ప్రశాంత్ కిశోర్ నుంచి విజయ్ వరకు..
కొత్త రాజకీయ మోడల్కు ఇదే టైమా?
ఒకప్పుడు రాజకీయాల్లోకి రావాలంటే పార్టీ కావాలి. ఇప్పుడు పార్టీతో పాటు ఒక వ్యక్తిగత బ్రాండ్ కావాలి.
సోషల్ మీడియా కావాలి. యువతతో కనెక్షన్ కావాలి. భారత రాజకీయాల్లో ఇప్పుడు కనిపిస్తున్న కొత్త ట్రెండ్ ఇదేనా?
దశాబ్దాల చరిత్ర ఉన్న పార్టీలు ఒకవైపు.. సంప్రదాయ రాజకీయాలకు భిన్నంగా తమదైన శైలిలో రాజకీయాల్లోకి వస్తున్న కొత్త నాయకులు మరోవైపు. ఈ మార్పు ఇప్పుడు కేవలం చర్చకే పరిమితం కాకుండా ఎన్నికల ఫలితాల్లోనూ కనిపిస్తోందా అన్న ప్రశ్న మొదలైంది.
ప్రశాంత్ కిశోర్.. వ్యూహకర్త నుంచి రాజకీయ నాయకుడిగా
ఈ చర్చలో ముందుగా వినిపించే పేరు ప్రశాంత్ కిశోర్. ఎన్నికల వ్యూహకర్తగా దేశంలోని అనేక కీలక రాజకీయ పార్టీలతో పనిచేసిన ఆయన.. చివరకు రాజకీయ రంగంలోకి వచ్చి జన సురాజ్ పార్టీని ఏర్పాటు చేశారు. మొదట్లో ఇది మరో కొత్త రాజకీయ ప్రయోగంగానే కనిపించింది. కానీ ఇప్పుడు పరిస్థితి మారింది.
తాజాగా బంకీపూర్ ఉపఎన్నికలో ప్రశాంత్ కిశోర్ విజయం సాధించడం ఆయన రాజకీయ ప్రయోగానికి కీలక మలుపుగా నిలిచింది. బీజేపీకి బలమైన ప్రాంతంగా భావించే నియోజకవర్గంలో ఆయన విజయం సాధించడం కొత్త రాజకీయ చర్చకు దారితీసింది. కొత్త పార్టీకి ప్రజలు అవకాశం ఇవ్వడం సాధ్యమేనా? అనే ప్రశ్నకు ఒక ఉదాహరణ కనిపించింది.
తమిళనాడులో విజయ్ సక్సెస్
ఇదే సమయంలో తమిళనాడులో సినీ నటుడు విజయ్ రాజకీయ ప్రయోగం సూపర్ హిట్ అయింది.
విజయ్ స్థాపించిన తమిళగ వెట్రి కళగం ఇప్పటికే సంప్రదాయ రాజకీయ పార్టీలకు ప్రత్యామ్నాయంగా తనను తాను ప్రొజెక్ట్ చేసుకుంది. డీఎంకే, అన్నాడీఎంకేలను కాదని అధికారంలోకి వచ్చింది. ఇప్పుడు ఆ పాత పార్టీలకే చుక్కలు చూపెడుతున్నారు సీఎం విజయ్. భవిష్యత్లో మరింత ఎదిగేందుకు విశ్వ ప్రయత్నాలు చేస్తున్నారు.
పాత పార్టీలకు ప్రమాదమా?
బీజేపీ, కాంగ్రెస్, DMK, AIADMK, టీడీపీ, బీఆర్ఎస్, వైసీపీ వంటి పార్టీలకు దశాబ్దాలుగా ఏర్పడిన క్యాడర్, సంస్థాగత వ్యవస్థ, నాయకత్వ నిర్మాణం ఉన్నాయి. కొత్త రాజకీయ పార్టీలకు అవి ఉండవు. కానీ కొత్తవాళ్లకు మరో బలం ఉంది. వాళ్లకు పాత రాజకీయాల భారముండదు. అవినీతి, నిరుద్యోగం, విద్య, ధరలు, యువతకు అవకాశాలు వంటి అంశాలను నేరుగా మాట్లాడే అవకాశం ఉంటుంది. ముఖ్యంగా సోషల్ మీడియా ద్వారా మధ్యవర్తులు లేకుండా ఓటర్లతో మాట్లాడగలుగుతున్నారు. విజయ్ అదే చేశారు. అనుకున్నది సాధించారు. అందుకే కొత్త రాజకీయ ప్రయోగాలు ఇప్పుడు పార్టీ vs పార్టీ పోటీ కంటే సిస్టమ్ vs కొత్త రాజకీయ మోడల్ అనే చర్చను ముందుకు తెస్తున్నాయి.
యువతే అసలు గేమ్చేంజర్?
ఈ మార్పులో యువ ఓటర్లు కీలకం. యువతకు రాజకీయ నాయకుడి కుటుంబ నేపథ్యం కంటే.. అతను ఏం మాట్లాడుతున్నాడు? సోషల్ మీడియాలో ఎలా కనిపిస్తున్నాడు? ఉద్యోగాలు, విద్య, అవకాశాల గురించి ఏం చెబుతున్నాడు? అనే అంశాలు కూడా ప్రాధాన్యం పొందుతున్నాయి.
ఇక్కడే కొత్త రాజకీయ నాయకులకు అవకాశం లభిస్తోంది. ఒక ఫోన్.. ఒక కెమెరా.. ఒక సోషల్ మీడియా అకౌంట్.. ఒక బలమైన మెసేజ్. ఇవి కలిస్తే ఒక రాజకీయ బ్రాండ్ను నిర్మించగలిగే పరిస్థితి వచ్చింది. కానీ ఇది అంత ఈజీ కాదు. అయితే సోషల్ మీడియాలో ఫాలోయింగ్ ఉండటం, ఎన్నికల్లో ఓట్లు రావడం రెండూ ఒకటే కాదు.
ఎన్నికల్లో గెలవాలంటే పోలింగ్ బూత్ స్థాయి వరకు నిర్మాణం అవసరం. స్థానిక నాయకత్వం కావాలి. కార్యకర్తలు కావాలి. ఎన్నికల రోజు ఓటర్లను పోలింగ్ కేంద్రాలకు తీసుకురాగల సామర్థ్యం ఉండాలి.
అందుకే కొత్త రాజకీయ పార్టీల ముందున్న అసలు పరీక్ష వైరల్ కావడం కాదు.. ఓటు వేయించడం.
ప్రశాంత్ కిశోర్కు బంకీపూర్ విజయం ఒక కీలక సంకేతం కావచ్చు. కానీ దాన్ని రాష్ట్రవ్యాప్త రాజకీయ శక్తిగా మార్చగలరా అన్నది పెద్ద పరీక్షే. అదే విధంగా విజయ్కు కూడా భారీ వ్యక్తిగత క్రేజ్ ఉంది. అదే అధికారాన్ని సొంతమయ్యేలా చేసింది.
2029 నాటికి గేమ్ ఎలా మారుతుంది?
2029 లోక్సభ ఎన్నికల నాటికి భారత రాజకీయాల్లో మూడో రకం శక్తులు బలపడతాయా? ఒకవైపు BJP–కాంగ్రెస్ వంటి జాతీయ పార్టీలు.. మరోవైపు బలమైన ప్రాంతీయ పార్టీలు.. ఇక మూడో వైపు కొత్త నాయకులు, కొత్త పార్టీలు, కొత్త రాజకీయ బ్రాండ్లు. ఇది దేశవ్యాప్తంగా పెద్ద రాజకీయ మార్పు అని చెప్పడం కూడా తొందరపాటు అవుతుంది. కానీ సంకేతాలు మాత్రం కనిపిస్తున్నాయి. అదే నిజమైతే.. భారత రాజకీయాల్లో పోటీ కేవలం BJP vs కాంగ్రెస్ మాత్రమే కాకపోవచ్చు. పాత సంప్రదాయ రాజకీయ పార్టీలు vs స్టార్టప్ పాలిటిక్స్గా రాజకీయాలు మారిపోవచ్చు.
