ నికర కొనుగోలుదారులుగా మారడం. గత సెషన్లో ఎఫ్ఐఐలు రూ.599.54కోట్ల విలువైన షేర్లను కొనుగోలు చేయగా, దేశీయ సంస్థాగత పెట్టుబడిదారులు(DIIs) వరుసగా 28వ సెషన్లోనూ రూ.1,019.69కోట్ల మేర నికర కొనుగోళ్లు జరిపారు.
కరెన్సీ విభాగంలో యూఎస్ డాలర్తో రూపాయి మారకం విలువ 6 పైసలు బలపడి 95.88వద్ద నిలవగా, డాలర్ ఇండెక్స్ 100.25 వద్ద, పదేళ్ల బాండ్ ఈల్డ్ 5 శాతం వద్ద ట్రేడ్ అవుతున్నాయి. నిఫ్టీ పుట్-కాల్ రేషియో (PCR) 0.99 నుంచి 1.06కి పెరగడం, నిఫ్టీ విక్స్ (VIX) 7.36 శాతం తగ్గి 11.38కి పడిపోవడం మార్కెట్లో హెచ్చుతగ్గుల తీవ్రత తగ్గే సంకేతాలను ఇస్తున్నాయి.
