రాష్ట్రంలో సాగునీటి ప్రాజెక్టులు, నీటి తరలింపు వ్యవహారంపై అధికార కాంగ్రెస్, విపక్ష బీఆర్ఎస్ పార్టీల మధ్య రాజకీయ రాజకీయం తీవ్ర స్థాయికి చేరింది. కుమ్రం భీమ్ ఆసిఫాబాద్ జిల్లా తుమ్మిడిహెట్టి నుంచి ఎల్లంపల్లి ప్రాజెక్టుకు గ్రావిటీ ద్వారా నీటిని తరలించడం సాధ్యమని నిరూపిస్తే తాను తక్షణమే ఎమ్మెల్యే పదవికి రాజీనామా చేస్తానని బీఆర్ఎస్ సీనియర్ నేత, మాజీ మంత్రి తానీరు హరీశ్‌రావు సంచలన సవాల్ విసిరారు. ఒకవేళ అది సాధ్యం కాదని తేలితే రాష్ట్ర నీటిపారుదల శాఖ మంత్రి ఎన్. ఉత్తమ్‌కుమార్‌రెడ్డి తన పదవికి రాజీనామా చేయడానికి సిద్ధమా? అని ఆయన నిలదీశారు.
రాష్ట్రంలో ప్రస్తుతం నెలకొన్న పరిస్థితిపై స్పందిస్తూ కాంగ్రెస్ ప్రభుత్వంపై హరీశ్‌రావు తీవ్రస్థాయిలో ధ్వజమెత్తారు. ’ప్రస్తుతం తెలంగాణలో కనిపిస్తున్న కరవు కాలం తెచ్చిన కరవు కాదు.. కాంగ్రెస్ ప్రభుత్వ వైఫల్యం తెచ్చిన కరవు’ అని ఆయన ఘాటుగా విమర్శించారు. కృష్ణా, గోదావరి నదుల్లో సరిపడా నీటి లభ్యత ఉన్నప్పటికీ, ప్రభుత్వం పంపుహౌస్‌ల ద్వారా ఎత్తిపోతలు చేపట్టకపోవడం వల్లే రైతులు తీవ్రంగా నష్టపోతున్నారని ఆవేదన వ్యక్తం చేశారు. పొరుగు రాష్ట్రమైన ఆంధ్రప్రదేశ్‌లో 33శాతం వర్షపాతం లోటు ఉన్నప్పటికీ అక్కడ 'క్రాప్‌ హాలిడే' ప్రకటించలేదని, కానీ కేవలం 17శాతం మాత్రమే వర్షపాతం లోటు ఉన్న తెలంగాణలో ప్రభుత్వం ఎందుకు క్రాప్‌ హాలిడే వాతావరణం తెచ్చిందో సమాధానం చెప్పాలని డిమాండ్ చేశారు.
మేడిగడ్డ బ్యారేజీకి తక్షణమే పునరుద్ధరణ, మరమ్మతు పనులు చేపట్టి, కన్నెపల్లి పంపుహౌస్ నుంచి నీటిని ఎత్తిపోసి ఆయకట్టును కాపాడాలని హరీశ్‌రావు ప్రభుత్వాన్ని కోరారు. తుమ్మిడిహెట్టి వద్ద కాంగ్రెస్ ప్రభుత్వం రూ.25వేల కోట్ల అంచనా వ్యయంతో ప్రాజెక్టు నిర్మిస్తామని చెబుతోందని, అసలు ఆ ప్రాజెక్టుకు సంబంధించిన డీపీఆర్ (DPR)ను ఎందుకు ప్రజల ముందుకు తీసుకురావడం లేదని ప్రశ్నించారు.
తుమ్మిడిహెట్టి వద్ద తగినంత నీటి లభ్యత లేదని కేంద్ర జల సంఘం (CWC) స్పష్టమైన నివేదిక ఇచ్చిన తర్వాతే, గత కేసీఆర్ ప్రభుత్వం మేడిగడ్డ వద్ద కాళేశ్వరం ప్రాజెక్టును తలపెట్టిందని ఆయన గుర్తుచేశారు. గ్రావిటీ నీటి తరలింపుపై ప్రభుత్వం చెబుతున్నవన్నీ అబద్ధాలని మండిపడిన హరీశ్‌రావు వ్యాఖ్యలు ప్రస్తుతం తెలంగాణ రాజకీయ వర్గాల్లో చర్చనీయమైంది. దీనిపై నీటిపారుదల శాఖ మంత్రి ఉత్తమ్‌కుమార్‌రెడ్డి, కాంగ్రెస్ నాయకత్వం నుంచి ఎలాంటి ప్రత్యుత్తరం వస్తుందనేది ఆసక్తికరంగా మారింది.
