దేశంలో అవినీతి వ్యతిరేక ఉద్యమాల ద్వారా చెరగని ముద్ర వేసిన ప్రముఖ సామాజిక కార్యకర్త, పద్మభూషణ్ అన్నా హజారే తీవ్ర అస్వస్థతకు గురయ్యారు. 87ఏళ్ల వయస్సున్న ఆయన ఆరోగ్యం క్షీణించడంతో సోమవారం ముంబైలోని బాంబే ఆస్పత్రిలోని ఐసీయూ (ICU) విభాగంలో చేర్పించారు. తీవ్రమైన వైరల్ ఇన్ఫెక్షన్, డీహైడ్రేషన్ సమస్యలతో బాధపడుతున్న ఆయనకు ప్రస్తుతం నిపుణులైన వైద్య బృందం నిరంతర పర్యవేక్షణలో అత్యవసర చికిత్స అందిస్తోంది.
ఆరోగ్య సమస్యలు తలెత్తిన ప్రారంభంలో హజారే తన స్వగ్రామం రాలేగావ్ సిద్ధి సమీపంలోని ఆసుపత్రిలో ప్రాథమిక చికిత్స పొందారు. అయితే, ఆయన ఆరోగ్య పరిస్థితి మరింత సంక్లిష్టంగా మారడంతో మెరుగైన వైద్య సేవ నిమిత్తం వెంటనే ముంబైకి తరలించారు. ప్రస్తుతం ప్రఖ్యాత వైద్యులు డాక్టర్ గౌతమ్ భన్సాలీ ఆధ్వర్యంలో ఆయనకు చికిత్స కొనసాగుతోంది. వయోభారంతో పాటు కిడ్నీల పనితీరుపై కూడా ఆందోళన నెలకొనడంతో వైద్యులు పలు కీలక నిర్ధారణ పరీక్షలు నిర్వహిస్తున్నారు. పూర్తి నివేదికలు వచ్చాక ఆస్పత్రి వర్గాలు అధికారిక హెల్త్ బులెటిన్ విడుదల చేయనున్నాయి.
మహారాష్ట్రలోని రాలేగావ్ సిద్ధిని ఆదర్శ గ్రామంగా తీర్చిదిద్ది జల సంరక్షణ, గ్రామీణ స్వావలంబన, మద్యపాన వ్యతిరేక పోరాటాలతో అన్నా హజారే దేశవ్యాప్తంగా అపారమైన గుర్తింపు సాధించారు. సమాచార హక్కు చట్టం(RTI) తెచ్చేందుకు, అలాగే 2011లో దేశాన్ని ఊపేసిన 'జన్ లోక్పాల్' ఉద్యమానికి ఆయనే దిశానిర్దేశం చేశారు. సామాజిక రంగానికి ఆయన చేసిన అపారమైన సేవలకుగాను 1992లో కేంద్ర ప్రభుత్వం ఆయనను ‘పద్మభూషణ్’ పురస్కారంతో గౌరవించింది.
ఇటీవల కూడా విద్యార్థుల ఆందోళనలపై పోలీసుల లాఠీఛార్జ్ను తీవ్రంగా ఖండిస్తూ ఆయన ప్రజా సమస్యలపై తన గళాన్ని వినిపించారు. గాంధేయ మార్గంలో పోరాడుతూ కోట్లాది మందికి ఆదర్శంగా నిలిచిన అన్నా హజారే ఐసీయూలో చేరారనే వార్త తెలుసుకుని దేశవ్యాప్తంగా ఆయన అభిమానులు, మద్దతుదారులు తీవ్ర ఆందోళన వ్యక్తం చేస్తున్నారు. ఆయన త్వరగా కోలుకుని పూర్తి ఆరోగ్యంతో తిరిగిరావాలని వివిధ రంగాల ప్రముఖులు, ప్రజలు ఆకాంక్షిస్తున్నారు.
