తిరుమల శ్రీవారి సాలకట్ల బ్రహ్మోత్సవాల సందర్భంగా భక్తుల రద్దీని దృష్టిలో ఉంచుకుని తిరుమల తిరుపతి దేవస్థానం (TTD), పోలీసులు కీలక నిర్ణయం తీసుకున్నారు. బ్రహ్మోత్సవాల్లో అత్యంత ముఖ్య ఘట్టమైన 'గరుడ సేవ' సందర్భంగా రెండు ఘాట్ రోడ్లలోనూ ద్విచక్ర వాహనాల (బైక్ల) రాకపోకలను తాత్కాలికంగా నిషేధించారు. ఈ ఆంక్షలు సెప్టెంబర్ 18వ తేదీ రాత్రి 9 గంటల నుంచి ప్రారంభమయ్యాయి. సెప్టెంబర్ 20వ తేదీ ఉదయం 6 గంటల వరకు ఈ నిబంధనలు అమల్లో ఉంటాయని అధికారులు స్పష్టం చేశారు.
లక్షలాదిగా తరలివచ్చే భక్తులకు భద్రత కల్పించడం, ఘాట్ రోడ్లలో ట్రాఫిక్ స్తంభించకుండా చూడటమే ఈ నిర్ణయం వెనుక ప్రధాన ఉద్దేశం. బైక్లపై వచ్చే భక్తులు తిరుపతిలోని బాలాజీ లింక్ బస్టాండ్, నెహ్రూ మున్సిపల్ గ్రౌండ్, ఎస్వీ మెడికల్ కాలేజ్ మైదానం, ఇస్కాన్ గ్రౌండ్లలో తమ వాహనాలను పార్కింగ్ చేసుకోవాలని సూచించారు. అలాగే కార్లకు, టూరిస్ట్ బస్సులకు ప్రత్యేక పార్కింగ్ స్థలాలను కేటాయించినట్లు ట్రాఫిక్ పోలీసులు వెల్లడించారు.
కొండపైకి వెళ్లేందుకు ఆర్టీసీ బస్సులు నిరంతరాయంగా అందుబాటులో ఉంటాయని, భక్తులు ప్రైవేట్ బైక్లకు బదులుగా బస్సులు లేదా ఇతర నాలుగు చక్రాల వాహన సదుపాయాలను వినియోగించుకోవాలని టీటీడీ కోరింది. సెప్టెంబర్ 19న జరిగే వైభవమైన గరుడ వాహన సేవను వీక్షించేందుకు వచ్చే భక్తులందరూ పోలీసుల ట్రాఫిక్ మార్గదర్శకాలను పాటిస్తూ, సాలకట్ల బ్రహ్మోత్సవాలు ప్రశాంతంగా సాగేందుకు సహకరించాలని విజ్ఞప్తి చేశారు.
ఈ నేపథ్యంలో, కొండపై శ్రీవారి దర్శనం, సేవల కోసం వేచి ఉన్న భక్తుల సౌకర్యార్థం టీటీడీ విస్తృత ఏర్పాట్లు చేసింది. మాడ వీధుల్లో గరుడ సేవను కళ్లారా వీక్షించేందుకు వేలాది మంది భక్తులు ఇప్పటికే గ్యాలరీలకు చేరుకోవడంతో, వారికి ఎలాంటి అసౌకర్యం కలగకుండా తాగునీరు, పాలు, అన్నప్రసాదాలను నిరంతరాయంగా పంపిణీ చేస్తున్నారు. అదేవిధంగా భద్రత పరంగా ఎలాంటి అవాంఛనీయ సంఘటనలు జరగకుండా తిరుమలలో భారీగా పోలీసు బలగాలను మోహరించడంతో పాటు సిసిటివి కెమెరాలతో రద్దీని ఎప్పటికప్పుడు పర్యవేక్షిస్తున్నారు.
