రష్యా నుంచి ముడి చమురు దిగుమతి చేసుకుంటున్న దేశాలపై అమెరికా ప్రభుత్వం విధించిన ఆంక్షల నుంచి భారత్‌కు తాత్కాలిక ఊరట లభించింది. భారత్ అమెరికాకు అత్యంత ముఖ్యమైన మిత్రదేశమని, ఇంధన అవసరాల కోసం రష్యాపై ఉన్న ఆధారపడటాన్ని ఒక్క రోజులో మార్చుకోవడం సాధ్యం కాదని అమెరికా విదేశాంగ మంత్రి మార్కో రుబియో (Marco Rubio) స్పష్టం చేశారు. రష్యా ఇంధన కొనుగోళ్లపై కఠినమైన చట్టాల నుంచి భారత్ వంటి ప్రధాన దేశాలకు తాత్కాలికంగా మినహాయింపు ఇస్తున్నట్లు ట్రంప్ యంత్రాంగం ప్రకటించిన నేపథ్యంలో ఆయన ఈ వ్యాఖ్యలు చేశారు.
అమెరికా అధ్యక్షుడు డొనాల్డ్ ట్రంప్ ‘లిండ్సే ఓ. గ్రాహం శాంక్షనింగ్ రష్యా అండ్ ఇరాన్ యాక్ట్’ కింద ఈ వెయివర్‌పై సంతకం చేశారు. ఈ చట్టం ప్రకారం రష్యా నుంచి అధిక మొత్తంలో చమురు, గ్యాస్ కొనుగోలు చేసే టాప్-5 దేశాల నుంచి అమెరికా దిగుమతి చేసుకునే వస్తువులపై 100శాతం వరకు టారిఫ్‌లు విధించే అధికారం ఉంది. అయితే జాతీయ ప్రయోజనాలు, ప్రపంచ ఇంధన మార్కెట్లో స్థిరత్వాన్ని దృష్టిలో ఉంచుకుని ట్రంప్ ఈ నిబంధనలను తాత్కాలికంగా నిలిపివేశారు. భవిష్యత్తులో ఈ ప్రభావంపై అధ్యయనం చేసేందుకు సమయం పడుతుందని అమెరికా వర్గాలు వెల్లడించాయి.
వాషింగ్టన్‌లో విలేకరులతో మాట్లాడిన మార్కో రుబియో.. ఈ ఆంక్షలు కేవలం రష్యానే కాకుండా భారత్ వంటి మిత్రదేశాల ఆర్థిక వ్యవస్థలపై కూడా ప్రభావం చూపుతాయని తెలిపారు. భారత్ తన ఇంధన వనరులను ఇతర దేశాల వైపు మళ్లించే ప్రయత్నం చేస్తున్నప్పటికీ, రష్యా నుంచి ఇంకా పెద్దఎత్తున దిగుమతులు కొనసాగుతున్నాయని పేర్కొన్నారు. ఉక్రెయిన్ యుద్ధం తర్వాత చౌక ధరలకు లభిస్తున్న రష్యా చమురుపై భారత్ ఆధారపడటం వాస్తవమని, ఈ పరిస్థితి ఒక్కరోజులో మారబోదని అమెరికా అర్థం చేసుకుందని తెలిపారు.
ప్రస్తుతం అమెరికా విదేశాంగ మంత్రి మార్కో రుబియో భారత్‌లో పర్యటిస్తున్న తరుణంలో ఈ నిర్ణయం ప్రాధాన్యత సంతరించుకుంది. భారత విదేశాంగ మంత్రి ఎస్.జైశంకర్‌తో సమావేశమై ద్వైపాక్షిక సంబంధాలు, ఇంధన భద్రతపై ఆయన చర్చించనున్నారు. ప్రస్తుతానికి ఈ మినహాయింపు భారత్‌కు పెద్ద ఉపశమనాన్ని ఇచ్చినప్పటికీ, రాబోయే రోజుల్లో మార్కెట్ పరిస్థితులను బట్టి అమెరికా విధానాలు ఎలా ఉంటాయనే దానిపై సర్వత్రా ఆసక్తి నెలకొంది.
