టెస్లా, స్పేస్‌ఎక్స్, ఎక్స్(X) అధినేత ఎలాన్ మస్క్(Elon Musk) సోషల్ మీడియా వేదికగా చేసిన వ్యాఖ్యలు అంతర్జాతీయ రాజకీయ, టెక్ వర్గాల్లో సంచలనం రేపుతున్నాయి. రాబోయే 2026 అమెరికా మధ్యంతర ఎన్నికల్లో(US Midterms 2026) డెమోక్రాట్లు విజయం సాధించి కాంగ్రెస్‌ని చేజిక్కించుకుంటే మస్క్ జైలుకు వెళ్లాల్సి రావచ్చు అంటూ ప్రముఖ టెక్ జర్నలిస్ట్ కారా స్విషర్ చేసిన తీవ్ర వ్యాఖ్యలపై ఆయన విరుచుకుపడ్డారు. కేవలం రెండే రెండు పదాల్లో ‘మెసేజ్ అందింది’ (Message received) అంటూ మొదట స్పందించిన మస్క్, ఆ తర్వాత మరింత ఘాటైన పోస్ట్ ద్వారా కౌంటర్ ఇచ్చారు.
ప్రఖ్యాత ‘బుల్వార్క్ పాడ్‌కాస్ట్’లో మాట్లాడుతూ కారా స్విషర్ ఈ సంచలన వ్యాఖ్యలు చేశారు. ప్రస్తుత అమెరికా ప్రభుత్వంలో మస్క్ నేతృత్వంలోని 'గవర్నమెంట్ ఎఫిషియెన్సీ డిపార్ట్‌మెంట్' (DOGE) చర్యల వల్ల ఆయన కంపెనీలపై విచారణలు మందగించాయని, అయితే డెమోక్రాట్లు గెలిస్తే మళ్లీ కఠిన విచారణలు మొదలవుతాయని ఆమె పేర్కొన్నారు. ‘కమలా హారిస్ అధికారంలో ఉంటే మస్క్ ఇప్పటికే జైలులో ఉండేవారని, ఆయనపై విధి దాడి చేయడానికి సిద్ధంగా ఉంది’ అని స్విషర్ వ్యాఖ్యానించారు.
దీనిపై మస్క్ స్పందిస్తూ.. ‘కత్తితో బతికేవాడు కత్తికే చస్తాడు.. స్విషర్ వ్యాఖ్యలు చూస్తుంటే ఆమెనే నిజంగా జైలుకు వెళ్లాలనుకుంటున్నట్లుంది’ అని ఎక్స్‌వేదికగా తీవ్ర హెచ్చరికలు జారీ చేశారు. మరోవైపు, ప్రసిద్ధ యూఎస్ సెనేటర్ బెర్నీ శాండర్స్ కూడా ఎలాన్ మస్క్ తీరుపై విరుచుకుపడ్డారు. 2026 మధ్యంతర ఎన్నికల్లో రిపబ్లికన్ల ఆధిక్యాన్ని కాపాడేందుకు మస్క్ తన సూపర్‌ పీఏసీల (Super PACs) ద్వారా ఏకంగా 400 మిలియన్ డాలర్లకు పైగా (సుమారు రూ. 3,300 కోట్లు) ఖర్చు చేస్తున్నారని శాండర్స్ తీవ్ర ఆరోపణలు చేశారు.
మస్క్ తన అపరిమిత ధనబలంతో అమెరికా ఎన్నికలను కొనుగోలు చేయడానికి ప్రణాళికాబద్ధంగా ప్రయత్నిస్తున్నారని, ఈ ఓలిగార్కీకి(ధనికస్వామ్యానికి) చరమగీతం పాడాలని ప్రజలకు పిలుపునిచ్చారు. అమెరికాలో ముంచుకొస్తున్న మధ్యంతర ఎన్నికల వేళ మస్క్ రాజకీయం, జైలు వ్యాఖ్యలు, డెమోక్రాట్ల ఆరోపణలు ప్రపంచవ్యాప్తంగా తీవ్ర ఉత్కంఠను రేకెత్తిస్తున్నాయి. టెక్నాలజీ ప్రపంచంలోనే అత్యంత సంపన్నుడిగా ఎదిగిన మస్క్, రాజకీయ రంగంలోకి ప్రత్యక్షంగా ప్రవేశించి ఇంత పెద్ద మొత్తంలో నిధులు వెచ్చిస్తుండటం, ప్రత్యర్థుల నుంచి బెదిరింపులు ఎదుర్కొంటుండటం అమెరికా ప్రజాస్వామ్య వ్యవస్థలో కొత్త చర్చలకు దారితీస్తోంది.
