వానాకాలం, చలికాలంలో శరీరానికి శక్తి, పోషకాలు అందించే సంప్రదాయ వంటకాల్లో గోంద్ లడ్డూలు కూడా ఒకటి. గోంద్ను కొన్ని ప్రాంతాల్లో ఆహారంలో ఉపయోగిస్తారు. దీనిలో డ్రై ఫ్రూట్స్, గోధుమ పిండి, నెయ్యి, బెల్లం వంటి పదార్థాలు కలవడంతో ఇది శక్తినిచ్చే పోషకాహారంగా మారుతుంది.
అయితే, ఈ లడ్డూలు తింటే చిటికెలో ఇమ్యూనిటీ పెరుగుతుందని లేదా అన్ని రకాల వ్యాధుల నుంచి రక్షణ లభిస్తుందని చెప్పడం సరైనది కాదు. సమతుల్యమైన ఆహారంలో భాగంగా తీసుకుంటే శరీరానికి అవసరమైన శక్తి, కొంత పోషక విలువ అందించడంలో ఇవి సహాయపడవచ్చని ఆరోగ్య నిపుణులు చెబుతున్నారు.
మరి ఈ రుచికరమైన గోంద్ లడ్డూలను ఇంట్లో ఎలా తయారు చేయాలో ఇప్పుడు తెలుసుకుందాం.
ఈ రెసిపీకి కావాల్సిన పదార్థాలు: అర కప్పు గోంద్, ఒక కప్పు గోధుమ పిండి, సుమారు అర కప్పు నెయ్యి, ఒక కప్పు బెల్లం పొడి, పావు కప్పు బాదం, పావు కప్పు జీడిపప్పు, పావు కప్పు వాల్నట్స్, పావు కప్పు ఎండు కొబ్బరి తురుము, అర టేబుల్ స్పూన్ యాలకుల పొడి.
ముందుగా ఒక పాన్లో కొద్దిగా నెయ్యి వేసి వేడి చేయాలి. ఆ తర్వాత గోంద్ను తక్కువ లేదా మీడియం మంటపై వేయించాలి. వేయిస్తున్నప్పుడు గోంద్ పొంగి తేలికగా మారుతుంది. పూర్తిగా వేగిన తర్వాత దాన్ని పక్కన పెట్టి చల్లార్చాలి. చల్లారిన తర్వాత మిక్సీలో వేసి కొద్దిగా పొడి చేసుకోవాలి.
ఇప్పుడు అదే పాన్లో బాదం, జీడిపప్పు, వాల్నట్స్, ఎండు కొబ్బరి తురుమును విడివిడిగా లేదా కలిపి వేయించాలి. వీటిని కూడా పక్కన పెట్టుకోవాలి. తర్వాత పాన్లో మిగిలిన నెయ్యి వేసి గోధుమ పిండిని తక్కువ మంటపై నెమ్మదిగా వేయించాలి. పిండి నుంచి మంచి వాసన వచ్చి, కొద్దిగా రంగు మారే వరకు కలుపుతూ వేయించాలి. పిండి మాడి పోకుండా జాగ్రత్తగా ఉండాలి.. తర్వాత ముందుగా వేయించిన గోంద్, డ్రై ఫ్రూట్స్, యాలకుల పొడి వేసి బాగా కలపాలి.
కొద్దిగా చల్లారిన తర్వాత బెల్లం పొడి కలపాలి. అన్నీ బాగా కలిసిన తర్వాత చేతికి కొద్దిగా నెయ్యి రాసుకుని, మిశ్రమాన్ని చిన్న చిన్న ఉండలుగా తీసుకుని లడ్డూలుగా చేసుకోవాలి. అంతే.. రుచికరమైన గోంద్ లడ్డూలు సిద్ధం. ఈ లడ్డూలను పరిమిత మోతాదులో తీసుకోవడం మంచిది. ముఖ్యంగా మధుమేహం, అలర్జీలు లేదా ఇతర ఆరోగ్య సమస్యలు ఉన్నవారు తమ ఆహారంలో బెల్లం, నెయ్యి, డ్రై ఫ్రూట్స్ వంటి పదార్థాలను చేర్చే ముందు వైద్య నిపుణుల సలహా తీసుకోవడం మంచిది.
ముఖ్య గమనిక: ఈ సమాచారం కేవలం మీ అవగాహన కోసం మాత్రమే. ఇది నిపుణుల లేదా వైద్యుల సూచనలకు ప్రత్యామ్నాయం కాదు. ఆరోగ్యానికి సంబంధించిన ఎలాంటి నిర్ణయాలైనా తీసుకునే ముందు ఖచ్చితంగా మీ డాక్టర్ను సంప్రదించాల్సిందిగా మనవి!..
