CEC: దేశ ఎన్నికల వ్యవస్థను కుదిపేస్తున్న "స్పెషల్ ఇంటెన్సివ్ రివిజన్" (ఎస్ఐఆర్) వ్యవహారం ఇప్పుడు అత్యంత ఉత్కంఠభరిత క్లైమాక్స్‌కు చేరుకుంది. చీఫ్ ఎలక్షన్ కమిషనర్ (సీఈసీ) జ్ఞానేష్ కుమార్ నిర్ణయాలు, ఓటర్ల జాబితా సవరణ పేరుతో రేగిన అలజడి దేశ రాజకీయాల్లో పెను ప్రకంపనలు సృష్టిస్తున్నాయి.
ఒకవైపు ఆయన ఏకపక్ష వైఖరిని సవాల్ చేస్తూ దాఖలైన పిటిషన్లను అత్యవసరంగా విచారించేందుకు సుప్రీంకోర్టు గ్రీన్ సిగ్నల్ ఇవ్వడం, మరోవైపు అక్టోబర్ 2 గాంధీ జయంతి నుంచి విపక్షాలు 'జైల్ భరో' ఉద్యమానికి పిలుపునివ్వడంతో ఒక్కసారిగా వాతావరణం వేడెక్కింది. సీఈసీ పదవిలో జ్ఞానేష్ కుమార్ కొనసాగుతారా? లేక మునుపెన్నడూ లేని విధంగా రాజ్యాంగ సంక్షోభం తలెత్తనుందా? అనే చర్చ ఇప్పుడు దేశవ్యాప్తంగా జోరందుకుంది.
సుప్రీంకోర్టులో అగ్నిపరీక్ష
మిగతా ఇద్దరు ఎన్నికల కమిషనర్ల అభిప్రాయాలను కనీసం పరిగణనలోకి తీసుకోకుండా జ్ఞానేష్ కుమార్ మొండిగా వ్యవహరించారని, ఇది రాజ్యాంగంలోని ఆర్టికల్ 324(1)ను స్పష్టంగా ఉల్లంఘించడమేనని పిటిషనర్లు సుప్రీంకోర్టు ప్రధాన న్యాయమూర్తి (సీజేఐ) ధర్మాసనం ఎదుట వాదించారు. రాకేష్ కుమార్ సింగ్ దాఖలు చేసిన పిటిషన్‌పై విచారణ జరిపేందుకు అత్యున్నత న్యాయస్థానం అంగీకరించడంతో కేంద్ర ఎన్నికల సంఘం గుండెల్లో రైళ్లు పరుగెడుతున్నాయి.
గతంలో బీహార్, పశ్చిమ బెంగాల్ ఎన్నికల సమయంలోనే ఎస్ఐఆర్‌పై పిటిషన్లు వచ్చినా.. ఓటర్ల సవరణ ఎన్నికల సంఘం విధి అంటూ కోర్టు జోక్యానికి నిరాకరించింది. అయితే అదే ఇప్పుడు లక్షలాది మంది ఓటు హక్కును కాలరాయడానికి కారణమైందన్న తీవ్ర విమర్శలు వచ్చాయి. సుప్రీంకోర్టు సీనియర్ న్యాయవాది దుష్యంత్ దవే స్వయంగా స్పందిస్తూ.. "ఎస్ఐఆర్ పేరుతో పౌరుల ఓటు హక్కులను హరించడంలో సుప్రీంకోర్టు పాత్ర కూడా ఉంది" అని ఘాటుగా చురకలు వేయడం న్యాయ వర్గాల్లోనూ తీవ్ర కలకలం రేపింది. ఎన్నికల కమిషనర్ల ఎంపిక కమిటీలో సుప్రీంకోర్టు ప్రధాన న్యాయమూర్తి తప్పనిసరిగా ఉండాలని, ప్రస్తుతం సాగుతున్న వివాదాస్పద ఎస్ఐఆర్ ప్రక్రియను వెంటనే నిలిపివేయాలని పిటిషనర్లు డిమాండ్ చేస్తున్నారు.
అక్టోబర్ 2 నుంచి ‘జైల్ భరో’..
సీఈసీ రాజీనామా చేయాలంటూ ఇచ్చిన 48 గంటల డెడ్‌లైన్ ముగియడంతో ప్రతిపక్షాలు ప్రత్యక్ష పోరాటానికి సిద్ధమయ్యాయి. అక్టోబర్ 2న ముంబైలోని చారిత్రాత్మక శివాజీ పార్క్ వేదికగా 'జైల్ భరో' ఆందోళనలతో ఈ ఉద్యమం ఉధృతం కానుంది. ఈ పోరాటానికి శివసేనతో పాటు వామపక్ష విద్యార్థి సంఘాలు సంపూర్ణ మద్దతు ప్రకటించాయి. దేశవ్యాప్తంగా ఉన్న ప్రధాన నగరాల్లో జ్ఞానేష్ కుమార్‌కు వ్యతిరేకంగా భారీ నిరసనలకు కార్యాచరణ రెడీ అయ్యింది.
మరోవైపు కాంగ్రెస్ వర్కింగ్ కమిటీ అత్యవసరంగా సమావేశమై ప్రత్యేక తీర్మానాన్ని ఆమోదించింది. కాంగ్రెస్ పార్టీ జాతీయ అధ్యక్షుడు మల్లికార్జున ఖర్గే తీవ్రస్థాయిలో ధ్వజమెత్తుతూ.. "జ్ఞానేష్ కుమార్ స్వతంత్ర రాజ్యాంగ ప్రతిపత్తిని మంటగలిపి కేంద్ర అధికార పార్టీ చేతిలో కీలుబొమ్మగా (పప్పెట్) మారిపోయారు" అని నిప్పులు చెరిగారు. ఓటర్ జాబితా నుంచి పేర్లు గల్లంతైన వారందరికీ తక్షణమే మళ్లీ నమోదు చేసుకునే అవకాశం కల్పించాలని, సవరణలకు సంబంధించిన పూర్తి డేటాను పారదర్శకంగా ప్రజల ముందుంచాలని ఆయన డిమాండ్ చేసిన విషయం తెలిసిందే.
వచ్చే వారమే ఫైనల్..
విపక్షాలు, ప్రజా సంఘాలు, న్యాయ నిపుణులు ఎంతగా దుమ్మెత్తిపోస్తున్నా.. బీజేపీ పాలిత రాష్ట్ర ప్రభుత్వాలు మాత్రం జ్ఞానేష్ కుమార్‌కు బాహాటంగా వెన్నుదన్నుగా నిలుస్తున్నాయి. ఓటర్ల జాబితా ప్రక్షాళన పేరుతో జరుగుతున్న ఎస్ఐఆర్ చట్టబద్ధమైనదేనని సమర్థిస్తున్నాయి.
ఒకవైపు వీధుల్లో మొదలవుతున్న 'జైల్ భరో' ఆందోళనలు, మరోవైపు రాజ్యాంగ ఉల్లంఘనపై సుప్రీంకోర్టులో జరగబోయే కీలక విచారణ.. ఈ రెండూ వెరసి అక్టోబర్ ఫస్ట్ వీక్‌లో జ్ఞానేష్ కుమార్ భవితవ్యాన్ని తేల్చనున్నాయి. సీఈసీని కోర్టు కట్టడి చేస్తుందా లేక దేశ ఎన్నికల వ్యవస్థ సరికొత్త న్యాయ వివాదంలోకి జారుకుంటుందా అన్నది ఇప్పుడు భారత ప్రజాస్వామ్యంలో అత్యంత ఉత్కంఠభరిత అంశంగా మారింది.
