భారతీయ స్టాక్ మార్కెట్లు గురువారం అదరగొట్టే లాభాలతో దూసుకెళ్తున్నాయి. గత సెషన్‌లో నమోదైన నష్టాల నుంచి పూర్తిగా తేరుకున్న సూచీలు, కొనుగోళ్ల మద్దతుతో భారీ ఉత్సాహాన్ని ప్రదర్శిస్తున్నాయి. ఐటీ, బ్యాంకింగ్ షేర్లలో వెల్లువెత్తిన కొనుగోళ్ల జోరు, అంతర్జాతీయ మార్కెట్లో ముడిచమురు (Crude Oil) ధరలు తగ్గడం, రూపాయి మారకం విలువ బలపడటం వంటి సానుకూల పరిణామాలు మార్కెట్ ర్యాలీకి ఊతమిచ్చాయి.
మధ్యాహ్నం సమయానికి బాంబే స్టాక్ ఎక్స్ఛేంజ్ సూచీ సెన్సెక్స్ 1,000 పాయింట్లకు పైగా లాభపడగా, నేషనల్ స్టాక్ ఎక్స్ఛేంజ్ సూచీ నిఫ్టీ 50 కీలకమైన 22,950 స్థాయికి చేరువలో ట్రేడవుతోంది. టెక్ దిగ్గజాల త్రైమాసిక ఫలితాలపై అంచనాలు, ఆర్టిఫిషియల్ ఇంటెలిజెన్స్ (AI) సంబంధిత సేవలతో ఆదాయం పెరుగుతుందన్న నమ్మకంతో మదుపర్లు ఐటీ రంగ షేర్లపై పెద్దఎత్తున పెట్టుబడులు పెడుతున్నారు.
హెచ్‌సీఎల్‌టెక్, టీసీఎస్, ఇన్ఫోసిస్, టెక్ మహీంద్రా వంటి షేర్లు లాభాల బాట పట్టాయి. మరోవైపు రిలయన్స్ ఇండస్ట్రీస్ షేర్లు కూడా సుమారు 3 శాతం మేర లాభపడటంతో మార్కెట్ సెంటిమెంట్ మరింత బలపడింది. హెవీవెయిట్ షేర్ల కొనుగోళ్లు మార్కెట్‌ను పరుగులు పెట్టిస్తున్నాయి. అంతర్జాతీయ మార్కెట్లలో బ్రెంట్ క్రూడ్ ఆయిల్ ధరలు తగ్గడం భారత ఆర్థిక వ్యవస్థకు ఊరటనిచ్చే అంశంగా నిలిచింది.
దిగుమతి వ్యయం, ద్రవ్యోల్బణ ఒత్తిడి తగ్గుతుందనే అంచనాలు మార్కెట్‌కు మద్దతుగా నిలిచాయి. అలాగే అమెరికా డాలర్‌తో రూపాయి మారకం విలువ పుంజుకోవడం, ఆర్బీఐ చేపట్టిన నివారణ చర్యలు విదేశీ ఇన్వెస్టర్లలో భరోసాను నింపాయి.
