ప్రపంచకప్-2026 రేసు నుంచి పోర్చుగల్ జట్టు అర్ధాంతరంగా నిష్క్రమించిన విషయం తెలిసిందే. ఈ బాధ నుంచి కోలుకోక ముందే జట్టు స్టార్ ప్లేయర్ క్రిస్టియానో రొనాల్డో సోషల్ మీడియాలో పెట్టిన ఒక పోస్ట్ తీవ్ర దుమారం రేపుతోంది. మెగా టోర్నీలో ఘోర పరాజయం పాలై అభిమానులంతా తీవ్ర నిరాశలో మునిగిపోయిన ఈ క్లిష్ట సమయంలో, ఆయన పాత విజయాలను నెమరువేసుకోవడంపై ఫుట్బాల్ ప్రేమికులు తీవ్ర ఆగ్రహం వ్యక్తం చేస్తున్నారు.
టైమింగ్ లేకుండా రొనాల్డో వ్యవహరించిన తీరుపై నెటిజన్లు సోషల్ మీడియా ప్లాట్ఫామ్లలో విమర్శల వర్షం కురిపిస్తూ ట్రోలింగ్కు దిగుతున్నారు. అసలు కారణం ఏంటంటే.. పోర్చుగల్ ఫుట్బాల్ చరిత్రలోనే సువర్ణాక్షరాలతో లిఖించదగ్గ 'యూరో 2016' ఛాంపియన్షిప్ విజయం సాధించి పదేళ్లు పూర్తయిన సందర్భంగా రొనాల్డో తన ఖాతాలో ఒక పోస్ట్ పెట్టాడు. ఆనాటి మధుర క్షణాల ఫొటోను పంచుకుంటూ.. "ఇది లక్షలాది మంది సాధించిన విజయం" అంటూ క్యాప్షన్ ఇచ్చాడు.
అయితే, ఇదే తన కెరీర్లో చివరి ప్రపంచకప్ అని ముందే ప్రకటించి, టోర్నీ నుంచి కన్నీళ్లతో నిష్క్రమించిన కొద్ది రోజులకే ఇలాంటి పోస్ట్ పెట్టడం అభిమానులకు అస్సలు నచ్చలేదు. పాత విజయాలను గుర్తుచేసుకోవడం తప్పు కాకపోయినా, జట్టు ఓటమి బాధలో ఉన్నప్పుడు ఇలాంటి పోస్టులు పెట్టడం ద్వారా రొనాల్డో ఇంకా "గతంలోనే బతుకుతున్నాడు" అంటూ ఫ్యాన్స్ ఘాటుగా కామెంట్లు పెడుతున్నారు. మరోవైపు, ప్రపంచకప్ నుంచి నిష్క్రమించిన వెంటనే రొనాల్డో చేసిన కొన్ని వ్యాఖ్యలు కూడా ఈ వివాదానికి మరింత ఆజ్యం పోశాయి.
