విజయనగరం జిల్లా భోగాపురంలో అత్యంత ఆధునిక సదుపాయాలతో నిర్మించిన 'అల్లూరి సీతారామరాజు అంతర్జాతీయ విమానాశ్రయం' నుంచి వాణిజ్య విమాన సర్వీసులు నేడు(సోమవారం) అధికారికంగా ప్రారంభమయ్యాయి. హైదరాబాద్ నుంచి బయలుదేరిన ఇండిగో (6E6408) విమానం ఉదయం 6:45 గంటలకు భోగాపురం రన్‌వేపై విజయవంతంగా ల్యాండ్ అవ్వడంతో ఈ నూతన ఎయిర్‌పోర్ట్ కార్యకలాపాలు లాంఛనంగా మొదలయ్యాయి.
నూతన విమానాశ్రయానికి చేరుకున్న తొలి విమానానికి, ప్రయాణికులకు జీఎంఆర్ ఎయిర్‌పోర్ట్స్, పౌర విమానయాన శాఖ అధికారులు అత్యంత ఘనంగా స్వాగతం పలికారు. తొలి చారిత్రక ప్రయాణానికి గుర్తుగా ప్రయాణికులకు ప్రత్యేక ధ్రువీకరణ పత్రాలతో పాటు, ఆంధ్రప్రదేశ్ సాంస్కృతిక ప్రతీక అయిన విశిష్టమైన 'ఏటికొప్పాక బొమ్మలను' జ్ఞాపికలుగా అందజేసి అభినందించారు. ఈ విమానం ల్యాండ్ అయిన కొద్దిసేపటికే బెంగళూరు నుంచి వచ్చిన ఎయిర్ ఇండియా ఎక్స్‌ప్రెస్ సర్వీస్ కూడా రన్‌వేను తాకింది.
భోగాపురం అంతర్జాతీయ విమానాశ్రయం పూర్తిస్థాయిలో అందుబాటులోకి రావడంతో, విశాఖపట్నంలోని పాత నావికాదళ ఎయిర్‌పోర్ట్ నుంచి నడిచే పౌర విమాన సర్వీసులన్నింటినీ ఇక్కడికే పూర్తిగా బదిలీ చేశారు. తొలిరోజే హైదరాబాద్, బెంగళూరు, ఢిల్లీ, ముంబై, చెన్నై, కోల్‌కతా వంటి దేశంలోని ప్రధాన మెట్రో నగరాలకు విమాన రాకపోకలు మొదలయ్యాయి. ప్రారంభ రోజే మొత్తం 31 విమాన సర్వీసులు నడవనుండగా, సుమారు 7వేల మంది ప్రయాణికులు సేవలు వినియోగించుకోనున్నారు.
ఈ అత్యాధునిక గ్రీన్‌ఫీల్డ్ ఎయిర్‌పోర్ట్ సేవలు ప్రారంభం కావడం వల్ల ఉత్తరాంధ్ర ప్రాంత ఆర్థిక చిత్రపటం పూర్తిగా మారనుందని నిపుణులు విశ్లేషిస్తున్నారు. ముఖ్యంగా విశాఖపట్నం, విజయనగరం, శ్రీకాకుళం జిల్లాల్లో పారిశ్రామిక ఉత్పత్తులు, ఐటీ రంగ విస్తరణ, ఫార్మా ఎగుమతులు మరియు పర్యాటక రంగానికి ప్రపంచ స్థాయి కనెక్టివిటీ లభించి ప్రాంతీయాభివృద్ధి మరింత వేగవంతం కానుంది.
