శంషాబాద్‌లోని రాజీవ్‌గాంధీ అంతర్జాతీయ విమానాశ్రయంలో వరుసగా చోటుచేసుకున్న రెండు వేర్వేరు ఘటనలు తీవ్ర కలకలం రేపాయి. విమానాశ్రయంలో నిర్వహించిన నిత్య తనిఖీల్లో ఒక ప్రయాణికుడి వద్ద నకిలీ విమాన టికెట్‌ను, మరొక ప్రయాణికుడి లగేజీలో సజీవ బుల్లెట్లను సీఐఎస్ఎఫ్ (CISF) భద్రతా సిబ్బంది గుర్తించారు. రెండు వేర్వేరు మార్గాల్లో ప్రయాణించాల్సిన ఈ ప్రయాణికులను అధికారులు తక్షణమే అదుపులోకి తీసుకుని దర్యాప్తు ప్రారంభించారు.
సౌదీ అరేబియాలోని జెద్దా నగరం వెళ్లేందుకు విమానాశ్రయానికి వచ్చిన ఒక ప్రయాణికుడి టికెట్‌ను పరిశీలించగా సెక్యూరిటీ అధికారులకు తీవ్ర అనుమానం వచ్చింది. వెంటనే దాన్ని లోతుగా తనిఖీ చేశారు. తీరా చూస్తే ఆ వ్యక్తి దగ్గర ఉన్న టికెట్ నకిలీదని స్పష్టమైంది. దీంతో అతడి ప్రయాణాన్ని అడ్డుకున్న అధికారులు, సదరు ప్రయాణికుడిని అదుపులోకి తీసుకుని విచారణ చేపట్టారు. ఆ నకిలీ టికెట్‌ను ఎవరి వద్ద కొనుగోలు చేశాడు, దీని వెనుక ఏవైనా ముఠాల హస్తం ఉందా? అనే కోణంలో పోలీసులు లోతుగా విచారణ చేపట్టారు.
మరో ఘటనలో, హైదరాబాద్ నుంచి ఢిల్లీ వెళ్లేందుకు వచ్చిన ఒక ప్రయాణికుడి లగేజీని స్క్రీనింగ్ చేస్తుండగా అధికారులకు అనుమానాస్పద వస్తువులు కనిపించాయి. దీంతో వెంటనే లగేజీని సెక్యూరిటీ సిబ్బంది సమగ్రంగా తనిఖీ చేయగా అందులో బుల్లెట్లు బయటపడ్డాయి. దీంతో అక్కడున్న వారంతా కంగుతిన్నారు. విమానాశ్రయంలోకి ఎలాంటి అనుమతి లేకుండా బుల్లెట్లను తీసుకురావడంపై సీఐఎస్ఎఫ్ సిబ్బంది తీవ్రంగా పరిగణించింది. వాటిని స్వాధీనం చేసుకుని ప్రయాణికుడిని విమానాశ్రయ పోలీసులకు అప్పగించారు.
స్వాతంత్య్ర దినోత్సవం ముగిసిన మరుసటి రోజే ఎయిర్‌పోర్టులో ఇలాంటి భద్రతా ఉల్లంఘన ఘటనలు వెలుగుచూడటంతో అధికారులు భద్రతను మరింత కట్టుదిట్టం చేశారు. ఈ బుల్లెట్లు ఎక్కడి నుంచి వచ్చాయి, వాటికి సంబంధించి చెల్లుబాటు అయ్యే లైసెన్స్ లేదా పత్రాలు ఉన్నాయా అనే అంశాలపై పోలీసులు శంషాబాద్ ఎయిర్‌పోర్ట్ పోలీస్ స్టేషన్‌లో కేసు నమోదు చేసి దర్యాప్తు చేస్తున్నారు.
