తల్లిదండ్రులకు దూరమై శిశు సంక్షేమ గృహంలో ఆవేదన అనుభవించిన ఓ మూడేళ్ల చిన్నారి(బాబు) కన్నీటి గాథ తెలుగు రాష్ట్రాల ప్రజల మనస్సులను తీవ్రంగా చలించిపోయేలా చేసింది. మూడేళ్లుగా అల్లారుముద్దుగా పెంచుకున్న బిడ్డను దత్తత వివాదం పేరిట అధికారులు వేరు చేయడంతో, దాదాపు రెండు నెలలుగా ఆ తల్లిదండ్రులు తీవ్ర నిరీక్షణ అనుభవించారు. ఈ క్రమంలో బిడ్డను పరామర్శించేందుకు వచ్చిన తల్లిదండ్రులను చూసి, ‘అమ్మా.. భయమేస్తోంది.. నన్ను తీసుకెళ్లు’ అంటూ ఆ చిన్నారి ఏడ్చిన దృశ్యాలు సామాజిక మాధ్యమాల్లో (Social Media) విపరీతంగా వైరల్ అయ్యాయి.
వీడియోలోని దృశ్యం ప్రతీ ఒక్కరి హృదయాలను ద్రవింపజేసింది. ఈ నేపథ్యంలో నెటిజన్ల నుంచి వెల్లువెత్తిన ఆగ్రహం, ఆవేదనతో ఈ అంశంపై నిన్నటి నుంచి ఉమ్మడి కరీంనగర్, జగిత్యాల జిల్లాల్లో తీవ్రస్థాయిలో చర్చ నడిచింది. సోషల్ మీడియాలో వైరల్ అయిన ఆ కన్నీటి వీడియోను చూసి స్పందించిన జగిత్యాల కలెక్టర్ వెంటనే మానవీయ కోణంలో చర్యలకు పూనుకున్నారు. చిన్నారిని తక్షణమే కన్నవారికి అప్పగించేలా చొరవ తీసుకుంటామని అధికారికంగా ప్రకటించిన కలెక్టర్, చెప్పిన మాట ప్రకారమే చర్యలను వేగవంతం చేశారు.
న్యాయపరంగా తెలంగాణ హైకోర్టు ఆదేశాలు ఉన్నప్పటికీ, అధికారుల జాప్యంతో ఇన్నాళ్లూ పెండింగ్‌లో పడిన ఈ అప్పగింత ప్రక్రియ సోషల్ మీడియా ఒత్తిడితో గంటల వ్యవధిలోనే పరిష్కారమైంది.సోమవారం అర్ధరాత్రి వేళ కరీంనగర్ జిల్లా శిశు సంక్షేమ గృహం (Child Care Home) నుంచి ఆ చిన్నారిని అధికారులు అధికారికంగా ఆమె తల్లిదండ్రులకు అప్పగించారు. దాదాపు రెండు నెలల సుదీర్ఘ పోరాటం, నిరీక్షణ, కన్నీళ్ల తర్వాత తమ బిడ్డ తిరిగి ఇంటికి చేరుకోవడంతో ఆ కుటుంబంలో మళ్లీ ఆనందోత్సాహాలు వెల్లివిరిసాయి.
బిడ్డను కౌగిలించుకుని కంటిపాపలా చూసుకుంటూ ఆ తల్లిదండ్రులు భావోద్వేగానికి గురయ్యారు. ఈ మొత్తం వ్యవహారంలో నెటిజన్లు, సమాజం చూపిన చొరవ సామాజిక మాధ్యమాలు సాధించిన నిఖార్సైన విజయంగా నిలిచింది. అలాగే ఈ సుదీర్ఘ న్యాయపోరాటంలో తమకు అడుగడుగునా అండగా నిలిచి, చట్టపరమైన న్యాయం చేకూరేలా శ్రమించిన ప్రముఖ అడ్వకేట్ రఘునందన్ రెడ్డికి పాప తల్లిదండ్రులు ఈ సందర్భంగా ప్రత్యేకంగా కృతజ్ఞతలు తెలిపారు.
