ఆంధ్రప్రదేశ్లో మద్యం షాపుల లైసెన్స్ పునరుద్ధరణ (రెన్యూవల్) రుసుముపై నెలకొన్న వివాదంపై ఏపీ హైకోర్టు కీలకమైన మధ్యంతర ఉత్తర్వులు జారీ చేసింది. ప్రభుత్వం నోటిఫై చేసిన ఫీజును చెల్లించి, నిర్ణీత గడువులోగా దరఖాస్తు చేసుకోవాలని మద్యం దుకాణ యజమానులను ఆదేశించింది. సెప్టెంబర్ 21వ తేదీతో రెన్యూవల్ దరఖాస్తుల గడువు ముగియనున్న నేపథ్యంలో, ప్రధాన న్యాయమూర్తి జస్టిస్ లీసా గిల్, జస్టిస్ చల్లా గుణరంజన్లతో కూడిన ధర్మాసనం శుక్రవారం ఈ మేరకు తీర్పు వెలువరించింది.
ఓపెన్ కేటగిరీ షాపులకు, కల్లుగీత కేటగిరీ షాపులకు మధ్య పునరుద్ధరణ ఎక్సైజ్ పన్ను (RET) విధింపులో ప్రభుత్వం వ్యత్యాసం చూపిస్తోందని, వార్షిక ఆదాయంలో 38శాతం రుసుముగా వసూలు చేయడం వివక్షాపూరితమని గుంటూరుకు చెందిన పలువురు వ్యాపారులు కోర్టులో పిటిషన్ దాఖలు చేశారు. దీనిపై ప్రభుత్వం తరఫున అడ్వొకేట్ జనరల్ (AG) దమ్మాలపాటి శ్రీనివాస్ వాదనలు వినిపిస్తూ.. 38 శాతం రుసుము వార్షిక ఆదాయంపై కాదని, గతంలో చెల్లించిన లైసెన్స్ ఫీజుపై మాత్రమేనని స్పష్టం చేశారు. అలాగే రెన్యూవల్ అనేది పూర్తిగా వ్యాపారుల ఐచ్ఛికమని వెల్లడించారు.
ఇరుపక్షాల వాదనలు విన్న హైకోర్టు.. చెల్లించే ఫీజు కేసు తుది తీర్పునకు లోబడి ఉంటుందని పేర్కొంది. ఒకవేళ పిటిషనర్లు కేసులో విజయం సాధిస్తే, వారు చెల్లించిన అదనపు మొత్తాన్ని భవిష్యత్తు లావాదేవీల్లో సర్దుబాటు చేస్తామని ప్రభుత్వం కోర్టుకు హామీ ఇచ్చింది. ప్రభుత్వ హామీని రికార్డుల్లోకి తీసుకున్న న్యాయస్థానం, ప్రస్తుతానికి నిర్దేశిత ఫీజు చెల్లించి రెన్యూవల్ చేసుకోవచ్చని స్పష్టం చేస్తూ తదుపరి విచారణను వాయిదా వేసింది.
ఈ తీర్పుతో గత కొన్ని రోజులుగా మద్యం షాపుల రెన్యూవల్ ఫీజుపై నెలకొన్న అనిశ్చితికి తాత్కాలికంగా తెరపడినట్లయింది. ప్రభుత్వ నిబంధనల ప్రకారం గడువు లోగా ఫీజు చెల్లించకపోతే లైసెన్సులు రద్దయ్యే ప్రమాదం ఉండటంతో, వ్యాపారులు హైకోర్టు ఆదేశాల మేరకు దరఖాస్తు ప్రక్రియను పూర్తి చేసేందుకు సమాయత్తమవుతున్నారు. కాగా, కోర్టు తుది తీర్పు తమకు అనుకూలంగా వస్తుందనే ధీమాతో పిటిషనర్లు ఉండగా, ఈ వివాదంపై తదుపరి విచారణలో ఎలాంటి పరిణామాలు చోటుచేసుకుంటాయోనని మద్యం వ్యాపార వర్గాల్లో తీవ్ర ఉత్కంఠ నెలకొంది.
