తెలంగాణలో ఆర్టీసి బస్టాండ్లు, రవాణా మౌలిక వసతుల కల్పనపై రాష్ట్ర బీసీ సంక్షేమ, రవాణా శాఖ మంత్రి పొన్నం ప్రభాకర్ చేసిన వ్యాఖ్యలు ప్రస్తుతం రాజకీయ వర్గాల్లో, సోషల్ మీడియాలో తీవ్ర చర్చనీయాంశంగా మారాయి. అధికారిక అభివృద్ధి పనుల శంకుస్థాపన కార్యక్రమంలో శనివారం ఆయన మాట్లాడారు. ప్రజా రవాణా వ్యవస్థ, ప్రయాణికుల వసతులపై మాట్లాడుతూ.. మన రాష్ట్ర ఆర్థిక పరిస్థితి అమెరికా లాంటి అగ్రరాజ్యంలా ఉండదని, ప్రయాణికులందరికీ ఏసీ బస్టాండ్లు నిర్మించడం సాధ్యం కాదని స్పష్టం చేశారు.
పెద్దమనుషులు, ప్రముఖులు, గొప్పవాళ్లు ఎవరైనా వస్తే విమానాశ్రయాలు లేదా ప్రత్యేక ప్రాంగణాల్లో ఏసీ లాంజ్ కడతామని, అంతేకాని సామాన్య ప్రజలు ఉపయోగించే ప్రతీ బస్టాండ్‌లోనూ ఏసీలు ఏర్పాటు చేయడం అసాధ్యమని మంత్రి తేల్చిచెప్పారు. ఒకవేళ బస్టాండ్లు అన్నింటికీ ఏసీలు కడితే, బయట ఎండగా ఉందని జనాలు ఎవరూ లోపలి నుంచి బయటకు వెళ్లకుండా అక్కడే తిష్ట వేసుకుని కూర్చుంటారని ఆయన హాస్యధోరణిలో వ్యాఖ్యానించారు.
ప్రస్తుతం ఆర్టీసీని గాడిలో పెట్టేందుకు, ప్రయాణికులకు కనీస మౌలిక సదుపాయాలు అందించేందుకు ప్రభుత్వం కృషి చేస్తోందని, అయితే విలాసవంతమైన వసతుల కంటే ఆర్టీసీ బస్సుల నిర్వహణ, బస్టాండ్లలో పారిశుద్ధ్యం, భద్రతకు తాము ఎక్కువ ప్రాధాన్యత ఇస్తున్నామని మంత్రి పేర్కొన్నారు. సామాన్య ప్రజల ప్రయోజనాలను దృష్టిలో ఉంచుకునే వాస్తవిక విధానాలతో ముందుకు వెళ్తున్నామని ఆయన వెల్లడించారు. మంత్రి పొన్నం ప్రభాకర్ చేసిన ఈ వ్యాఖ్యలు ప్రస్తుతం నెట్టింట వైరల్ అవుతున్నాయి.
మంత్రి పొన్నం ప్రభాకర్ చేసిన ఈ వ్యాఖ్యలపై ప్రజా సంఘాలు, విపక్షాల నుంచి భిన్నమైన అభిప్రాయాలు వ్యక్తమవుతున్నాయి. ఎండలు తీవ్రంగా ఉండే వేసవి కాలంలో ప్రయాణికులు, ముఖ్యంగా వృద్ధులు, మహిళలు, చిన్నారులు బస్టాండ్లలో పడే ఇబ్బందులను దృష్టిలో ఉంచుకుని కనీస వసతులు కల్పించాల్సిన ప్రభుత్వం, ఇలాంటి వ్యంగ్య వ్యాఖ్యలు చేయడం తగదని కొందరు అభిప్రాయపడుతున్నారు. మరోవైపు, ఆర్టీసీని నష్టాల నుంచి గట్టెక్కించే ప్రయత్నంలో ఉన్న ప్రభుత్వానికి విలాసవంతమైన ఖర్చుల కంటే ప్రయాణ భద్రత, సకాలంలో బస్సుల నిర్వహణే ముఖ్యమని మరికొందరు సమర్థిస్తున్నారు.
