మహారాష్ట్రలోని మరాఠ్వాడ ప్రాంతంలో గురువారం తెల్లవారుజామున ఒకే రాత్రి వరుసగా నాలుగు సార్లు భూమి కంపించింది. దీంతో ప్రజలు తీవ్ర భయాందోళనలకు గురయ్యారు. హింగోలి, నాందేడ్, పర్భణీ జిల్లాల్లో ఈ ప్రకంపనలు తీవ్రంగా వచ్చాయి. గాఢ నిద్రలో ఉన్న సమయంలో ఇళ్లలోని సామాన్లు ఒక్కసారిగా కదలడం, కిటికీలు పెద్ద శబ్దంతో ఊగడంతో జనం ప్రాణాలు గుప్పిట్లో పెట్టుకుని, భయంతో ఇళ్లను వదిలి రోడ్లపైకి పరుగులు తీశారు.
నేషనల్ సెంటర్ ఫర్ సీస్మోలజీ (ఎన్సీఎస్) నివేదిక ప్రకారం.. తెల్లవారుజామున 1:37 గంటలకు రిక్టర్ స్కేలుపై 4.6 తీవ్రతతో మొదటి బలమైన భూకంపం సంభవించింది. ఆ తర్వాత కేవలం రెండు గంటల వ్యవధిలోనే వరుసగా 3.6, 3.9, 4.1 తీవ్రతతో మరో మూడు ఆఫ్టర్ షాక్స్ (తదుపరి ప్రకంపనలు) నమోదయ్యాయి. హింగోలి జిల్లా వసమత్ తాలూకా పరిధిలోని పాంగ్రా షిండే గ్రామానికి సమీపంలో, భూ అంతర్భాగంలో 10 కిలోమీటర్ల లోతున ఈ భూకంప కేంద్రం ఉన్నట్లు అధికారులు గుర్తించారు.
దీని ప్రభావం పొరుగున ఉన్న లాతూర్ జిల్లాలోని ఉద్గీర్ ప్రాంతంలోనూ స్వల్పంగా కనిపించింది. ఈ వరుస భూప్రకంపనల వల్ల పాత ఇళ్ల గోడలకు స్వల్పంగా పగుళ్లు వచ్చినప్పటికీ.. ఎలాంటి ప్రాణనష్టం, భారీ ఆస్తి నష్టం జరగలేదని జిల్లా యంత్రాంగం ప్రాథమికంగా ధృవీకరించింది. ప్రస్తుతానికి పరిస్థితి అదుపులోనే ఉందని, విపత్తు నిర్వహణ బృందాలు క్షేత్రస్థాయిని నిరంతరం పర్యవేక్షిస్తున్నాయని అధికారులు తెలిపారు. ప్రజలు ఎవరూ ఆందోళన చెందవద్దని, సామాజిక మాధ్యమాల్లో వచ్చే వదంతులను నమ్మవద్దని హింగోలి, పర్భణీ జిల్లాల కలెక్టర్లు విజ్ఞప్తి చేశారు.
