హైదరాబాద్ రియల్టర్లకు కొత్త టెన్షన్
క్యూర్ పరిధిలో బోర్లపై నిషేధం...
ఉల్లంఘిస్తే.. భారీ ఫైన్లు
చుక్క నీరు కావాలన్నా చుక్కలు కనిపిస్తాయా..?
హైదరాబాద్.. దేశంలోనే వేగంగా విస్తరిస్తున్న నగరాల్లో ఒకటి. ఎక్కడ చూసినా భారీ అపార్ట్‌మెంట్లు.. గేటెడ్‌ కమ్యూనిటీలు.. విల్లా ప్రాజెక్టులు.. కొత్త వెంచర్లు! రియల్ ఎస్టేట్ రంగంలో కోట్ల రూపాయల పెట్టుబడులు! కానీ ఈ భారీ నిర్మాణాల మధ్య ఇప్పుడు ఒక కీలకమైన ప్రశ్న ఎదురవుతోంది. అదే నీళ్లు.
భూమి ఉంది.. పెట్టుబడి ఉంది.. కన్ స్ట్రక్షన్ కి ప్లాన్ రెడీగా ఉంది.. కస్టమర్లూ ఉన్నారు. కానీ నిర్మాణానికి అవసరమైన నీరు లేకపోతే? కొత్త బోరు వేయడానికి అనుమతి రాకపోతే? ఉన్న బోరే ఎండిపోతే? అప్పుడు నిర్మాణం ఎలా సాగాలి? భవనం పూర్తయిన తర్వాత అందులో ఉండే వందల కుటుంబాలకు నీళ్లు ఎక్కడి నుంచి తీసుకురావాలి?
హైదరాబాద్‌లో భూగర్భ జలాలపై పెరుగుతున్న ఒత్తిడి.. కొత్త బోర్ల తవ్వకాలపై ఆంక్షలు.. నిర్మాణ రంగంలో శుద్ధి చేసిన నీటి వినియోగంపై దృష్టి.. ఈ పరిణామాలు ఇప్పుడు రియల్ ఎస్టేట్ రంగానికి కొత్త సవాళ్లను ముందుకు తెస్తున్నాయి.
ఇప్పటివరకు లొకేషన్‌, కనెక్టివిటీ, ధర, భవిష్యత్తు రాబడుల చుట్టూ తిరిగిన రియల్ ఎస్టేట్ చర్చలో.. ఇకపై నీటి భద్రత కూడా కీలక అంశంగా మారనుందా?
భూగర్భ జలాలు ఖాళీ.. బోర్లపై ఆంక్షలు!
హైదరాబాద్‌లో భూగర్భ జలాల వినియోగంపై ఆందోళనలు మొదలయ్యాయి. నగరంలో జనాభా పెరుగుదల, నిర్మాణాల విస్తరణతో నీటి అవసరాలు అంతకంతకూ పెరుగుతున్నాయి. మరోవైపు భూమిలోకి ఇంకే నీటితో పోలిస్తే ఎక్కువ నీటిని బయటకు తీస్తే భూగర్భ జలాలపై ఒత్తిడి పెరగడం సహజం.
ఈ పరిస్థితుల్లో కొత్త బోర్ల తవ్వకాలపై నియంత్రణకు ప్రభుత్వం చర్యలు చేపడుతోంది. నిర్మాణాలు, ఇతర తాగునీరు కాని అవసరాల కోసం కొత్త బోర్లపై ఆంక్షలు విధించడం, నిర్మాణ రంగానికి శుద్ధి చేసిన నీటిని వినియోగించేలా చర్యలు తీసుకోవడం ఇందులో భాగం.
అయినా ఈ పరిణామం రియల్ ఎస్టేట్ రంగానికి ఒక హెచ్చరిక మాత్రం. నీటి లభ్యతను పక్కనపెట్టి నిర్మాణ ప్రణాళికలు రూపొందిస్తే భవిష్యత్తులో ఇబ్బందులు తప్పకపోవచ్చు.
బోరు వేయలేకపోతే.. నిర్మాణం ముందుకు సాగేదెలా?
ఒక భారీ అపార్ట్‌మెంట్‌ ప్రాజెక్టును ఊహించండి. వందలాది ఫ్లాట్లు నిర్మిస్తున్నారు. నిర్మాణ పనులు వేగంగా సాగుతున్నాయి. అయితే ఆ పనులకు అవసరమైన నీటి కోసం బోరుపైనే ఆధారపడుతున్నారనుకుందాం. ఇప్పుడు కొత్త బోరు వేయడానికి అనుమతి రాకపోతే? ఉన్న బోరు నుంచి అవసరమైనంత నీరు అందకపోతే? ప్రత్యామ్నాయ నీటి సరఫరా కోసం ఏర్పాట్లు చేసుకోవాల్సిందే. శుద్ధి చేసిన నీటిని అందించే వ్యవస్థతో అనుసంధానం కావాలి. సరఫరా పరిమాణం, రవాణా, ఖర్చులను ముందుగానే లెక్కించాలి.
ఈ ఏర్పాట్లు సమయానికి పూర్తికాకపోతే నిర్మాణ పనుల షెడ్యూల్‌ ప్రభావితమయ్యే అవకాశం ఉంది. ప్రత్యామ్నాయ నీటి వనరులపై ఆధారపడటం వల్ల నిర్వహణ ఖర్చులు కూడా పెరగవచ్చు. ప్రధానంగా నీటి సరఫరాకు ముందస్తు ప్రణాళిక లేని ప్రాజెక్టులకు మాత్రం ఇది పెద్ద సవాలుగా మారవచ్చు.
ఫ్లాట్‌ కొన్నాక నీళ్ల కోసం ట్యాంకర్ల చుట్టూ తిరగాలా?
రియల్ ఎస్టేట్ రంగంలో అసలు ఆందోళన ఇక్కడే మొదలవుతుంది. ఒక కుటుంబం జీవితకాల పొదుపులను పెట్టుబడిగా పెట్టి ఫ్లాట్‌ కొనుగోలు చేస్తుంది. కొందరు బ్యాంకు రుణాలు తీసుకుని EMI చెల్లిస్తారు. ఇంటి ధరతో పాటు నిర్వహణ ఖర్చులనూ భరిస్తారు. కానీ ఆ ఇంటికి నిరంతర నీటి సరఫరా లేకపోతే? వేసవిలో బోరు ఎండిపోయి ట్యాంకర్లపై ఆధారపడాల్సి వస్తే? అపార్ట్‌మెంట్‌లో వందల కుటుంబాలకు నీటిని సమకూర్చడం కష్టమైతే? నీటి సరఫరా కోసం అదనపు మెయింటనెన్స్ చెల్లించాల్సి వస్తే?
అప్పుడు ఫ్లాట్‌లో ఉన్న స్విమ్మింగ్‌ పూల్‌, క్లబ్‌హౌస్‌, ఇతర సదుపాయాల కంటే నీటి సరఫరానే ముఖ్యమైన అంశంగా మారుతుంది. ఇప్పటికే హైదరాబాద్ మహానగరంలో చాలా అపార్ట్ మెంట్లలో ఈ సమస్య మొదలైంది.
అందుకే ఇల్లు కొనుగోలు చేసేవారు ఇకపై కొన్ని ప్రశ్నలు తప్పనిసరిగా అడగాలి. ప్రాజెక్టుకు అధికారిక నీటి సరఫరా ఉందా? బోర్లపై ఎంతవరకు ఆధారపడుతున్నారు? వేసవిలో నీటి అవసరాలను ఎలా తీర్చుకుంటారు? వర్షపు నీటి సంరక్షణ వ్యవస్థ పనిచేస్తుందా? శుద్ధి చేసిన నీటిని తిరిగి వినియోగించే ఏర్పాట్లు ఉన్నాయా? ఈ ప్రశ్నలన్నింటికీ సమాధానాలు తెలుసుకోవడం కొనుగోలుదారులకు చాలా కీలకం.
రియల్ ఎస్టేట్ ధరలకు కొత్త పరీక్ష?
నీటి సమస్య పెరిగితే హైదరాబాద్‌లో భూముల ధరలు తగ్గిపోతాయా? ఫ్లాట్ల అమ్మకాలు మందగిస్తాయా? పెట్టుబడిదారులు వెనక్కి తగ్గుతారా? ఏమో ఏమైనా జరగొచ్చు. ఇప్పటికే కష్టాల్లో ఉన్న రియల్ ఎస్టేట్ కు రానున్న రోజుల్లో చుక్కలు కనిపించవచ్చు.
మరోవైపు నీటి భద్రతకు ప్రాధాన్యం ఇచ్చే ప్రాజెక్టులకు భవిష్యత్తులో మంచి డిమాండ్ ఉంటుంది. వర్షపు నీటి సంరక్షణ, శుద్ధి చేసిన నీటి పునర్వినియోగం, ప్రత్యామ్నాయ నీటి వనరులు వంటి అంశాలు ప్రాజెక్టు నాణ్యతను అంచనా వేసే ప్రమాణాలుగా మారవచ్చు.
అంటే ఇకపై రియల్ ఎస్టేట్ రంగంలో పోటీ కేవలం లొకేషన్‌, ధర, సదుపాయాల మధ్యే ఉండకపోవచ్చు. వాటర్ సెక్యూరిటీ కూడా కీలక అంశంగా మారవచ్చు.
ఎల్‌నినో ఎఫెక్ట్‌.. నీటి కష్టాలు మరింత పెరుగుతాయా?
భూగర్భ జలాలపై ఒత్తిడి పెరుగుతున్న సమయంలో ఎల్‌నినో ప్రభావంపై ఆందోళనలు కూడా చర్చకు వస్తున్నాయి. ఎల్‌నినో కారణంగా ఈసారి వానలే కురవలేదు. దీంతో భాగర్భ జలాలు వేగంగా అడుగంటుతున్నాయి. ఈ కారణంగా బోర్లపై ఆధారపడుతున్న ప్రాంతాల్లో నీటి కొరత మరింత తీవ్రంగా మారే ప్రమాదం ఉంటుంది.
అందుకే నిర్మాణ రంగం ప్రత్యామ్నాయ నీటి వనరులపై ముందుగానే దృష్టి పెట్టాలి. శుద్ధి చేసిన మురుగునీటిని నిర్మాణాలు, తోటల నిర్వహణ వంటి తాగునీరు అవసరం లేని పనులకు వినియోగించడం ద్వారా మంచి నీటిపై ఒత్తిడిని తగ్గించవచ్చు.
బోర్లపై ఆంక్షలు సరిపోతాయా.. ప్రత్యామ్నాయాలు ఎక్కడ?
కొత్త బోర్లపై నియంత్రణతో పాటు ప్రత్యామ్నాయ నీటి సరఫరా వ్యవస్థలు కూడా బలపడాలి. శుద్ధి చేసిన నీరు నిర్మాణ ప్రాంతాలకు సమయానికి అందుబాటులో ఉండాలి. వర్షపు నీటి సంరక్షణ వ్యవస్థలు సక్రమంగా పనిచేయాలి. ఇప్పటికే ఉన్న నీటి వనరులను బాధ్యతగా వినియోగించాలి.
ప్రభుత్వం నిబంధనలను అమలు చేయడంతోపాటు అవసరమైన నీటి మౌలిక సదుపాయాలపైనా దృష్టి పెట్టాలి. నిర్మాణ సంస్థలు కూడా ప్రాజెక్టు ప్రారంభ దశలోనే నీటి అవసరాలను అంచనా వేసి ప్రత్యామ్నాయ ఏర్పాట్లు చేసుకోవాలి.
హైదరాబాద్ రియల్ ఎస్టేట్‌కు వాటర్ సెక్యూరిటీనే కీలకమా?
హైదరాబాద్ అభివృద్ధి ఆగిపోవాలని ఎవరూ కోరుకోరు. కొత్త ఇళ్లు రావాలి. పెట్టుబడులు పెరగాలి. ప్రజలకు మెరుగైన నివాస సదుపాయాలు అందాలి. కానీ ఈ అభివృద్ధికి అవసరమైన నీటి వనరులే ఒత్తిడికి గురైతే దీర్ఘకాలిక ప్రణాళికలు తప్పనిసరి. బోర్లపై ఆంక్షలు రియల్ ఎస్టేట్ రంగాన్ని ఒక్కసారిగా కుదిపేస్తాయని చెప్పలేం. అయితే నీటి లభ్యతను పట్టించుకోకుండా నిర్మాణాలు చేపట్టడం భవిష్యత్తులో ప్రమాదకరమైన వ్యూహంగా మారవచ్చు.
రేపు హైదరాబాద్‌లో ఫ్లాట్‌ కొనేటప్పుడు.. ధర ఎంత? లొకేషన్‌ ఎక్కడ? అనే ప్రశ్నలతో పాటు.. ఆ ఇంటికి నీళ్లు ఎక్కడి నుంచి వస్తాయి? అన్న ప్రశ్న కూడా అత్యంత కీలకంగా మారవచ్చు. ఎందుకంటే భూమి కొనొచ్చు.. బిల్డింగ్ కట్టుకోవచ్చు.. కానీ నీటి వనరులు లేకపోతే అభివృద్ధి అంత ఈజీ కాదు.
