ఢిల్లీలో యువత (Gen Z) చేపట్టిన నీట్ (NEET) నిరసనల సెగ నుంచి ప్రధాని నరేంద్ర మోదీ కీలకమైన పాఠాలే నేర్చుకున్నట్లు స్పష్టమవుతోంది. ఆందోళనల తదనంతర పరిణామాలను గ్రహించిన మోదీ, ప్రస్తుతం ఏ బహిరంగ సభలో మాట్లాడినా, ఏ సామాజిక మాధ్యమ పోస్ట్ పెట్టినా లేదా 'మన్ కీ బాత్' వంటి వేదికల ద్వారా ప్రసంగించినా యువత అంశాలకే అత్యధిక ప్రాధాన్యతనిస్తున్నారు. నవతరం ఆలోచనలను, వారి సృజనాత్మకతను నిరంతరం ప్రశంసిస్తూ, 'డ్రగ్-ఫ్రీ ఇండియా' లాంటి ప్రచారాల్లో వారినే భాగస్వాములను చేస్తూ వారిని ప్రసన్నం చేసుకునేందుకు వ్యూహాత్మకంగా అడుగులు వేస్తున్నారు.
తాజాగా, ప్రధాని నరేంద్ర మోదీ తన 137వ ‘మన్ కీ బాత్’ కార్యక్రమంలో దేశ ప్రజలను ఉద్దేశించి ప్రసంగిస్తూ, సాంకేతికతను ఉపయోగిస్తూ యువత చేస్తున్న వినూత్న ప్రయత్నాలను విశేషంగా ప్రశంసించారు. ముఖ్యంగా ముంబైకి చెందిన కృష్ణ శేషాద్రి రూపొందించిన ‘BharatRajya’ అనే వెబ్సైట్ గురించి ప్రత్యేకంగా ప్రస్తావించారు. నిర్దిష్ట సంవత్సరాన్ని ఎంచుకుంటే ఆ సమయంలో భారతదేశాన్ని పాలించిన రాజులు, రాజ్యాల వివరాలను అందించే ఈ సైట్ ద్వారా సాంకేతికత సహాయంతో చరిత్రను మరింత ఆసక్తికరంగా, సులభంగా నేర్చుకోవడానికి వీలవుతుందని మోదీ కొనియాడారు.
దేశ భవిష్యత్తును దృష్టిలో ఉంచుకుని ‘డ్రగ్-ఫ్రీ ఇండియా’ (మాదకద్రవ్యాల రహిత భారత్) ఉద్యమాన్ని విస్తృతంగా ముందుకు తీసుకెళ్లాలని ప్రధాని పిలుపునిచ్చారు. యువతను మాదకద్రవ్యాల మహమ్మారి నుంచి కాపాడుకోవడం అత్యంత కీలకమని, దీనికోసం సమాజంలో అవగాహన పెంచేందుకు డిజిటల్ కంటెంట్ క్రియేటర్లు, యువత చొరవతో ముందుకు రావాలని సూచించారు. యువతలోని సృజనాత్మక ఆలోచనలు, చిన్న మార్పులు కూడా సరైన దిశలో పడితే దేశ ప్రగతికి ఎంతగానో తోడ్పడతాయని ఆయన అభిప్రాయపడ్డారు. దేశ ఆర్థిక వ్యవస్థకు చేయూతనందించే క్రమంలో ప్రధాని ‘వోకల్ ఫర్ లోకల్’ మంత్రాన్ని మరోసారి పునరుద్ఘాటించారు.
స్వదేశీ ఉత్పత్తులను ప్రోత్సహించడం ద్వారా స్థానిక వ్యాపారాలు, చేతివృత్తుల కళాకారులు, చిన్న తరహా పరిశ్రమలకు ఎంతగానో లబ్ధి చేకూరుతుందని చెప్పారు. పౌరులందరూ వీలైనంత వరకు స్థానికంగా తయారయ్యే ఉత్పత్తులను కొనుగోలు చేసి ప్రోత్సహించాలని ఆకాంక్షించారు. మరొకవైపు పరిశుభ్రత అనేది కేవలం ప్రభుత్వ బాధ్యత మాత్రమే కాదని, ప్రతి పౌరుడి ప్రాథమిక విధి అని గుర్తుచేశారు. ఒక ప్రాంతంలో పరిశుభ్రత పాటించడం వల్ల అక్కడ ఆరోగ్యం పెరగడమే కాకుండా, ఆ ప్రాంత స్వరూపమే మారిపోతుందని వ్యాఖ్యానించారు.
మొత్తంగా ఈ 137వ కార్యక్రమంలో యువ ఆవిష్కరణలు, సాంకేతికత, స్వదేశీ వెలుగులు, మాదకద్రవ్యాల నిర్మూలనపై ప్రధాని సమగ్రమైన దిశానిర్దేశం చేశారు. జెన్జీ వర్గం నుంచి వ్యతిరేకత పెరిగితే రాజకీయంగా జరిగే నష్టాన్ని ముందే ఊహించి, వారి నమ్మకాన్ని మళ్లీ పునరుద్ధరించుకోవడమే లక్ష్యంగా ప్రధాని తమ ప్రసంగాల్లో యువత ప్రాధాన్యతను నిలబెడుతున్నారని రాజకీయ విశ్లేషకులు అభిప్రాయపడుతున్నారు.
